ରାଜଧାନୀରେ ଚାଞ୍ଚଲ୍ୟ: ଶାଶୂଙ୍କ ଗୋଡ଼ରେ ବେଡ଼ି ପକାଇ ଝାଡୁରେ ମାରିଲେ ବୋହୂ

ଭୁବନେଶ୍ବର: ରାଜଧାନୀର ମଞ୍ଚେଶ୍ୱର ଶିଳ୍ପାଞ୍ଚଳରେ ଜଣେ ବୋହୂ ତାଙ୍କ ଶାଶୂଙ୍କୁ ନିର୍ଯାତନା ଦେଉଥିବା ଘଟଣା ଏବେ ଚର୍ଚ୍ଚାର ବିଷୟ ହୋଇଛି। ଏଠାରେ ଜଣେ ବୋହୂ ତାଙ୍କ ଶାଶୂଙ୍କ ଗୋଡ଼ରେ ବେଡ଼ି ପକାଇଥିବା ଦେଖିବାକୁ ମିଳିଛି। ଦୀର୍ଘ ଦିନ ଧରି ବୋହୂ ଜଣଙ୍କ ତାଙ୍କ ଶାଶୂଙ୍କ ଗୋଡ଼ରେ ବେଡି ପକାଇଥିବା ଜଣାପଡ଼ିଛି। ଏହାର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଛି।

ଖାଲି ସେତିକି ନୁହେଁ, ବୋହୂ ଶାଶୂଙ୍କୁ ଝାଡୁରେ ମାଡ଼ ମାରୁଥିବାର ଭିଡିଓ ବି ସାମ୍ନାକୁ ଆସିଛି। ଘଟଣା ସଂପର୍କରେ ଖବର ପାଇ ମଞ୍ଚେଶ୍ୱର ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି। ଅନ୍ୟପଟେ ପୁଲିସ ପହଞ୍ଚିବା ପରେ ଶାଶୂଙ୍କ ଗୋଡ଼ରୁ ବେଡ଼ି ଖୋଲି ଦିଆଯାଇଥିବା ଦେଖିବାକୁ ମିଳିଛି। ତେବେ କାହିଁକି ବୋହୂ ଶାଶୁଙ୍କୁ ଏଭଳି ଢଙ୍ଗରେ ନିର୍ଯାତନା ଦେଉଥିଲେ, ତାହା ଜଣାପଡ଼ିନାହିଁ। ପୁଲିସ ତଦନ୍ତ ପରେ କଥାର ଅସଲ କାରଣ ଜଣାପଡ଼ିବ।