ଭୁବନେଶ୍ବର: ଉତ୍ତରପ୍ରଦେଶର ବରେଲିରେ ଶ୍ରୀଜଗନ୍ନାଥ ମନ୍ଦିର ପ୍ରତିଷ୍ଠା ହୋଇଛି। ଗୁରୁଜୀ ଚନ୍ଦ୍ରଭାନୁ ଶତପଥୀ ଦୁଇଦିନିଆ ଉତ୍ତରପ୍ରଦେଶ ଗସ୍ତରେ ଯାଇଥିବା ସମୟରେ ଶ୍ରୀଜଗନ୍ନାଥ ମନ୍ଦିର ଉଦ୍‍ଘାଟନ କରିଛନ୍ତି। ଏଥିସହ ତିନିଟି ସ୍ଥାନରେ ଶ୍ରୀଗୁରୁ ଭାଗବତ ଟୁଙ୍ଗି ପ୍ରତିଷ୍ଠା କରିଛନ୍ତି। ଆୟୋଜିତ ଉତ୍ସବରେ ସ୍ଥାନୀୟ ଅଞ୍ଚଳର ଶତାଧିକ ଭକ୍ତଙ୍କ ସମେତ ବିଦେଶରୁ ଆସିଥିବା ବହୁ ଶ୍ରଦ୍ଧାଳୁ କାର୍ଯ୍ୟକ୍ରମରେ ଯୋଗ ଦେଇଥିଲେ। ୧୨ ତାରିଖରେ ଗୁରୁଜୀ ଶିରିଡ଼ି ସାଇବାବା ମନ୍ଦିରର ରୌପ୍ୟ ଜୟନ୍ତୀ ଉତ୍ସବରେ ଯୋଗଦେବା ଅବସରରେ ଭାଗବତ ଟୁଙ୍ଗି ସହିତ ଏକ ଶିବଲିଙ୍ଗ ପ୍ରତିଷ୍ଠା କରାଯାଇଥିଲା। ୧୩ ତାରିଖରେ ବରେଲିଠାରେ ଚତୁର୍ଦ୍ଧାମୂର୍ତ୍ତିଙ୍କ ପୂଜାର୍ଚ୍ଚନା ହୋଇଥିଲା। ଅନୁରୂପ ଭ‌ାବେ ମୋରାଦାବାଦ୍‌ରେ ଶିରିଡ଼ି ସାଇ ମନ୍ଦିରରେ ଆୟୋଜିତ ଉତ୍ସବରେ ଗୁରୁଜୀ ଯୋଗଦେଇ ନୂଆ ଭାଗବତ ଟୁଙ୍ଗୀର ଉଦ୍‍ଘାଟନ କରିଥିଲେ। ଭୁବନେଶ୍ୱର ସାଇ ଇଣ୍ଟରନ୍ୟାସ୍‌ନାଲ୍‌ ସ୍କୁଲର ପିଲାମାନେ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ।