ଫୁଲନଖରା: ପିତାମାତା ନିଜ ପିଲାଙ୍କୁ ନିଜର ସମ୍ପତ୍ତି ଭାବେ ପରିଗଣନା କରିବା ଅନୁଚିତ। ସେମାନଙ୍କୁ ନିର୍ଦ୍ଦିଷ୍ଟ ବୃତ୍ତିରେ ଯିବାକୁ ବାଧ୍ୟ ନ କରି ବୃତ୍ତି ଚୟନର ସ୍ବାଧୀନତା ଅଭିଭାବକମାନେ ଦେବା ଆବଶ୍ୟକ ବୋଲି ‘ଶ୍ରୁତିନ୍ୟାସ’ ଆନୁକୂଲ୍ୟରେ ଉଷୁମାସ୍ଥିତ ବେଦଧାମ ପରିସରରେ ଆୟୋଜିତ ପଞ୍ଚଦିବସୀୟ ‘ବିଦ୍ୟାର୍ଥୀ ଜୀବନ ନିର୍ମାଣ ଶିବିର’ରେ ମୁଖ୍ୟ ଅତିଥି ରୂପେ ଯୋଗଦେଇ ଇଷ୍ଟର୍ଣ୍ଣ ମିଡିଆ ଲିମିଟେଡ୍‌ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ସୌମ୍ୟରଂଜନ ପଟ୍ଟନାୟକ କହିଛନ୍ତି।  

Advertisment

ଶ୍ରୀ ପଟ୍ଟନାୟକ ମହାପୁରୁଷଙ୍କ ଜୀବନୀ ଅଧ୍ୟୟନ କରିବା ସହିତ ନିଜର ଆତ୍ମଜୀବନୀ ଲେଖିବାକୁ ବିଦ୍ୟାର୍ଥୀଙ୍କୁ ପରାମର୍ଶ ଦେଇଥିଲେ। ଏହା ସହିତ ମା’, ମାତୃଭାଷା, ମାତୃଭୂମି, ସତ୍ୟ, ନିରହଂକାର, ଚରିତ୍ରବାନ, ଦାୟିତ୍ବବାନ ଓ ଶୃଙ୍ଖଳିତ ଜୀବନଯାପନ କରିବାକୁ ଉପସ୍ଥିତ ଛାତ୍ରଛାତ୍ରୀଙ୍କୁ ଆହ୍ବାନ ଦେଇ ପଣ୍ତିତ ଗୋପବନ୍ଧୁ ଦାସ ଓ ଗୋଦାବରୀଶ ମିଶ୍ରଙ୍କ ଜୀବନଶୈଳୀ ଆପଣାଇବାକୁ କହିଥିଲେ। ବିଦ୍ୟାର୍ଥୀ ଏକାଧିକ ବିକଳ୍ପ ଚୟନ କରିବା ଉଚିତ ବୋଲି ସେ କହିଥିଲେ। ବିଶିଷ୍ଟ ସ୍ତମ୍ଭକାର ପ୍ରଫେସର ନିରଞ୍ଜନ ପାଢ଼ୀ ମୁଖ୍ୟବକ୍ତା ଭାବେ ଯୋଗଦେଇ ପରୀକ୍ଷାରେ କିଏ କେତେ ନମ୍ବର ରଖିବ ସେ ବାବଦରେ ପ୍ରତିଯୋଗିତା ନକରି ବରଂ କିଏ କେତେ ପରିମାଣରେ ଭଲ ମଣିଷ ହୋଇପାରିବ ସେ ଦିଗରେ ଅଧିକ ଯତ୍ନବାନ ହେବାକୁ ପିଲାମାନଙ୍କୁ ପରାମର୍ଶ ଦେଇଥିଲେ। ଅନୁଷ୍ଠାନର ମୁଖ୍ୟ ପୁରୋଧା ସ୍ବାମୀ ଶୁଦ୍ଧାନନ୍ଦ ସରସ୍ବତୀଙ୍କ ପୌରୋହିତ୍ୟରେ ଆୟୋଜିତ ଏହି କାର୍ଯ୍ୟକ୍ରମ ପ୍ରାରମ୍ଭରେ ବେଦ ଧ୍ବନି ସହ ପ୍ରଦୀପ ପ୍ରଜ୍ଜ୍ବଳନ ହୋଇଥିଲା।

ଅନୁଷ୍ଠାନର ସଂଯୋଜକ ତଥା ଅବସରପ୍ରାପ୍ତ ଭାରତୀୟ ପ୍ରଶାସନିକ ସେବା ଅଧିକାରୀ ପ୍ରମୋଦ କୁମାର ପଟ୍ଟନାୟକ ଉତ୍ସବର ଆଭିମୁଖ୍ୟ ଉପରେ ଆଲୋକପାତ କରିବା ସହ ଅତିଥି ପରିଚୟ ପ୍ରଦାନ କରିଥିଲେ। ଏହି ଅବସରରେ ବିଭିନ୍ନ ବିଭାଗରେ ଉତ୍କର୍ଷ ପ୍ରତିପାଦନ କରିଥିବା ବିଦ୍ୟାର୍ଥୀଙ୍କୁ ପୁରସ୍କୃତ କରାଯିବା ସହ ଅତିଥିମାନଙ୍କୁ ସମ୍ମାନିତ କରାଯାଇଥିଲା। ପାଞ୍ଚ ଦିନ ଧରି ଚାଲିଥିବା ଏହି ଶିବିରର ଉଦ୍‌ଯାପନ ଦିବସରେ ଯଜ୍ଞ, ଯୋଗ ଓ ଧ୍ୟାନାଦି ବୈଦିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ ରାଜ୍ୟର ୨୫ଟି ଜିଲ୍ଲାରୁ ୩ଶହରୁ ଅଧିକ ଶିବିରାର୍ଥୀ ଯୋଗ ଦେଇଥିଲେ। ଅଜୟ କୁମାର ମହାପାତ୍ର, ଇଂ. କୁମାର ସ୍ବାମୀ, ପଦ୍ମନାଭ ସ୍ବାଇଁ, ପ୍ରଜ୍ଞା ପଟ୍ଟନାୟକ ଓ ପୁଷ୍ପାଞ୍ଜଳି ଦେବୀଙ୍କ ସମେତ ବେଦଧାମ ଅନ୍ତେବାସୀ ଶିବିର ପରିଚାଳନା କରିଥିଲେ।