ଭୁବନେଶ୍ବର: ‘ଏଥର ସମ୍ଭାଳ। ଯେଉଁଠି ଦେଖିବୁ, ସେଠି ଗୋଡ଼ାଇ ଗୋଡ଼ାଇ ଅଣ୍ଡା ମାରିବୁ।’ ଜାମିନରେ ଆସିବା ପରେ ଆଜି ଛାତ୍ର କଂଗ୍ରେସ କର୍ମୀମାନେ ଉଚ୍ଚଶିକ୍ଷା ମନ୍ତ୍ରୀ ସୂରଜ ସୂର୍ଯ୍ୟବଂଶୀଙ୍କୁ ସିଧାସଳଖ ଟାର୍ଗେଟ୍ କରି ଧମକ ଦେଇଛନ୍ତି। ଆଜି ଜାମିନ ମିଳବା ପରେ ଛାତ୍ର କଂଗ୍ରେସ କର୍ମୀ ଜେଲ୍ରୁ ବାହାରି ଶୋଭାଯାତ୍ରାରେ ଆସିଥିଲେ। ଏହି ସମୟରେ ସେମାନେ ପ୍ରତିକ୍ରିୟାରେ କହିଥିଲେ ଯେ ଆମେ ଏଫ୍ଏମ୍ କଲେଜ୍ ଛାତ୍ରୀଙ୍କ ପରିବାରକୁ ନ୍ୟାୟ ଦେବା ପାଇଁ ଲଢ଼େଇ କରି ପ୍ରତିବାଦରେ ବାସଭବନକୁ ଅଣ୍ଡା ମାରିଥିଲୁ। ହେଲେ ମନ୍ତ୍ରୀ ପୁଲିସ ଉପରେ ଚାପ ପକାଇ କଡ଼ା ଦଫା ଲଗାଇ ଆମକୁ ଜେଲ୍ ପଠାଇଲେ। ଆମ ପ୍ରତି ମନ୍ତ୍ରୀଙ୍କ ଭୟ ବହୁତ ଭଲ ଲାଗିଲା। ସେ ଯେତେ ଡରିବେ, ଆମେ ସେତେ ଆଗକୁ ବଢ଼ିବୁ। ଯାହାକୁ ନେଇ ରାଜନୈତିକ ଚର୍ଚ୍ଚା ଜୋର୍ ଧରିବା ସହ ଉଚ୍ଚଶିକ୍ଷା ମନ୍ତ୍ରୀଙ୍କ ସୁରକ୍ଷାକୁ ନେଇ ଚିନ୍ତା ବଢ଼ିଛି।
ସୂଚନା ମୁତାବକ, ଏଫ୍ଏମ୍ କଲେଜ୍ ଛାତ୍ରୀ ଆତ୍ମାହୁତି ଘଟଣାକୁ ନେଇ ୧୫ ତାରିଖ ସନ୍ଧ୍ୟା ୭ଟା ସମୟରେ ଯୁବ ଓ ଛାତ୍ର କଂଗ୍ରେସ ପକ୍ଷରୁ ଶୋଭାଯାତ୍ରା କରାଯାଇ ଉଚ୍ଚଶିକ୍ଷା ମନ୍ତ୍ରୀଙ୍କ ବାସବଭବନ ଘେରାଉ ସହ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଏହି ସମୟରେ ୮-୧୦ ଜଣ ସଦସ୍ୟ ଉଚ୍ଚଶିକ୍ଷା ମନ୍ତ୍ରୀଙ୍କ ବାସଭବନ ସମ୍ମୁଖରେ ଏକାଠି ହୋଇ ଭିତରକୁ ପଶିବା ପାଇଁ ଉଦ୍ୟମ କରିଥିଲେ। ପୂର୍ବରୁ ପ୍ରସ୍ତୁତ ଥିବା ପୁଲିସ ସେମାନଙ୍କୁ ବାରଣ କରିବା ସତ୍ତ୍ବେ ସେମାନେ ପୁଲିସ ସହ ଧସ୍ତାଧସ୍ତି କରି ବଳପୂର୍ବକ ମନ୍ତ୍ରୀଙ୍କ ବାସଭବନକୁ ପଶିବାକୁ ଉଦ୍ୟମ କରିଥିଲେ। ଧସେଇ ପଶିବାରେ ବିଫଳ ହେବାରୁ ମନ୍ତ୍ରୀଙ୍କ ବାସଭବନକୁ ଅଣ୍ଡା, ଟମାଟୋ ଓ ପଥର ମାଡ଼କରିଥିଲେ। ଏନେଇ କ୍ୟାପିଟାଲ୍ ଥାନା ପୁଲିସ କେସ୍ ନଂ-୩୨୮ରେ ବିଏନ୍ଏସ୍ ଦଫା ୧୯୧(୨)/୧୯୧(୩)/୬୨/୩୩୧(୫)/୨୯୬/୧୧୫(୨)/୧୨୧(୧)/୧୩୨/୧୨୫/୩୫୧(୨)/୧୯୦ ଏବଂ ଓୟୁପି ଆକ୍ଟ ସେକ୍ସନ ୯୬ରେ ମାମଲା ରୁଜୁକରି ଛାତ୍ର କଂଗ୍ରେସର ଆଦିତ୍ୟ ପ୍ରିତମ ଦାସ, ସୌମ୍ୟରଂଜନ ଜେନା, ଶୁଭକାନ୍ତ ସେଠୀ ଓ ବଳରାମ ସାହୁଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଆଜି ସେମାନେ ଜେଲ୍ରୁ ମୁକୁଳିବା ପରେ ସମର୍ଥକମାନେ ଝାରପଡ଼ା ଜେଲ୍ରୁ ସେମାନଙ୍କୁ ଶୋଭାଯାତ୍ରାରେ ସ୍ବାଗତ କରିଥିଲେ। ଏହି ସମୟରେ ଛାତ୍ର କଂଗ୍ରେସ କର୍ମୀମାନେ ସେଠାରୁ ଉଚ୍ଚଶିକ୍ଷା ମନ୍ତ୍ରୀଙ୍କୁ ଆହ୍ବାନ ଦେଇଥିଲେ। ଗିରଫ କଲେ ଆନ୍ଦୋଳନ ଥମିବ ନାହିଁ। ପୀଡ଼ିତାଙ୍କ ପରିବାରକୁ ନ୍ୟାୟ ନମିଳିବା ଯାଏ ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି ସେମାନେ କହିଛନ୍ତି।
Advertisment

Sambad is now on WhatsApp
Join and get latest news updates delivered to you via WhatsApp