ଭୁବନେଶ୍ବର: ପଳାଶୁଣୀ ମେଗା ବର୍ଜ୍ୟ ପରିଚାଳନା କେନ୍ଦ୍ରରେ ପରୀକ୍ଷାମୂଳକ ବର୍ଜ୍ୟ ପ୍ରକ୍ରିୟାକରଣ ଆରମ୍ଭ ହୋଇଛି। ଶୁଭାରମ୍ଭ ସହ ପୂର୍ଣ୍ଣମାତ୍ରାରେ କାର୍ଯ୍ୟକ୍ଷମ ପୂର୍ବରୁ ପ୍ରକଳ୍ପ ଠିକ୍ ଭାବେ ପରିଚାଳିତ ହେଉଛି କି ନାହିଁ, କେଉଁଠି କିଛି ତ୍ରୁଟି ରହୁଛି କି, ତାର ପରୀକ୍ଷା କରାଯାଉଛି। ସହରର ଆବର୍ଜନା ବି ଏଠାକୁ ପ୍ରକ୍ରିୟାକରଣ ପାଇଁ ଯାଉଛି। ଅପରପକ୍ଷେ ନଡ଼ିଆ କତାରୁ ସାମଗ୍ରୀ ପ୍ରସ୍ତୁତି ପ୍ରକଳ୍ପ ବି ପରୀକ୍ଷାମୂଳକ ଆରମ୍ଭ ହୋଇଛି। ମହିଳାମାନେ ନଡ଼ିଆ ଚୋପାର ପ୍ରକ୍ରିୟାକରଣ କରି ଏଥିରୁ ପା’ପୋଛ ଓ ଅନ୍ୟାନ୍ୟ କତା ସାମଗ୍ରୀ ପ୍ରସ୍ତୁତ କରୁଛନ୍ତି। ଏତେ ବଡ଼ ପ୍ରକଳ୍ପକୁ ପୂର୍ଣ୍ଣ କାର୍ଯ୍ୟକ୍ଷମ ପୂର୍ବରୁ ଆମେ ପରୀକ୍ଷାମୂଳକ ଆବର୍ଜନା ପ୍ରକ୍ରିୟାକରଣ ଓ କତା ସାମଗ୍ରୀ ପ୍ରସ୍ତୁତି ଆରମ୍ଭ କରିଛୁ। ଖୁବଶୀଘ୍ର ପ୍ରକଳ୍ପର ଶୁଭାରମ୍ଭ କରାଯିବ ବୋଲି ଭୁବନେଶ୍ବର ମହାନଗର ନିଗମ ଅତିରିକ୍ତ କମିସନର୍ ଏନ୍. ଗଣେଶ ବାବୁ କହିଛନ୍ତି।
ଭୁବନେଶ୍ବର ମହାନଗର ନିଗମର ୬୭ଟି ୱାର୍ଡରୁ ଦୈନିକ ପ୍ରାୟ ୮୦୦ ମେଟ୍ରିକ୍ ଟନ୍ ବର୍ଜ୍ୟ ବାହାରୁଥିବାବେଳେ ଏଥିରୁ ପ୍ରାୟ ୧୯୪ ମେଟ୍ରିକ୍ ଟନ୍ ଓଦା ବର୍ଜ୍ୟ ଭୁବନେଶ୍ବର ମହାନଗର ନିଗମ ଅଞ୍ଚଳରେ ଥିବା ୩୭ଟି ସିଏମ୍ସି(ମାଇକ୍ରୋ କମ୍ପୋଷ୍ଟିଂ ସେଣ୍ଟର)ରେ ପ୍ରକ୍ରିୟାକରଣ ହେଉଛି। ସେହିଭଳି ୧୨୦ ମେଟ୍ରିକ୍ ଟନ୍ ଶୁଖିଲା ବର୍ଜ୍ୟ ୨୨ଟି ଏମ୍ଆର୍ଏଫ୍(ମ୍ୟାଟରିଆଲ୍ ରିକଭରି ଫାସିଲିଟି)ରେ ପ୍ରକ୍ରିୟାକରଣ ହେଉଛି। ଟିଟିଏସ୍(ଟେମ୍ପରାରି ଟ୍ରାଞ୍ଜିଟ୍ ଷ୍ଟେସନ୍)ଠାରେ ୩୪୦ ମେଟ୍ରିକ୍ ଟନ୍ ଆବର୍ଜନାର ପ୍ରକ୍ରିୟାକରଣ ହେଉଛି। କିନ୍ତୁ ଗତ କିଛି ବର୍ଷ ହେବ, ଗାଡ଼କଣ ଓ ସୈନିକ ସ୍କୁଲ ଟିଟିଏସ୍ ଓ ଏହାର ଆବର୍ଜନା ଭାର ବିଏମ୍ସିର ମୁଣ୍ଡବ୍ୟଥାର କାରଣ ପାଲଟିଛି। ଆଖପାଖ ଅଞ୍ଚଳରେ ଦୁର୍ଗନ୍ଧମୟ ପରିବେଶ ସହ ସଂକ୍ରମଣର ବାତାବରଣ ସୃଷ୍ଟି ହୋଇଛି। ଏ ନେଇ ବାରମ୍ବାର ଅଭିଯୋଗ ଓ ଆନ୍ଦୋଳନ ମୁଣ୍ଡ ଟେକିଛି। ଏଣୁ ଗାଡ଼କଣ ଓ ସୈନିକ ସ୍କୁଲ ଆବର୍ଜନାର ସ୍ଥାୟୀ ପ୍ରତିକାର ପାଇଁ ପଳାଶୁଣିଠାରେ ପ୍ରାୟ ୧୦ ଏକର ଜାଗାରେ ମେଗା ବର୍ଜ୍ୟ ପରିଚାଳନା ପ୍ରକଳ୍ପ(ଏମ୍ଆରଏଫ୍) କରାଯାଇଛି।
ଯୋଜନା ଅନୁଯାୟୀ, ଏହି ପ୍ରକଳ୍ପ ଜରିଆରେ ଦୈନିକ ସହରରୁ ନିର୍ଗତ ୧୫୦ ଟନ୍ ଶୁଖିଲା ବର୍ଜ୍ୟ ପ୍ରକ୍ରିୟାକରଣ ହେବ। ଦୁଇଟି ପର୍ଯ୍ୟାୟରେ ଏହି ପ୍ରକିୟାକରଣ କରାଯିବ। ୧୦ ହଜାର ନଡ଼ିଆର କତା ପ୍ରକ୍ରିୟାକରଣ କରି ସେଥିରୁ ଦଉଡ଼ି, ପାପୋଛ ଆଦି ଉତ୍ପାଦ ପ୍ରସ୍ତୁତ ହେବ। ଦୈନିକ ୨୦ ମେଟ୍ରିକ୍ ଟନ୍ ସବୁଜ ବର୍ଜ୍ୟ ପ୍ରକ୍ରିୟାକରଣ କରାଯାଇ ସେଥିରୁ ବ୍ରିକେଟ୍(ଦାହ୍ୟ ପଦାର୍ଥ) ପ୍ରସ୍ତୁତ ହେବ। ଘଣ୍ଟାପ୍ରତି ୫୦୦ କିଲୋଗ୍ରାମ ପ୍ଲାଷ୍ଟିକ(ନିମ୍ନମାନ) ପ୍ରକ୍ରିୟାକରଣ କରି ସେଥିରୁ ପେଭର୍ ବ୍ଲକ ପ୍ରସ୍ତୁତ କରିବାର ବ୍ୟବସ୍ଥା ବି କରାଯିବ। ଏ ଭିତରେ ପ୍ରକଳ୍ପ ନିର୍ମାଣ ଓ ଯନ୍ତ୍ରାଂଶ ସ୍ଥାପନରେ ୩୨.୦୭ କୋଟି ଖର୍ଚ୍ଚ ସରିଲାଣି। ଏଥିରୁ କୋଠା ଓ ଅନ୍ୟାନ୍ୟ ନିର୍ମାଣ ବାବଦରେ ୨୩.୨୬ କୋଟି ଏବଂ ଯନ୍ତ୍ରାଂଶ କ୍ରୟ ଓ ଅନ୍ୟାନ୍ୟ ମେକାନିକାଲ୍ କାମରେ ୮.୮୧ କୋଟି ଟଙ୍କା ଖର୍ଚ୍ଚ ହୋଇଛି। କିନ୍ତୁ ଅଦ୍ୟାବଧି ପ୍ରକଳ୍ପ ଶୁଭାରମ୍ଭ ହୋଇନଥିଲା କି କାର୍ଯ୍ୟକ୍ଷମ ହୋଇନଥିଲା। ଯାହାକୁ ନେଇ ବିବାଦ ବି ମୁଣ୍ଡ ଟେକିଥିଲା। ନିକଟରେ କିଛି ସଂଗଠନ ପ୍ରକଳ୍ପ ଭିତରେ ଧସେଇ ପଶି ଜୋର ଜବରଦସ୍ତ ଏହାର ଶୁଭାରମ୍ଭ କରିଥିଲେ। କଥା ଥାନାକୁ ଯାଇଥିଲେ ବି ପ୍ରକଳ୍ପ ସରକାରୀ ଭାବେ ଶୁଭାରମ୍ଭ ହୋଇପାରିନି। ମୁଖ୍ୟମନ୍ତ୍ରୀ ଓ ଅନ୍ୟ ମାନ୍ୟଗଣ୍ୟ ଅତିଥିଙ୍କ ଉପସ୍ଥିତିରେ ପ୍ରକଳ୍ପ ଶୁଭାରମ୍ଭ କରିବାକୁ ଭୁବନେଶ୍ବର ମହାନଗର ନିଗମ ଯୋଜନା କରିଛି। ଅତିରିକ୍ତ କମିସନର୍ ଶ୍ରୀ ବାବୁ କହିଛନ୍ତି, ଆମେ ଦେଢ଼ଶହ ଟନ୍ ଶୁଖିଲା ବର୍ଜ୍ୟ ପ୍ରକ୍ରିୟାକରଣ ପାଇଁ ଯୋଜନା କରିଥିଲେ ବି ଏବେ ଅଳ୍ପ କିଛି ଶୁଖିଲା ବର୍ଜ୍ୟ ପ୍ରକ୍ରିୟାକରଣ କରୁଛୁ। ଅଳିଆ ଗାଡ଼ି ବି ଏଠାରେ ଆସି ଅଳିଆ ପକାଉଛି। ସ୍ବଚ୍ଛ କର୍ମଚାରୀ ବି ନିୟୋଜିତ ଅଛନ୍ତି। ମହିଳାମାନେ କତା ସାମଗ୍ରୀ ପ୍ରସ୍ତୁତ ପାଇଁ ନିୟୋଜିତ ଅଛନ୍ତି।