ଭୁବନେଶ୍ବର: କମିସନରେଟ୍‌ ପୁଲିସ ପକ୍ଷରୁ ଭୁବନେଶ୍ବର ନୂଆ କୋର୍ଟ ସମ୍ମୁଖ ରାସ୍ତାକୁ ନୋପାର୍କିଂ ଜୋନ୍ ଘୋଷଣା କରାଯାଇଛି। ଟ୍ରାଫିକ୍‌ ସମସ୍ୟା‌ର ସମାଧାନ ଓ ସୁବିଧାରେ ଗାଡ଼ି ପାର୍କିଂ ପାଇଁ ନୂତନ କୋର୍ଟ ପରିସରରେ ପ୍ରାୟ ୭୦ କୋଟି ଟଙ୍କା ବ୍ୟୟରେ ବହୁତଳ କାର୍‌ ପାର୍କିଂ ନିର୍ମାଣ କରାଯାଇଛି। ହେଲେ ଆଶ୍ଚର୍ଯ୍ୟର କଥା, ଏବେବି କୋର୍ଟ ସମ୍ମୁଖରେ ରାସ୍ତା ଅଧ ପର୍ଯ୍ୟନ୍ତ ବେଆଇନ ପାର୍କିଂ ଜାରି ରହିଛି। ତେଣୁ ପୂର୍ବପରି ଅଫିସ୍‌ ସମୟରେ ଏହି ରାସ୍ତାରେ ଗୁରୁତର ଟ୍ରାଫିକ୍‌ ସମସ୍ୟା ସୃଷ୍ଟି ହେଉଛି। 
ପ୍ରତିଦିନ ଭୁବନେଶ୍ବର କୋର୍ଟକୁ ହଜାର ହଜାର ଲୋକ ଆସୁଛନ୍ତି। ପୂର୍ବରୁ ପାର୍କିଂ ସୁବିଧା ନଥିବାରୁ କୋର୍ଟ ସମ୍ମୁଖ ରାସ୍ତା ଉପରେ ଗାଡ଼ି ପାର୍କିଂ କରାଯାଉଥିଲା। ୨୦୧୭-୧୮ ମସିହାରେ ୧୦୦ କୋଟି ଟଙ୍କା ବ୍ୟୟରେ ନୂତନ କୋର୍ଟ କୋଠା ନିର୍ମାଣ ପାଇଁ ଯୋଜନା ହୋଇଥିଲା। ଏହି କୋଠା ନିର୍ମାଣ ପାଇଁ ୭ ବର୍ଷ ସମୟ ଲାଗିଲା। ଏହି ସମୟରେ ଆଇନଜୀବୀମାନେ ରାସ୍ତାକଡ଼ରେ ଆଜବେଷ୍ଟସ୍‌ ତଳେ କିମ୍ବା ପାଲ ଟାଣି ବସି‌ଲେ। ଏଥିସହ ରାସ୍ତାର ପ୍ରାୟ ୭୦ ଭାଗ ସ୍ଥାନରେ ଗାଡ଼ି ପାର୍କିଂ କରାଗଲା। ଏହାକୁ ଦୃଷ୍ଟିରେ ରଖି କୋର୍ଟ କୋଠା ସମ୍ମୁଖ ଖାଲି ସ୍ଥାନରେ ଏକ ବହୁତଳ ଗାଡ଼ି ପାର୍କିଂ ପାଇଁ ନିଷ୍ପତ୍ତି ହେଲା ଏବଂ ୭୦ କୋଟି ବ୍ୟୟରେ ବହୁତଳ କାର୍‌ ପାର୍କିଂ ନିର୍ମାଣ ହେଲା। ଗତ ଡିସେମ୍ବର ୫ ତାରିଖରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏହି ନୂତନ କୋର୍ଟ କୋଠାକୁ ଉଦ୍‌ଘାଟନ କରିଥିଲେ। କୋର୍ଟ ଉଦ୍‌ଘାଟନକୁ ୭ ମାସ ହେଲାଣି। ‌ଏଠାରେ ପାଖାପାଖି ୪୬୦ଟି କାର୍‌ ଓ ୫୦୦ ବାଇକ୍‌ ରହିବାର ବ୍ୟବସ୍ଥା ହୋଇଛି। ତଥାପି ପାର୍କିଂ ସମସ୍ୟାର ସମାଧାନ ହୋଇପାରୁନି। ଓଟିଡିସିଠାରୁ କଳ୍ପନା ଛକ ପର୍ଯ୍ୟନ୍ତ ଶହଶହ ସଂଖ୍ୟାରେ ଗାଡ଼ି ରାସ୍ତା ଉପରେ ପାର୍କିଂ କରାଯାଉଛି। ଫଳରେ ସକାଳ ୧୦ରୁ ଅପରାହ୍ନ ୪ଟା ଯାଏ ରାସ୍ତା ଜାମ୍‌ ରହୁଛି।
ସେହିପରି ବିଜେବି କଲେଜ ସମ୍ମୁଖ ରାସ୍ତା, କଳ୍ପନା ଛକରୁ ମାଉସା ମା’ ଛକ ପର୍ଯ୍ୟନ୍ତ ରାସ୍ତା ବେଆଇନ ପାର୍କିଂ ପାଇଁ ଜାମ୍‌ ରହୁଛି। ପୁରୁଣା ବିଏମ୍‌ସି ଅଫିସ୍‌ ପରିସରରେ ସବ୍‌ରେଜିଷ୍ଟ୍ରାର ଅଫିସ୍‌ ଚାଲିଛି। ତେଣୁ ବିଏମ୍‌ସି ପୁରୁଣା ଅଫିସ୍‌ ସମ୍ମୁଖରେ ଅନେକ ଆଇନଜୀବୀ, ଷ୍ଟାମ୍ପ ଭେଣ୍ଡର ରାସ୍ତା କଡ଼ରେ ବସୁଛନ୍ତି। ଏଠାରେ ମଧ୍ୟ ଲୋକେ ରାସ୍ତା ଉପରେ ଗାଡ଼ି ରଖିବାରୁ ଟ୍ରାଫିକ୍‌ ଜାମ ହେଉଛି। ସେହିପରି କୋର୍ଟ କୋଠା ପଛପଟରେ ଭୁବନେଶ୍ବର ତହସିଲଦାର ଓ ଉପଜିଲ୍ଲାପାଳଙ୍କ ଅଫିସ୍‌ ରହିଛି। ତେଣୁ ଏହି ରାସ୍ତା ମଧ୍ୟ ଜାମ୍‌ ରହୁଛି। କିଛି ଦିନ ତଳେ କମିସନରେଟ୍‌ ପୁଲିସ ପକ୍ଷରୁ ଏହି ରାସ୍ତାକୁ ନୋ ପାର୍କିଂ ଜୋନ୍‌ ଘୋ‌ଷଣା କରାଯାଇଥିଲା। କିନ୍ତୁ ବୋର୍ଡ ଲଗାହେଲା ନାହିଁ। ଯେଉଁଥିପାଇଁ ଲୋକେ ଏହାକୁ ମାନୁନାହାନ୍ତି। ଏନେଇ ସ୍ଥାନୀୟ କର୍ପୋରେଟର ନୃପେଶ ନାୟକ କହିଛନ୍ତି, ଆଇନଜୀବୀମାନେ ରାସ୍ତାରେ ଅଧିକ ଗାଡ଼ି ରଖୁଛନ୍ତି। ତାଙ୍କ ଦେଖାଦେଖି ସେମାନଙ୍କ ମହକିଲ୍‌ମାନେ ମଧ୍ୟ ରାସ୍ତାରେ ପାର୍କିଂ କରୁଛନ୍ତି। ତେଣୁ ଟ୍ରାଫିକ ସମସ୍ୟାର ସମାଧାନ ହୋଇପାରୁନି। ତଥାପି କୋର୍ଟ ପଛପଟ ରାସ୍ତାର ସଂପ୍ରସାରଣ କରି ପାର୍କିଂ ପାଇଁ ସ୍ଥାନ ବାହାର କରିବାକୁ ଚିନ୍ତା କରାଯାଇଥିଲା। କିନ୍ତୁ ଟେଣ୍ଡର ବାତିଲ ‌ହେବାରୁ ଏହା ମଧ୍ୟ ଅନିଶ୍ଚିତତାରେ ରହିଯାଇଛି।