ଭୁବନେଶ୍ବର: ସବୁ ମଣିଷ ସାଧାରଣତଃ ସମୟ ସ୍ରୋତର ବିପରୀତ ଦିଗରେ ଯାଆନ୍ତି ନାହିଁ। ମାତ୍ର ବିପ୍ଳବୀ ଚକ୍ରଧର ଥିଲେ ଭିନ୍ନ। କନିକା ରାଜ ପରିବାରର ଆକ୍ରୋଶର ଶିକାର ହେବା ସତ୍ତ୍ବେ ବିପ୍ଳବୀ ଚକ୍ରଧର ହାର ମାନିନଥିଲେ। ଏହି ଅତ୍ୟାଚାରକୁ ନିଜର ଶକ୍ତି ଭାବେ ବ୍ୟବହାର କରି କନିକା କ୍ରାନ୍ତିର ମହାନାୟକ ସାଜିଥିଲେ। ଦେଶ ସ୍ବାଧୀନତା ଲାଗି ବିପ୍ଳବୀ ଚକ୍ରଧରଙ୍କ ଅବଦାନ ସବୁବେଳେ ସ୍ମରଣୀୟ ହୋଇରହିବ। ଜୟଦେବ ଭବନରେ ଆୟୋଜିତ ମହାନ ବିପ୍ଳବୀ ଚକ୍ରଧର ବେହେରାଙ୍କ ରାଜ୍ୟସ୍ତରୀୟ ଜୟନ୍ତୀ ଉତ୍ସବରେ ଯୋଗଦେଇ ଅତିଥିମାନେ ଏହା କହିଛନ୍ତି।
ସୂଚନା ଓ ଲୋକସମ୍ପର୍କ ବିଭାଗ ଏବଂ ଚକ୍ରଧର ବେହେରା ସ୍ମୃତି ପରିଷଦ, ଘଣ୍ଟେଶ୍ବରର ମିଳିତ ସହଯୋଗରେ ଅନୁଷ୍ଠିତ ଏହି ସମା ରୋହରେ ମୁଖ୍ୟବକ୍ତା ଭାବେ ଯୋଗଦେଇ ବିଶିଷ୍ଟ କଥାକାର ଗୌରହରି ଦାସ କହିଲେ, ଅତ୍ୟଧିକ କର ଆଦାୟ ଯୋଗୁ କନିକା ପ୍ରଜାମାନେ ଅତ୍ୟାଚାରିତ ହେଉଥିଲେ। ରାଜାଙ୍କ ହିସାବ ରକ୍ଷକ ଭାବରେ କାର୍ଯ୍ୟରତ ଚକ୍ରଧର ପଦବିରୁ ଇସ୍ତଫା ଦେଇ ରାଜାଙ୍କ ବିରୋଧରେ ଆନ୍ଦୋଳନ ସଂଗଠିତ କରିଥିଲେ। କନିକା ପ୍ରଜା ଆନ୍ଦୋଳନ ପାଇଁ ପଣ୍ଡିତ ଗୋପବନ୍ଧୁ ଦାସ, ପଣ୍ଡିତ ନୀଳକଣ୍ଠ ଦାସଙ୍କ ସହିତ ସେ ମଧ୍ୟ କାରାବରଣ କରିଥିଲେ। ଏହି ମହାନ ବ୍ୟକ୍ତିତ୍ୱଙ୍କ ବିଷୟରେ ଆଗାମୀ ପିଢ଼ି ଜାଣିବା ନିହାତି ଆବଶ୍ୟକ ବୋଲି ଶ୍ରୀ ଦାସ ମତ ଦେଇଥିଲେ।
ସୂଚନା ଓ ଲୋକସମ୍ପର୍କ ବିଭାଗ ନିର୍ଦ୍ଦେଶକ ଅନୁଜ କୁମାର ଦାସ କହିଲେ, ବିପ୍ଳବୀ ଚକ୍ରଧର ଥିଲେ ଜଣେ ସାଲିସ ବିହୀନ କ୍ରାନ୍ତିକାରୀ ପୁରୁଷ। ତାଙ୍କ ଜୀବନ ଦର୍ଶନ ପ୍ରତ୍ୟେକଙ୍କ ପାଇଁ ପ୍ରେରଣାର ଉତ୍ସ ହୋଇ ରହିବ। ବିଭାଗୀୟ ନିର୍ଦ୍ଦେଶକ(ବୈଷୟିକ) ଗୁର୍‌ବୀର ସିଂହ ସ୍ବର୍ଗତ ବେହେରାଙ୍କ ସ୍ମୃତିଚାରଣ କରିଥିଲେ। ସ୍ବର୍ଗତ ବେହେରାଙ୍କ ନାତି ତଥା ଚକ୍ରଧର ବେହେରା ସ୍ମୃତି ସଂସଦର ସହସମ୍ପାଦକ ପ୍ରଭାକର ପରିଡ଼ା ଅତିଥିମାନଙ୍କୁ ସମ୍ବର୍ଦ୍ଧିତ କରିଥିଲେ। ଅନ୍ୟମାନଙ୍କ ମଧ୍ୟରେ ଦିଲୀପ କୁମାର ଦାସ, କାଶୀନାଥ ମହାପାତ୍ର, ସୁରେନ୍ଦ୍ର ମାହୁନ୍ତ, ସ୍ବପ୍ନଶ୍ରୀ ମାହୁନ୍ତ, ଅଭିରାମ ବିଶ୍ବାଳ, ସମ୍ପଦ ପଟ୍ଟନାୟକ, ଭାସ୍କର ଚନ୍ଦ୍ର ସେଠୀ, ସୀତେଶ ତ୍ରିପାଠୀ, ଅମିତାଭ ଖିଲାର ପ୍ରମୁଖ ଉପସ୍ଥିତ ଥିଲେ। ଉପନିର୍ଦ୍ଦେଶକ (କ୍ଷେତ୍ର) ସୁଚେତା ପ୍ରିୟଦର୍ଶିନୀ ଧନ୍ୟବାଦ ଦେଇଥିଲେ। ପୂର୍ବାହ୍ନରେ ରାଜଭବନ ଛକ ନିକଟସ୍ଥ ବିପ୍ଳବୀ ଚକ୍ରଧରଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରାଯାଇଥିଲା।