ଖଣ୍ଡାରେ ଆକ୍ରମଣ, ଯୁବକ ଗିରଫ

ଭୁବନେଶ୍ବର: ଜଣେ ଜଳଖିଆ ଦୋକାନୀଙ୍କୁ ଖଣ୍ଡାରେ ଆକ୍ରମଣ କରିବା ଅଭି‌ଯୋଗରେ ଖାରବେଳନଗର ଥାନା ପୁଲିସ ୟୁନିଟ୍‌-୩ ତାରିଣୀ ବସ୍ତିର ସୋମନାଥ ସାହୁ(୩୬)କୁ ଗିରଫ କରିଛି। ତା’ଠାରୁ ଏକ ଖଣ୍ଡା ଓ କାର୍‌ ଜବତ କରାଯାଇଛି। ପୁଲିସ ସୂଚନାନୁସାରେ ଗତକାଲି ବିଳମ୍ବିତ ରାତିରେ ଧୀରେନ୍ଦ୍ର ଜେନାଙ୍କ ଜଳଖିଆ ଦୋକାନର ଜଣେ କର୍ମଚାରୀ ଘରକୁ ଫେରୁଥିଲେ। ତାରିଣୀ ବସ୍ତି ଅନ୍ତର୍ଗତ ମଙ୍ଗଳା ମନ୍ଦିର ନିକଟରେ ଏକ ନାଲି ରଙ୍ଗର କାର୍‌ରେ ଥିବା ସୋମନାଥ ତାଙ୍କୁ ଅଟକାଇ ଗାଳିମନ୍ଦ କରିବା ସହିତ ମାଡ଼ ମାରିଥିଲେ।

କର୍ମଚାରୀ ଜଣକ ଜୀବନ ବିକଳରେ ସେଠାରୁ ଦୌଡ଼ିଦୌଡ଼ି ମାଲିକ ଧୀରେନ୍ଦ୍ରଙ୍କ ଘରକୁ ପଳାଇଥିଲେ। ପାଟି ଶୁଣି ଧୀରେନ୍ଦ୍ର ଘରୁ ବାହାରି ଆସିବା ମାତ୍ରେ ପିଛା କରୁଥିବା ସୋମନାଥ କାର୍‌ ଭିତରୁ ଖଣ୍ଡା ବାହାର କରି ତାଙ୍କୁ ହାଣିଦେବାକୁ ଗୋଡ଼ାଇଥିଲା। ମୁଣ୍ଡକୁ ଲକ୍ଷ୍ୟ କରି ସୋମନାଥ ଖଣ୍ଡା ଚୋଟ ପକାଇଥିଲା, କିନ୍ତୁ ସୌଭାଗ୍ୟକୁ ଧୀରେନ୍ଦ୍ର ପାଖେଇ ଯିବାରୁ ବର୍ତ୍ତି ଯାଇଥିଲେ। ସ୍ଥାନୀୟ ଲୋକଙ୍କଠାରୁ ଖବର ପାଇ ପୁଲିସ ସେଠାରେ ପହଞ୍ଚି ସୋମନାଥକୁ କାବୁ କରିଥିଲା।