ଭୁବନେଶ୍ବର: ଜନ୍ମବେଦିରୁ ବାହୁଡ଼ିବା ପରେ ରବିବାର ତିନି ଦିଅଁ ଶ୍ରଦ୍ଧାଳୁଙ୍କୁ ଦିବ୍ୟ ଦୁର୍ଲଭ ସୁନାବେଶ ଦର୍ଶନ ଦେଇଛନ୍ତି। ଆଉ ଆଜି ଅଧରପଣା ନୀତି ସମ୍ପନ୍ନ ହୋଇଛି। ସର, କଦଳୀ, ଛେନା, ଗୋଲମରିଚ, ଗୁଣ୍ଡ କର୍ପୂର, ଜାଇଫଳ ଆଦି ସାମଗ୍ରୀରେ ପ୍ରସ୍ତୁତ ଅଧରପଣା ସନ୍ଧ୍ୟାରେ ରଥାରୂଢ଼ ଠାକୁରଙ୍କ ପାଖରେ ଲାଗି ହୋଇଛି। ଦ୍ବାଦଶୀ ତିଥିରେ ଶ୍ରୀବିଗ୍ରହଙ୍କ ଅଧର ଛୁଉଁଥିବା ମାଟିହାଣ୍ଡିରେ ପଣା ଭୋଗ ପରେ ଅଶରୀରୀଙ୍କ ଉଦ୍ଦେଶ୍ୟରେ ଉତ୍ସର୍ଗ ହୋଇଛି ଅଧରପଣା। ମହାପ୍ରଭୁଙ୍କ ଅଧରାମୃତ ପାନ କରିଛନ୍ତି ରଥ ପାର୍ଶ୍ବ ଦେବଦେବୀ ଓ ଚଣ୍ଡୀ ଚାମୁଣ୍ଡା। ଅଧରପଣା ନୀତି ପରେ ମହାସ୍ନାନ ଓ ପରେ ମଇଲମ, ବେଶ, ସଂଧ୍ୟା ଆଳତି ହୋଇ ଅନ୍ୟାନ୍ୟ ନୀତିକାନ୍ତି କରାଯାଇଛି। ଆସନ୍ତାକାଲି ମଙ୍ଗଳବାର ନୀଳାଦ୍ରୀବିଜେ କରିବେ ମହାପ୍ରଭୁ। 
ନୀଳାଦ୍ରିବିଜେ ସମୟରେ ସିଂହଦ୍ୱାର ଫାଟକରେ ବାଟ ଓଗାଳନ୍ତି ଅଭିମାନୀ ମା’ ମହାଲକ୍ଷ୍ମୀ। ତେଣୁ ରତ୍ନବେଦିକୁ ବିଜେ କରିବା ପୂର୍ବରୁ ମା’ ମହାଲକ୍ଷ୍ମୀଙ୍କର ମାନଭଞ୍ଜନ କରିବେ ମହାପ୍ରଭୁ। ମହାଲକ୍ଷ୍ମୀଙ୍କୁ ରସଗୋଲା ଖୁଆଇ ମାନଭଞ୍ଜନ କରି ମନ୍ଦିରକୁ ବିଜେ କରିବେ। ଏଥିପାଇଁ ରାଜଧାନୀରେ ଥିବା ସମସ୍ତ ମନ୍ଦିରରେ ପ୍ରସ୍ତୁତି ସରିଛି। ପୁଲିସ ପ୍ରଶାସନ ମଧ୍ୟ ସୁରକ୍ଷାକୁ ଗୁରୁତ୍ବ ଦେଇ ଆବଶ୍ୟକ ପଦକ୍ଷେପ ଗ୍ରହଣ କରିଛି। ଆଜି ବର୍ଷା ସ‌ତ୍ତ୍ବେ ଅଧରପଣା ନୀତି ଦେଖିବାକୁ ଭକ୍ତଙ୍କ ସମାଗମ ହୋଇଥିଲା। ମୁଖ୍ୟତଃ କିସ୍‌, ୟୁନିଟ୍‌-୮, ଇସ୍କନ, ଜାଗମରା, ପୁରୁଣା ଭୁବନେଶ୍ବର ଆଦି ସ୍ଥାନରେ ରଥ ଉପରେ ଶ୍ରୀଜୀଉଙ୍କ ଏହି ଦୁର୍ଲଭ ନୀତି ଦେଖିବାକୁ ଜନସମାଗମ ହୋଇଥିଲା। ଅନେକ ମନ୍ଦିର ସମ୍ମୁଖରେ ଭଜନ ପରିବେଷଣ କରାଯାଇଥିଲା।