ଭୁବନେଶ୍ୱର: ରାଜଧାନୀ ପ୍ରତିଷ୍ଠାର ସାତ ଦଶନ୍ଧି ପରେ ବି ସ୍ମାର୍ଟ ସିଟିରେ ସ୍ମାର୍ଟ ରାସ୍ତା ନିର୍ମାଣ ହୋଇପାରୁନି। କିଛି ମୁଖ୍ୟ ରାସ୍ତାକୁ ଛାଡ଼ି ଦେଲେ ଉପାନ୍ତ ଅଞ୍ଚଳ ଭଳି ବର୍ଷ ସାରା ଖାଲ, ଢିପ, ତାଳିପକା ରାସ୍ତାରେ ଯନ୍ତ୍ରଣା ଭୋଗୁଛନ୍ତି ରାଜଧାନୀ ବାସୀ। ସହରକୁ ସରସ ସୁନ୍ଦର କରିବାକୁ ସରକାର ଆଖିବୁଜା ଟଙ୍କା ଖର୍ଚ୍ଚ କରୁଛନ୍ତି। ବର୍ଷ ସାରା ରାସ୍ତା, ଆଲୋକ, ପିଇବା ପାଣି, ବିଦ୍ୟୁତ୍ ଓ ସୌନ୍ଦର୍ଯ୍ୟୀକରଣ ପାଇଁ ବିଏମ୍‌ସି, ବିଏସ୍‌ସିଏଲ୍ ସହ ପୂର୍ତ୍ତ, ୱାଟ୍‌କୋ, ଓପିଟିସିଏଲ୍, ବିଏସ୍ଏନ୍‌ଏଲ୍, ଗେଲ୍ ଭଳି ଅନେକ ସଂସ୍ଥା କାମରେ ଲାଗିଛନ୍ତି। ହେଲେ ଏସବୁ ବିଭାଗ ମଧ୍ୟରେ ସମନ୍ୱୟ ଅଭାବରୁ ବିପୁଳ ସରକାରୀ ଅର୍ଥ ବରବାଦ୍ ହେଉଛି। ଚନ୍ଦ୍ରଶେଖରପୁରରୁ ପୁରୁଣା ଭୁବନେଶ୍ବର ଏବଂ ରସୁଲଗଡ଼ରୁ ଖଣ୍ଡଗିରି ସବୁଆଡେ ବିକାଶ ପାଇଁ ଚାଲିଛି ଖୋଳାତଡ଼ା। ଯିଏ ଯେମିତି ଓ ଯେଉଁଠି ପାରୁଛି ମନଇଚ୍ଛା ରାସ୍ତାକୁ ଖୋଳି ଦେଉଛି। ଏହି ଖୋଳାତଡ଼ା ଓ ପୁନର୍ବାର ନିର୍ମାଣରେ ବର୍ଷକୁ ୨ଶହ କୋଟିରୁ ଅଧିକ ଟଙ୍କା ପାଣିରେ ପଡୁଛି। ହେଲେ ସହରବାସୀଙ୍କୁ ଭଲ ରାସ୍ତାଟିଏ ଦେବାରେ ସରକାର ବିଫଳ ହେଉଛନ୍ତି। ଦୀର୍ଘ ଦିନର ଦାବି ପରେ ରବି ଟକିଜ୍-ଟଙ୍କପାଣି ରାସ୍ତା କାମ ହେଲା। କାମ ସରିବାର ୧୫ ଦିନ ନଯାଉଣୁ ୱାଟ୍‌କୋ, ଟିପିସିଓଡିଏଲ୍ ଓ ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍ ରାସ୍ତାକୁ ଖୋଳିଦେଲେ। ପୂର୍ତ୍ତ ବିଭାଗ ଏଥିପାଇଁ ଖୋଳୁଥିବା ବିଭାଗକୁ ନୋଟିସ୍‌ଟିଏ ମଧ୍ୟ ଦେଲାନାହିଁ। ପୁରୁଣା ଭୁବନେଶ୍ବର ବିବେକାନନ୍ଦ ମାର୍ଗରେ ପିଚୁ କାମ ପରେ ଡ୍ରେନ୍‌ ପାଇଁ ଖୋଳି ରାସ୍ତାକୁ ନଷ୍ଟ କରାଗଲା।

Advertisment

ସାନିଟାରିୟମ୍‌ରୁ ମାଉସୀ ମା’ ଛକ ଯାଏ ଗେଲ୍‌ ଗ୍ୟାସ୍‌ ପାଇପ୍‌ ପକାଇବା ପାଇଁ ପ୍ରାୟ ୩ ବର୍ଷ ହେବ ବାରମ୍ବାର ରାସ୍ତା ଖୋଳୁଛି। ରସୁଲଗଡ଼ରୁ ପାଣ୍ଡରା ରାସ୍ତା କାମ ସରିବା ପରେ ବାରମ୍ବାର ଖୋଳା ଯାଉଛି। ଗତ ମାର୍ଚ୍ଚ ମାସରେ କଟକ ରୋଡ ପିଚୁ କାମ ହୋଇଥିଲା। ଏବେ ଅନେକ ସ୍ଥାନରେ ପିଚୁ ଉଠିଗଲାଣି। ଆଶ୍ଚର୍ଯ୍ୟର କଥା ଏଠି ଗୋଟେ ଲେନ୍‌ ଉଚ୍ଚା, ଆଉ ଗୋଟେ ଲେନ୍‌ ନୀଚା ଥିବାରୁ ବାଇକ୍‌ ଚାଳକ ଦୁର୍ଘଟଣାର ଶିକାର ହେଉଛନ୍ତି। କେବଳ ଏହି ଗୋଟିଏ ରାସ୍ତା ନୁହେଁ ଗତ ମାର୍ଚ୍ଚ ମାସରେ ତରବରିଆ ଭାବେ ଅନେକ ସ୍ଥାନରେ ଏଭଳି ଉଚ୍ଚା ନୀଚା ରାସ୍ତା କରାଯାଇଛି। ସିଆର୍‌ପିରୁ ଏକାମ୍ର କାନନ ରାସ୍ତାକୁ ଏବେ ବି ଖୋଳି ନଷ୍ଟ କରାଯାଉଛି। ମଞ୍ଚେଶ୍ବର ଶିଳ୍ପାଞ୍ଚଳ ରାସ୍ତା ଅବସ୍ଥା ଶୋଚନୀୟ। ଜଗନ୍ନାଥ ନଗରରୁ କେସୁରା ରାସ୍ତା, ନୀବନ ନିବାସରୁ ପୋଖରୀପୁଟ, ନୀଳାଦ୍ରିବିହାର, କାନନବିହାର, ଡମଣା, ଗାଡ଼କଣ ଓ ରଙ୍ଗମାଟିଆକୁ ସଂଯୋଗ କରୁଥିବା ରାସ୍ତା, ଭିଏସ୍‌ଏସ୍‌ନଗର, ଜାଗମରା, ଖଣ୍ଡଗିରି, ବରମୁଣ୍ଡା ଗାଁ ପ୍ରମୁଖ ଅଞ୍ଚଳରେ ରାସ୍ତା ଅବସ୍ଥା ସମାନ। ସହର ଦେଇ ଯାଇଥିବା ଜାତୀୟ ରାଜପଥ ମରାମତି ହେଉନାହିଁ। ବିଏମ୍‌ସି ପେଭର ରାସ୍ତା ଅବସ୍ଥା ମଧ୍ୟ ସମାନ। 

ବର୍ଷକୁ ପାଣିରେ ପଡ଼ୁଛି ୨ଶହ କୋଟିରୁ ଅଧିକ
ବିଭାଗ ଉପରେ ନୋଡାଲ ଏଜେନ୍ସିର ନିୟନ୍ତ୍ରଣ ନାହିଁ

ରାଜଧାନୀରେ ପ୍ରାୟ ୧୫ ବର୍ଷ ହେବ ସ୍ବେରେଜ୍ କାମ ଚାଲିଥିଲେ ବି ଶେଷ ହେଉନାହିଁ। ଏବେ ବି ସହରର ଗଳି କନ୍ଦିରେ ସ୍ୱେରେଜ୍ ପାଇପ୍ ବିଛାଇବା ପାଇଁ କଂକ୍ରିଟ୍ ରାସ୍ତା ଖୋଳା ଯାଉଛି। ଠିକ୍ ସେମିତି ୱାଟ୍‌କୋ ପିଇବା ପାଣି ଯୋଗାଇବାକୁ ରାସ୍ତାକୁ ଖୋଳୁଛି। ମାଟି ତଳେ କେବୁଲ୍ ତାର ବିଛାଇବାକୁ ଓପିଟିସିଏଲ୍, ଟେଲିଫୋନ୍ ତାର ବିଛାଇବାକୁ ବିଏସ୍ଏନ୍‌ଏଲ୍‌, ଗ୍ୟାସ୍‌ ପାଇପ୍ ପାଇଁ ଗେଲ୍, ସିସି କ୍ୟାମେରା ଓ ଅନ୍ୟାନ୍ୟ କାରଣ ପାଇଁ ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍ ରାସ୍ତାକୁ ଖୋଳି ନଷ୍ଟ କରୁଛନ୍ତି। ଏହା ଛଡ଼ା ଏକାଧିକ ଘରୋଇ କମ୍ପାନି ରାସ୍ତା ଖୋଳି କେବୁଲ୍ ବିଛାଉଥିବା ଦେଖିବାକୁ ମିଳୁଛି।
ସହର ମଧ୍ୟରେ କୌଣସି ରାସ୍ତାକୁ ଖୋଳିବାକୁ ହେଲେ ନୋଡାଲ ଏଜେନ୍ସି ବିଏମ୍‌ସିର ସ୍ବୀକୃତି ନେବାକୁ ନିୟମ ରହିଛି। ସଂପୃକ୍ତ ବିଭାଗ ନିଜର କାମ ସାରିବା ପରେ ଉକ୍ତ ରାସ୍ତାକୁ ପୁନଃ ନିର୍ମାଣ କରିବା ବାଧ୍ୟତାମୂଳକ। କିନ୍ତୁ ଏହା କାର୍ଯ୍ୟକାରୀ କରାଯାଉନାହିଁ। ଯିଏ ଯେଉଁଠି ପାରୁଛି ଖୋଳୁଛି, ହେଲେ ମରାମତି କରାଯାଉନାହିଁ। ଫଳରେ ରାସ୍ତା ସମ୍ପୂର୍ଣ୍ଣ ନଷ୍ଟ ହୋଇଯାଉଛି। ପୁଣି ନୂଆ ରାସ୍ତା ପାଇଁ ଖର୍ଚ୍ଚ କରାଯାଉଛି। ସେହିପରି ରାସ୍ତାର ଗୋଟିଏ ପାର୍ଶ୍ୱରେ ଆବଶ୍ୟକ ସେବାଗୁଡ଼ିକ ପାଇଁ ଏକ ସ୍ବତନ୍ତ୍ର ଲାଇନ୍ ରହିବାକୁ ଏକ ଯୋଜନା ହୋଇଥିଲା। ତାହା ମଧ୍ୟ ଆଜି ଯାଏ କାର୍ଯ୍ୟକାରୀ ହେଲା ନାହିଁ। କିଛି ଦିନ ତଳେ ଏନେଇ ବିଏମ୍‌ସି କମିସନର ସ୍ବତନ୍ତ୍ର ବୈଠକ କରି ତାଗିଦ କରିଥିଲେ। ହେଲେ ଯଥା ପୂର୍ବଂ ତଥା ପରଂ।

ଏ ସମ୍ପର୍କରେ ମେୟର ସୁଲୋଚନା ଦାସ କହିଛନ୍ତି, ମୂଳ କଥା ହେଲା ବିଭାଗ ବିଭାଗ ମଧ୍ୟରେ ସମନ୍ବୟ ରହୁନଥିବାରୁ ଏଭଳି ପରିସ୍ଥିତି ସୃଷ୍ଟି ହେଉଛି। ବିଏମ୍‌ସିର ଅନୁମତି ନନେଇ ସରକାରୀ ଓ ବେସରକାରୀ ସଂସ୍ଥା ରାସ୍ତା ଖୋଳୁଛନ୍ତି। ବୈଠକକୁ ଡାକିଲେ ଆସୁନାହାନ୍ତି। ଯିଏ ଯେମିତି ପାରୁଛନ୍ତି ରାସ୍ତା ଖୋଳି ଦେଉଛନ୍ତି। ଏ ସମ୍ପର୍କରେ ଆମେ ମୁଖ୍ୟ ଶାସନ ସଚିବଙ୍କୁ ଅବଗତ କରିଛୁ। ସରକାରଙ୍କୁ ଜଣାଇବା ପରେ ମଧ୍ୟ କାହିଁକି ପଦକ୍ଷେପ ନେଉନାହାନ୍ତି, ତାହା ବୁଝା ପଡ଼ୁନି।