ଭିଏସ୍ଏସ୍‌ନଗର ଆର୍‌ଓବି ନିର୍ମାଣରେ ପୂର୍ବତଟ ରେଳପଥକୁ ସଫଳତା

ଭୁବନେଶ୍ୱର: ମାତ୍ର ତିନି ଘଣ୍ଟା ମଧ୍ୟରେ ରୋଡ୍‌ ଓଭର ବ୍ରିଜ୍‌(ଆରଓବି) ଉପରେ ଗାର୍ଡର ସ୍ଥାପନ କରାଯାଇଛି। ଭୁବନେଶ୍ବରର ଭିଏସ୍‌ଏସ୍‌ନଗରଠାରେ ନିର୍ମାଣଧୀନ ଆରଓବିରେ ପୂର୍ବତଟ ରେଳପଥକୁ ଏଭଳି ସଫଳତା ମିଳିଛି। ଭୁବନେଶ୍ୱର ଓ ମଞ୍ଚେଶ୍ୱର ରେଳ ଷ୍ଟେସନ ମଧ୍ୟରେ ଅବସ୍ଥିତ ଭିଏସଏସନଗର ଆରଓବି ପ୍ରକଳ୍ପର ଏକ ଅଂଶ ଭାବେ ତିନି ଘଣ୍ଟା ମଧ୍ୟରେ ୩୬ ମିଟର ଲମ୍ବ ୫ଟି ଷ୍ଟିଲ୍ ଗାର୍ଡର(ଯାହାର ଓଜନ ପ୍ରତ୍ୟେକ ୩୫ ଟନ୍) ସଫଳତାର ସହ ଅବସ୍ଥାପିତ ହୋଇଛି। ଖୋର୍ଦ୍ଧାରୋଡ୍ ରେଳ ମଣ୍ଡଳ ସହଯୋଗରେ ୩ ଘଣ୍ଟିଆ ଟ୍ରାଫିକ୍ ଓ ଓଭରହେଡ୍ ଇକ୍ୟୁପ୍‌ମେଣ୍ଟ(ଓଏଚ୍‌ଇ) ବ୍ଲକ ନିଆଯାଇ ରେଳପଥର ନିର୍ମାଣ ବିଭାଗ ଦ୍ୱାରା ଏହି ଜଟିଳ କାର୍ଯ୍ୟ ଶେଷ କରାଯାଇଛି। ଦେଶର ବ୍ୟସ୍ତବହୁଳ ରେଳ ସେକ୍ସନ ହାଓଡା-ଚେନ୍ନାଇ ମେନ୍ ଲାଇନରେ ଏଭଳି ଏକ ଆହ୍ବାନପୂର୍ଣ୍ଣ କାର୍ଯ୍ୟକୁ ଅତି ଯତ୍ନଶୀଳ ଓ ସମନ୍ୱୟ ମାଧ୍ୟମରେ କରାଯାଇଥିବା ପୂର୍ବତଟ ରେଳପଥ ପକ୍ଷରୁ କୁହାଯାଇଛି।

୩୬ ମିଟର ଲମ୍ବ ୫ଟି ଷ୍ଟିଲ୍ ଗାର୍ଡର ଲାଗିଲା
ରେଳର ବାକି ଅଂଶ ଡିସେମ୍ବର ସୁଦ୍ଧା ସରିବ

ମୁଖ୍ୟ ପ୍ରକଳ୍ପ ପ୍ରବନ୍ଧକ(ସିପିଏମ୍) ଓ ତାଙ୍କ ଟିମ୍‌ର ଏକାଧିକ ଲଜିଷ୍ଟିକ୍ ଆହ୍ବାନ ସତ୍ତ୍ବେ ସଫଳତାର ସହ ଏହି କାର୍ଯ୍ୟ ଶେଷ କରିଛନ୍ତି। ପ୍ରତ୍ୟେକ ୩୬ ମିଟର ଦୈର୍ଘ୍ୟ ଓ ୩୫ ଟନ୍‌ ଓଜନର ଏହି ଗାର୍ଡରଗୁଡ଼ିକର ସଫଳ ସ୍ଥାପନ ଆରଓବି ନିର୍ମାଣରେ ଏକ ମହତ୍ୱପୂର୍ଣ୍ଣ ମାଇଲଖୁଣ୍ଟ ବୋଲି କୁହାଯାଇଛି। ଏହି ଲେଭଲ କ୍ରସିଂଠାରେ ରେକର୍ଡ ହୋଇଥିବା ୨ ଲକ୍ଷ ଟ୍ରେନ୍ ଭେଇକିଲ୍ ୟୁନିଟ୍(ଟିଭିୟୁ) ରହିଛି। ଭୁବନେଶ୍ୱର ଓ ମଞ୍ଚେଶ୍ୱର ଷ୍ଟେସନ ମଧ୍ୟରେ ଏହି ସ୍ବତନ୍ତ୍ର ଲେଭଲ୍ କ୍ରସିଂକୁ ବଦଳାଇବା ପାଇଁ ଭିଏସ୍‌ଏସ୍‌ନଗରରେ ଆରଓବି ନିର୍ମାଣ କରାଯାଉଛି। ଏହା ଦୀର୍ଘ ଦିନ ଧରି ଉଭୟ ସଡ଼କ ଓ ରେଳ ଟ୍ରାଫିକ୍ ପାଇଁ ପ୍ରତିବନ୍ଧକ ସୃଷ୍ଟି କରୁଛି। ଏହି ପ୍ରକଳ୍ପ ପରେ ମଞ୍ଚେଶ୍ୱର ଶିଳ୍ପାଞ୍ଚଳ, ଚକେଇସିଆଣୀ, ଭିଏସ୍ଏସ୍ ନଗର, ସୈନିକ ସ୍କୁଲ୍, ଗାଡ଼କଣ, ଚନ୍ଦ୍ରଶେଖରପୁର ପରି ଅଞ୍ଚଳରେ ଟ୍ରାଫିକ୍ ପ୍ରବାହକୁ ବହୁତ ଉନ୍ନତ କରିବ। 

ପୂର୍ବତଟ ରେଳପଥ ସଫଳତାର ସହିତ ରେଲୱେ ଅଂଶରେ ପିଲର ଉପରେ ଗାର୍ଡର୍ ସ୍ଥାପନ କରିସାରିଥିବା ବେଳେ ରେଳ ଅଂଶରେ ଅବଶିଷ୍ଟ ନିର୍ମାଣ କାର୍ଯ୍ୟ ବାକି ରହିଛି। ଡେକ୍ ସ୍ଲାବ୍ ସ୍ଥାପନ, କ୍ରାସ୍ ପ୍ରତିବନ୍ଧକ ଓ ଆକ୍ସନ୍ ଜଙ୍କସନ୍ ସହ ଅନ୍ୟାନ୍ୟ କାର୍ଯ୍ୟଗୁଡ଼ିକ ଡିସେମ୍ବର ସୁଦ୍ଧା ଶେଷ ହେବ ବୋଲି ଆଶା କରାଯାଉଛି। ଏହି ଆରଓବି ନିର୍ମାଣ ଅଞ୍ଚଳ ପାଇଁ ଏକ ମହତ୍ୱପୂର୍ଣ୍ଣ କାର୍ଯ୍ୟ ହେବ, ଯାହାକି ଯାତ୍ରୀଙ୍କୁ ବହୁ ଆବଶ୍ୟକୀୟ ସୁବିଧା ଯୋଗାଇବ। ବହୁ ପୂର୍ବରୁ ସୁରକ୍ଷା ଚିନ୍ତା କରିଆସୁଥିବା ବ୍ୟସ୍ତ ବହୁଳ ଲେଭଲ କ୍ରସିଂକୁ ଦୂର କରିବ। ଏଥିସହ ସଡ଼କ ଓ ରେଳ ସୁରକ୍ଷାକୁ ବୃଦ୍ଧି କରାଇବା ପାଇଁ ଭାରତୀୟ ରେଳ ମିସନ ସହ ସମାନ୍ତରାଳ ଭାବରେ ଏହି ପ୍ରକଳ୍ପ ରେଳ ଓ ସଡ଼କ ଯାନ ଚଳାଚଳକୁ ସହଜ କରିବ। ଲେଭଲ୍ କ୍ରସିଂ ଏମ୍‌ଏଲ୍‌ ୧୮୬ ସ୍ଥାନରେ ଏହି ଆରଓବି ନିର୍ମାଣ ହେଉଛି। ରେଳ ଅଂଶରେ ଏହି କାର୍ଯ୍ୟ ଶେଷ କରିବାକୁ ପ୍ରାୟ ୪୮.୨ କୋଟି ନିବେଶ ହୋଇଛି। ଏହି ମେଗା ପ୍ରକଳ୍ପର ଅଗ୍ରଗତି ପାଇଁ ବୈଦ୍ୟୁତିକ ଟ୍ରାନ୍ସଫର୍ମର ଓ ଅଣ୍ଡରଗ୍ରାଉଣ୍ଡ କେବୁଲ ସ୍ଥାନାନ୍ତର ସହିତ ଅନେକ ଜଟିଳ କାର୍ଯ୍ୟ ଶେଷ ହୋଇଛି। ଆରଓବି କାର୍ଯ୍ୟକ୍ଷମ ପରେ କେବଳ ସଡ଼କ ସୁରକ୍ଷାକୁ ଉନ୍ନତ କରିବ ନାହିଁ, ବରଂ ଦ୍ରୁତ, ନିରାପଦ ଓ ନିର୍ଭରଯୋଗ୍ୟ ଯାତ୍ରା ସୁନିଶ୍ଚିତ କରିବ।