ଖଣ୍ଡଗିରି: ଯୁବବର୍ଗଙ୍କ ମଧ୍ୟରେ ବଢ଼ୁଛି ଆତ୍ମହତ୍ୟା ପ୍ରବଣତା। କ୍ଷଣିକ ଉତ୍ତେଜନାରେ ବଶୀଭୂତ ହୋଇ ଜୀବନ ହାରିବା ଭଳି ଚରମ ନିଷ୍ପତ୍ତି ନେଉଛନ୍ତି ଯୁବପିଢ଼ି। ୨୦୨୦ ମସିହାରୁ ଅଦ୍ୟାବଧି ନଜର ପକାଇଲେ, ରାଜ୍ୟର ବିଭିନ୍ନ ଶିକ୍ଷାନୁଷ୍ଠାନର ଛାତ୍ରଛାତ୍ରୀଙ୍କ ଆତ୍ମହତ୍ୟା ସଂଖ୍ୟା ୭୫ରେ ପହଞ୍ଚିଛି। ରାଜ୍ୟରେ ଏହି ହାର ଉଦ୍‌ବେଗଜନକ ରହିଥିବା ବେଳେ ତାଲିକାରେ ଭୁବନେଶ୍ବର‌ ବହୁ ଆଗରେ ରହିଛି। ଏହାଠୁ ଅଧିକ ଗୁରୁତ୍ବପୂର୍ଣ୍ଣ କଥା ହେଲା, ୯୦ ପ୍ରତିଶତ ହେଉଛନ୍ତି ୧୫ବର୍ଷରୁ ୩୦ ବର୍ଷ ମଧ୍ୟରେ। ପ୍ରେମରେ ବିଫଳତା, ପାଠପଢ଼ା ଓ କାମ ଚାପ, ପରିବାରରେ ଅଶାନ୍ତି ଆଦି କାରଣ‌ ପାଇଁ ଧୈର୍ଯ୍ୟହରା ହୋଇ ସେମାନେ ଏତେ ବଡ଼ ଭୁଲ୍‌ କରି ବସୁଛନ୍ତି। ସାଧାରଣରେ ଆଲୋଡ଼ନ ସୃଷ୍ଟି କରୁଥିବା ଏହି ଘଟଣା ଚିନ୍ତାର ବିଷୟ ହୋଇଛି।

Advertisment

ସ୍ଥାପିତ ହେବ ‘ମେଣ୍ଟାଲ୍‌ ହେଲ୍‌ଥ ୱିଙ୍ଗ୍‌’
ଗଭୀର ମାନସିକ ଅବସାଦ, ସିଜୋଫ୍ରେନିଆ, ନିଶାଦ୍ରବ୍ୟ‌ ସେବନ କାରଣ- ମନସ୍ତତ୍ତ୍ବବିତ୍‌

ଗତ ସପ୍ତାହରେ ଇଲ୍‌ନେସ୍‌ ଟୁ ୱେଲନେସ୍‌ ଫାଉଣ୍ଡେସନ୍‌ ପକ୍ଷରୁ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କହିଲେ ଯେ ପ୍ରତି ୧୦ଜଣ ଛାତ୍ରଛାତ୍ରୀଙ୍କ ମଧ୍ୟରୁ ଜଣଙ୍କ ମନରେ ଆତ୍ମହତ୍ୟା ଚିନ୍ତାଧାରା ସୃଷ୍ଟି ହେଉଛି। ପାଠପଢ଼ାରେ ଅତ୍ୟଧିକ ଚାପ ବା ପିତାମାତାଙ୍କ ଉଚ୍ଚାଭିଳାଷ ଆଗରେ ପିଲାମାନେ ହାର ମାନୁଛନ୍ତି। ଏନେଇ ରାଜ୍ୟରେ ଖୁବ୍‌ଶୀଘ୍ର ‘ମେଣ୍ଟାଲ୍‌ ହେଲ୍‌ଥ ୱିଙ୍ଗ’ ସ୍ଥାପିତ ହେବ ବୋଲି ଉପମୁଖ୍ୟମନ୍ତ୍ରୀ ସୂଚନା ଦେଇଥିଲେ। ବିଦ୍ୟାଳୟସ୍ତରରୁ ପିଲାମାନଙ୍କୁ ମାନସିକ ସ୍ତରରେ ସୁଦୃଢ଼ କରିବା ସହିତ କାଉନ୍‌ସେଲିଂ ଦ୍ବାରା ଆତ୍ମହତ୍ୟା ଭାବନା ଉପରେ ରୋକ୍‌ ଲଗାଇବା ପାଇଁ ଚେଷ୍ଟା କରାଯିବ। ‌ଅନୁରୂପ ଭାବେ ଆତ୍ମହତ୍ୟା ଦୃଷ୍ଟିରୁ ଦକ୍ଷିଣ-ପୂର୍ବ ଏସିଆରେ ଭାରତର ସ୍ଥିତି ଅନ୍ୟ ଦେଶ ଅପେକ୍ଷା ବହୁ ଆଗରେ ରହିଛି। ବିଶ୍ୱ ସ୍ବାସ୍ଥ୍ୟ ସଙ୍ଗଠନର ରିପୋର୍ଟ ଦର୍ଶାଉଛି ଯେ ଦେଶରେ ୧ ଲକ୍ଷ ଯୁବଗୋଷ୍ଠୀଙ୍କ ମଧ୍ୟରୁ ୧୬.୫% ଆତ୍ମହତ୍ୟା ପାଇଁ ପଦକ୍ଷେପ ନେଉଛନ୍ତି। ପ୍ରତି ଏକ ଘଣ୍ଟାରେ ଭାରତରେ ଜଣେ ଛାତ୍ର ଆତ୍ମହତ୍ୟା କରୁଥିବା ଏହି ରିପୋର୍ଟ ଦର୍ଶାଇଛି। ଅନ୍‌ଲାଇନ୍‌ ଗେମ୍‌, ଆର୍ଥିକ ବିଶୃଙ୍ଖଳା, ପରିବାର ମଧ୍ୟରେ ଅସମାନତା, ଶିକ୍ଷା କ୍ଷେତ୍ରରେ ମାନସିକ ଚାପ ପ୍ରଭୃତି ସମସ୍ୟା ଯୁବଗୋଷ୍ଠୀଙ୍କ ଆତ୍ମହତ୍ୟା ଭଳି ଚରମ ନିଷ୍ପତ୍ତି ପଛର ପ୍ରମୁଖ କାରଣ ବୋଲି ଜଣାପଡ଼ିଛି।

ଏସମ୍ପର୍କରେ ବିଶିଷ୍ଟ ମନସ୍ତତ୍ତ୍ବବିତ୍‌ ଡା. ପ୍ରଶାନ୍ତ ମହାପାତ୍ର କହିଛନ୍ତି, ଗଭୀର ମାନସିକ ଅବସାଦ, ସିଜୋଫ୍ରେନିଆ, ନିଶାଦ୍ରବ୍ୟ‌ ସେବନ ଆଦି ଆତ୍ମହତ୍ୟାର ପ୍ରମୁଖ କାରଣ। ମହିଳାଙ୍କ କ୍ଷେତ୍ରରେ ଆତ୍ମହତ୍ୟା ଉଦ୍ୟମ ଅଧିକ ପରିମାଣରେ ଦେଖାଦିଏ। ତେବେ ପୁରୁଷଙ୍କ କ୍ଷେତ୍ରରେ ଆତ୍ମହତ୍ୟା ପ୍ରବଣତା ଅଧିକ। ସାଧାରଣତଃ ବାପାମାଆଙ୍କର ତୁଳନାତ୍ମକ ମନୋଭାବ, ଏକୁଟିଆପଣ ଓ ଆର୍ଥିକ ଅନିୟମିତତା କ୍ଷେତ୍ରରେ ଯୁବବର୍ଗ ଆତ୍ମହତ୍ୟା ଚିନ୍ତାଧାରାର ଶିକାର ହୋଇଥାନ୍ତି। କେବଳ ପିଲାମାନଙ୍କର କାଉନ୍‌ସେଲିଂରେ ଆତ୍ମହତ୍ୟାକୁ ରୋକାଯାଇପାରିବ ନାହିଁ। ପିତାମାତା ମଧ୍ୟ ପିଲାର ମାନସିକତାକୁ ବୁଝିବା ଆବଶ୍ୟକ। ରାଜ୍ୟରେ ମେଣ୍ଟାଲ ହେଲ୍‌ଥ ୱିଙ୍ଗ ସ୍ଥାପନ ସହିତ ବିଦ୍ୟାଳୟସ୍ତରରେ ଏନେଇ ବ୍ୟାପକ ସଚେତନତାର ଆବଶ୍ୟକତା ରହିଛି ବୋଲି ଶ୍ରୀ ମହାପାତ୍ର ମତ ଦେଇଛନ୍ତି।