ଭୁବନେଶ୍ବର: ଆଜି ରାତି ପ୍ରାୟ ୧୨ଟା ସମୟରେ ଡମଣାଛକ ନିକଟରେ ଏକ କାର୍‌ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଛି। ଅତି ଦ୍ରୁତଗତିରେ ଯାଉଥିବା ଏହି କାର୍‌ଟି ନିୟନ୍ତ୍ରଣ ହରାଇ ରାସ୍ତା ମଝିରେ ଏକ ସ୍କୁଟିକୁ ଧକ୍କା ଦେବାପରେ ପ୍ରବଳ ବେଗରେ ଯାଇ ରାସ୍ତା ମଝିରେ ଥିବା ଡିଭାଇଡର୍‌ରେ ପିଟି ହୋଇଥିଲା। ସେଥିରେ ଉଭୟ ସ୍କୁଟି ଚାଳକ ଓ କାର୍‌ ଚାଳକ ଆହତ ହୋଇଥିଲେ। ପିସିଆର୍‌ ଭ୍ୟାନ୍‌ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ହସ୍ପିଟାଲକୁ ନେଇଥିବା ଜଣାପଡିଛି। କାର୍‌ ଚାଳକ ମଦପିଇ ଗାଡ଼ି ଚଳାଉଥିଲେ କି ନା, ତା’ର ଯାଞ୍ଚ କରାଯାଉଛି। ଅନ୍ୟପକ୍ଷରେ ଦିନଯାକର ଧୂଳି ଓ ଧୂଆଁ ସାଙ୍ଗକୁ ମଧ୍ୟରାତ୍ରିରେ କୁହୁଡ଼ି ପଡୁଥିବାରୁ ରାସ୍ତା ଦେଖାଯିବାରେ ମଧ୍ୟ ସାମାନ୍ୟ ସମସ୍ୟା ରହିଛି।