ଭୁବନେଶ୍ବର: ଗତକାଲି ସକାଳେ ସହିଦନଗର ଥାନା ଭୋଇନଗର ଅଞ୍ଚଳରୁ ଜଣେ ୪ବର୍ଷର ନାବାଳକ ଅପହୃତ ହୋଇଥିଲା। କିନ୍ତୁ ରାତି ସୁଦ୍ଧା କମିସନରେଟ୍ ପୁଲିସ ଅପହୃତ ନାବାଳକକୁ ସାଲିଆସାହିରୁ ଉଦ୍ଧାର କରିଥିଲା ଏବଂ ଅପହର୍ତ୍ତା ଧରମ ମାମୁ ଅଭିଷେକ ଦିଗଲ ଓରଫ୍ ସୋନୁ ନାୟକକୁ ଅଟକ ରଖିଥିଲା। ଆଜି ତାକୁ କୋର୍ଟ ଚାଲାଣ କରାଯାଇଛି ଏବଂ ଜାମିନ ନାମଞ୍ଜୁର ହେବା ପରେ ତାକୁ ବିଚାର ବିଭାଗୀୟ ହାଜତକୁ ପଠାଇଦିଆଯାଇଛି। ଧରମ ଭଉଣୀକୁ ବ୍ଲାକ୍ମେଲ୍ କରି ମନ୍ଦ ଉଦ୍ଦେଶ୍ୟ ସାଧନ କରିବା ପାଇଁ ଅଭିଯୁକ୍ତ ସୋନୁ ଏହି କାଣ୍ଡ ଭିଆଇଥିଲା ବୋଲି ପୁଲିସ ତଦନ୍ତରୁ ଜଣାପଡ଼ିଛି। ଆଜି ପୁଲିସ ସେବାଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ପୁଲିସ କମିସନର୍ ସୁରେଶ ଦେବଦତ୍ତ ସିଂ, ଅତିରିକ୍ତ ପୁଲିସ କମିସନର ନରସିଂହ ଭୋଳ ଓ ଡିସିପି ଜଗମୋହନ ମୀନା ଏହି ଅପହରଣ ପଛର ଗୁମର ଖୋଲିଛନ୍ତି।
ଜେଲ୍ ଗଲା ଧରମ ଭାଇ ସୋମୁ
ଜି.ଉଦୟଗିରି ଅଞ୍ଚଳର ଗରିତା ସିଂ ଓ ତାଙ୍କ ସ୍ବାମୀ ରାକେଶ ମଲ୍ଲିକଙ୍କ ମଧ୍ୟରେ ପାରିବାରିକ କଳହ ଲାଗିରହିଥିଲା। ତେଣୁ ପ୍ରାୟ ବର୍ଷକ ପୂର୍ବେ ଗରିତା ଦୁଇ ପିଲାଙ୍କୁ ଧରି ବେଙ୍ଗାଲୁରୁ ଯାଇ ଭଉଣୀ ଦୀକ୍ଷିତା ସିଂଙ୍କ ପାଖରେ ରହୁଥିଲେ। ସେଠାରେ ସିଲେଇ କାମ କରି ନିଜ ଗୁଜୁରାଣ ମେଣ୍ଟାଉଥିଲେ। ଏହି ସମୟରେ ସେଠାରେ ରାଜମିସ୍ତ୍ରି କାମ କରୁଥିବା ସୋନୁ ସହ ଗରିତାଙ୍କ ପରିଚୟ ହୋଇଥିଲା। ଗରିତା, ସୋନୁକୁ ଧରମ ଭାଇ କରିଥିଲେ। ବେଙ୍ଗାଲୁରୁରେ ୯ ମାସ ରହିବା ପରେ ଗରିତା ଓ ତାଙ୍କ ସ୍ବାମୀ ରାକେଶଙ୍କ ମଧ୍ୟରେ ପୁଣି ଉତ୍ତମ ସମ୍ପର୍କ ବଢ଼ିଥିଲା। ତେଣୁ ଗରିତା ଭୁବନେଶ୍ବର ଫେରିଆସି ରାକେଶଙ୍କ ସହ ଭୋଇନଗର ଅଞ୍ଚଳରେ ରହିଥିଲେ। ଗରିତା ଭୁବନେଶ୍ବର ଫେରିବା ପରେ ଧରମ ଭାଇ ସୋନୁ ସହ ସମ୍ପର୍କ କମିକମି ଯାଇଥିଲା। ୧୨ ତାରିଖ ଦିନ ସୋନୁ ଭୁବନେଶ୍ବର ଆସି ଗରିତାଙ୍କ ଘରକୁ ଯାଇଥିଲା। ତାଙ୍କୁ ବେଙ୍ଗାଲୁରୁ ଫେରିଯିବାକୁ ବୁଝାଇଥିଲା। ମାତ୍ର ଗରିତା ରାଜି ହୋଇନଥିଲେ। ସ୍ବାମୀଙ୍କୁ ଛାଡ଼ି ସେ ଆଉ ବାହାରକୁ ଯିବେ ନାହିଁ ବୋଲି ସିଧାସିଧା କହିଥିଲେ।
ଏଥିରେ ସୋନୁ ବ୍ୟଥିତ ହୋଇଥିଲା। ଯେମିତି ବି ହେଉ, ଗରିତାଙ୍କୁ ବେଙ୍ଗାଲୁରୁ ଫେରାଇ ନେଇ ନିଜ ପାଖରେ ରଖିବାକୁ ସେ ମନେମନେ ଯୋଜନା କରିଥିଲା। ମନ୍ଦ ଉଦ୍ଦେଶ୍ୟ ସାଧନ ପାଇଁ ଶେଷରେ ତା’ ମୁଣ୍ଡକୁ ମନ୍ଦ ବୁଦ୍ଧି ଜୁଟିଥିଲା। ପୁଅକୁ ଅପହରଣ କରି ମା’କୁ ବ୍ଲାକ୍ମେଲ୍ କରିବା ଲାଗି ସେ ଚିନ୍ତା କରିଥିଲା। ଯୋଜନା ମୁତାବକ ୧୩ ତାରିଖ ସକାଳେ ସେ ଭୋଇନଗର ଆସି ଛକି ରହିଥିଲା ଏବଂ ଗରିତାଙ୍କ ସାନ ପୁଅକୁ ସାଙ୍ଗରେ ନେଇ ପଳାଇଥିଲା। ମାମୁ ବୋଲି ଭଲ ଭାବେ ଜାଣିଥିବାରୁ ୪ବର୍ଷର ନାବାଳକ ସହଜରେ ସୋନୁ ସହ ଚାଲିଯାଇଥିଲା। ସୋନୁ, ନାବାଳକକୁ ନେଇ ସାଲିଆସାହିରେ ଲୁଚାଇ ରଖିଥିଲା ଏବଂ ଫୋନ୍ କରି ଗରିତାଙ୍କୁ ବ୍ଲାକ୍ମେଲ୍ କରିଥିଲା। ପୁଅକୁ ମୁଣ୍ଡଜାମିନ ରଖି ତାଙ୍କୁ ତା’ ସହିତ ବେଙ୍ଗାଲୁରୁ ଯିବା ପାଇଁ ବାଧ୍ୟ କରିଥିଲା। ତୁରନ୍ତ ରାକେଶ ଓ ଗରିତା ସହିଦନଗର ଥାନାର ଦ୍ବାରସ୍ଥ ହୋଇଥିଲେ। ଡିସିପି ଶ୍ରୀ ମୀନାଙ୍କ ନିର୍ଦ୍ଦେଶକ୍ରମେ ସ୍ପେସାଲ୍ ସ୍କ୍ବାଡ୍, ପିଓପିଡି ଓ ସହିଦନଗର ଥାନା ପୁଲିସକୁ ନେଇ ୪ଟି ଟିମ୍ ଗଠନ କରାଯାଇଥିଲା। ୩ ଘଣ୍ଟାର ଅପରେସନ୍ ପରେ ପୁଲିସ ସୋନୁ ନିକଟରେ ପହଞ୍ଚିଯାଇଥିଲା।