ଅଙ୍ଗଦାନ କରି ମହାନ ହୋଇଗଲେ ସୌମ୍ୟ: କିମ୍‍ସରେ ଓଡ଼ିଶାର ପ୍ରଥମ ସଫଳ ବହୁଅଙ୍ଗ ପ୍ରତିରୋପଣ

ଚନ୍ଦ୍ରଶେଖରପୁର: କଳିଙ୍ଗ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍‌ସେସ୍‌ (କିମ୍‍ସ)ରେ ପ୍ରଥମଥର ପାଇଁ ବହୁଅଙ୍ଗ ପ୍ରତିରୋପଣ ସଫଳତାର ସହ କରାଯାଇଛି। ନୟାଗଡ଼ର ୩୭ ବର୍ଷ ବୟସ୍କ ସୌମ୍ୟ ରଞ୍ଜନ ବେହେରାଙ୍କ ବ୍ରେନ୍ ଷ୍ଟ୍ରୋକ୍ ହେବା ପରେ ଗତ ୧୦ ତାରିଖରେ ତାଙ୍କୁ କିମ୍‍ସରେ ଭର୍ତ୍ତି କରାଯାଇଥିଲା। ଡାକ୍ତରଙ୍କ ଅକ୍ଳାନ୍ତ ପରିଶ୍ରମ ସତ୍ତ୍ୱେ ସୌମ୍ୟଙ୍କ ସ୍ୱାସ୍ଥ୍ୟାବସ୍ଥାରେ ସୁଧାର ଆସି ନଥିଲା। ଏଭଳି ପରିସ୍ଥିତିରେ ସୌମ୍ୟ ଅଙ୍ଗଦାନ କରି ଅନ୍ୟର ଜୀବନ ବଞ୍ଚାଇବାକୁ ପରିବାର ଲୋକେ ଚିନ୍ତା କରିଥିଲେ। କିମ୍‌ସ କର୍ତ୍ତୃପକ୍ଷଙ୍କ ସହ ଆଲୋଚନା ପରେ ଏହା ସମ୍ଭବ ହୋଇପାରିଥିଲା।

ସୌମ୍ୟଙ୍କଠାରୁ ଦୁଇଟି ବୃକ୍‌କ ଓ ଯକୃତ କଢ଼ାଯାଇ ପ୍ରତିରୋପଣ ପାଇଁ ପଠାଯାଇଥିଲା। ଗୋଟିଏ ବୃକ୍‌କ କଟକର ଏସ୍‌ସିବି ମେଡିକାଲ୍ କଲେଜ ଓ ହସ୍ପିଟାଲକୁ ପଠାଯାଇଥିଲା। ଅନ୍ୟ ବୃକ୍‌କ ଓ ଯକୃତ କିମ୍‍ସରେ ଦୁଇଜଣ ରୋଗୀଙ୍କଠାରେ ସଫଳ ପ୍ରତିରୋପଣ କରାଯାଇଥିଲା। ସୌମ୍ୟଙ୍କ ବଡ଼ ଭାଇ ରବୀନ୍ଦ୍ର କୁମାର ବେହେରା ଏ ନେଇ ନିଜ ପ୍ରତିକ୍ରିୟାରେ କହିଛନ୍ତି, ‘ମୁଁ ମୋ ସାନ ଭାଇକୁ ହରାଇଛି। କିନ୍ତୁ ତା’ବଦଳରେ ମୋର ଅନ୍ୟ ଦୁଇ ଭାଇ ନୂତନ ଜୀବନ ପାଇଛନ୍ତି।’ ଏହି ମହାନ କାର୍ଯ୍ୟକୁ କିଟ୍‌, କିସ୍ ଓ କିମ୍‍ସ ପ୍ରତିଷ୍ଠାତା ଅଚ୍ୟୁତ ସାମନ୍ତ ପ୍ରଶଂସା କରିଛନ୍ତି। ଆଜି ସକାଳେ କିମ୍‍ସ କର୍ତ୍ତୃପକ୍ଷ ଯୁବକଙ୍କୁ ଶ୍ରଦ୍ଧାଞ୍ଜଳି ଜଣାଇବା ସହିତ ଶେଷ ସମ୍ମାନ ଜଣାଇଥିଲେ। ପୁରୀରେ ସୌମ୍ୟଙ୍କ ଶବଦାହ ସମୟରେ ଆନୁଷ୍ଠାନିକ ଗାର୍ଡ ଅଫ୍ ଅନର ଦିଆଯାଇଛି।