ଭୁବନେଶ୍ବର: ବାଲେଶ୍ବର ଏଫ୍‌ଏମ୍ ସ୍ୱୟଂଶାସିତ ମହାବିଦ୍ୟାଳୟର ଜଣେ ଛାତ୍ରୀଙ୍କ ଆତ୍ମାହୁତି ଘଟଣାକୁ ନେଇ ଆଜି ଭୁବନେଶ୍ବରରେ ତୁମୁଳକାଣ୍ଡ ସୃଷ୍ଟି ହୋଇଥିଲା। ଆଜି ବିଜେଡି ପକ୍ଷରୁ ଲୋକସେବା ଭବନ ଘେରାଉ କରାଯାଇଥିଲା ଏବଂ ଲୋୟର୍‌ ପିଏମ୍‌ଜି ପାଲଟିଥିଲା ରଣକ୍ଷେତ୍ର। ପୁଲିସ ସହ ବିଜେଡି ନେତା ଓ କର୍ମୀଙ୍କ ଧସ୍ତାଧସ୍ତି ହୋଇଥିଲା। ପୁଲିସ ପକ୍ଷରୁ ଲୁହାବୁହା ଗ୍ୟାସ୍‌ ଓ ପାଣି ମାଡ଼ କରାଯାଇଥିଲା। ଗୋଟିଏ ପଟେ ଲୋୟର୍‌ ପିଏମ୍‌ଜିରେ ଏମିତି ସଂଘର୍ଷ ଚାଲିଥିବା ବେଳେ ଅନ୍ୟ ପଟେ ରାଜଧାନୀବାସୀ ଟ୍ରାଫିକ୍‌ ଭିଡ଼ରେ ଫସି ବଡ଼ କଲବଲ ହୋଇଥିଲେ। ନାକାବନ୍ଦି ପାଇଁ ସବୁଆଡ଼େ ପୁଲିସ ପକ୍ଷରୁ ବାରିକେଡ୍‌ ଲଗାଯାଇଥିବାରୁ ଲୋକେ ଟ୍ରାଫିକ୍ ଯନ୍ତ୍ରଣାରେ ଛଟପଟ ହୋଇଯାଇଥିଲେ। ସକାଳ ୯ରୁ ଅପରାହ୍ଣ ସାଢ଼େ ୧ଟା ପର୍ଯ୍ୟନ୍ତ ପାଖାପାଖି ସାଢ଼େ ୪ଘଣ୍ଟା ଧରି ସହରରେ ସ୍ବାଭାବିକ ଭାବେ ଗାଡ଼ି ଗଡ଼ିବା ଏକ ପ୍ରକାର ଅସମ୍ଭବ ହୋଇପଡ଼ିଥିଲା।
ମୃତା ଛାତ୍ରୀ ଓ ତାଙ୍କ ପରିବାରକୁ ନ୍ୟାୟ ପ୍ରଦାନ ଦାବିରେ ଆଜି ବିଜେଡି ପକ୍ଷରୁ ଲୋକସେବା ଭବନ ଘେରାଉ କରାଯାଇଥିଲା। ସେହିଭଳି କଂଗ୍ରେସ ମଧ୍ୟ ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ କାର୍ଯ୍ୟକ୍ରମ ରଖିଥିଲା। କେବଳ ସେତିକି ନୁହେଁ, ସମାନ ଦାବିରେ ଏବିଭିପି ପକ୍ଷରୁ ଜାତୀୟ ରାଜପଥ ଅବରୋଧ କରାଯାଇଥିଲା। ତିନି ତିନିଟି ସଂଗଠନର ଆନ୍ଦୋଳନ ଯୋଗୁ ସାରା ସହରରେ ଏକପ୍ରକାର ଅଖଚକ ବନ୍ଦ ସ୍ଥିତି ସୃଷ୍ଟି ହୋଇଥିଲା। ବିଜେଡିର ଲୋକସେବା ଭବନ ଓ କଂଗ୍ରେସର ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ ଡାକରା ପରେ ପୁଲିସ ଲୋୟର୍‌ ପିଏମ୍‌ଜିକୁ ସମ୍ପୂର୍ଣ୍ଣ ନିଜ ନିୟନ୍ତ୍ରଣକୁ ନେବା ଲାଗି କଂଗ୍ରେସ ଭବନଠାରୁ ଆଇଜି ପାର୍କ ମଧ୍ୟରେ ସମସ୍ତ ରାସ୍ତାକୁ ସିଲ୍‌ କରିଥିଲା। ସେମିତି ଲୋକସେବା ଭବନ ପଛପଟ, ମୁଖ୍ୟମନ୍ତ୍ରୀଙ୍କ ଆବାସ ସମ୍ମୁଖ ରୋଡ୍‌, କମିସନରେଟ୍‌ ପୁଲିସ ଛକ, ରବୀନ୍ଦ୍ରମଣ୍ଡପ, କେଶରୀ ଟକିଜ୍‌ ଛକର ଗଳିକନ୍ଦିରେ ପୁଲିସ ବ୍ୟାରିକେଡ୍‌ ସାଙ୍ଗକୁ ପୁଲିସ ଛାଉଣି କରାଯାଇଥିଲା। ଏହି ସମୟରେ କିଏ ଅଫିସ୍‌ ବାହାରିଥାଏ ତ କିଏ ଅନ୍ୟ କୌଣସି କାମରେ ଘରୁ ବାହାରି ଥାଏ। ଘରୁ ବାହାରିବା ପରେ ଠିକଣା ସ୍ଥଳରେ ପହଞ୍ଚିବା ପାଇଁ ଲୋକ କେଉଁ ରାସ୍ତାରେ ଯିବେ ବାଟ ପାଇ ନଥିଲେ। ଯେଉଁଆଡ଼େ ଗଲେ କେଉଁଠି ନା କେଉଁଠି ବ୍ୟାରିକେଡ୍‌ ଲାଗିଥିଲା ଏବଂ ପୁଲିସ ବାଟ ଜଗି ବସିଥିଲା। ତେଣୁ ଲୋକେ ରାସ୍ତାରେ ଚକ୍କର କାଟିକାଟି ଅଣନିଃଶ୍ବାସୀ ହୋଇପଡ଼ିଥିଲେ। ଗୋଟିଏ ପଟେ ସହର ଭିତରେ ଟ୍ରାଫିକ୍‌ ଜାମ୍‌ ଓ ଅନ୍ୟ ପଟେ ଏବିଭିପି ପକ୍ଷରୁ ବାଣୀବିହାର ଛକରେ ଜାତୀୟ ରାଜପଥ ଅବରୋଧ ଯୋଗୁ ଟ୍ରାଫିକ୍‌ ଜାମ୍‌ ସ୍ଥିତି ଆହୁରି ଜଟିଳ ହୋଇପଡ଼ିଥିଲା।  ଖଣ୍ଡଗିରିଠୁ ଆରମ୍ଭ କରି ନୂଆପଲ୍ଲୀ, ବାଣୀବିହାର, ଚନ୍ଦ୍ରଶେଖରପୁର, ରସୁଲଗଡ଼, କଳ୍ପନା, ସହିଦନଗର, ଏଜି, କ୍ୟାପିଟାଲ୍‌ ହସ୍ପିଟାଲ୍‌ ରୋଡ୍‌, ଜନପଥ ପର୍ଯ୍ୟନ୍ତ ସବୁଆଡ଼େ ମାଳମାଳ ଗାଡ଼ି ଲମ୍ବା ଲାଇନ୍‌ରେ ଅପେକ୍ଷା କରି ରହିଥିଲା। ଟ୍ରାଫିକ୍‌ ଜାମ୍‌ରେ  ଲୋକେ ନାକେଦମ୍‌ ହୋଇଥିଲେ। କିଛି ସ୍ଥାନରେ ଆମ୍ବୁଲାନ୍ସ ବି ଫସିଥିବା ଦେଖିବାକୁ ମିଳିଥିଲା।