ଆଖି ବୁଜିଲା ଆକାଶ: ନନ୍ଦନକାନନକୁ ଦେଇପାରିନି ସନ୍ତାନ

ବାରଙ୍ଗ: ନନ୍ଦନକାନନ ପ୍ରାଣୀ ଉଦ୍ୟାନର ଅନ୍ୟତମ ବୁଢ଼ା ସିଂହ ‘ଆକାଶ’ ଆଜି ଆଖି ବୁଜିଛି। ମୃତ୍ୟୁ ବେଳକୁ ତାକୁ ପାଖାପାଖି ୧୭ ବର୍ଷ ବୟସ ହୋଇଥିଲା। କିଛି ଦିନ ହେଲା ସେ ବାର୍ଦ୍ଧକ୍ୟଜନିତ ଅସୁସ୍ଥତାର ଶିକାର ହୋଇ ଚିକିତ୍ସାଧୀନ ଥିଲା। ସ୍ନାୟବିକ ଅସୁସ୍ଥତାରୁ ସେ ପକ୍ଷାଘାତରେ ପୀଡ଼ିତ ଥିଲା ଏବଂ ପଛ ଗୋଡ଼ ଅଚଳ ହୋଇପଡ଼ିଥିବାରୁ ସେ ଘୋଷ‌ାରି ହୋଇ ଚାଲୁଥିଲା। ତେଣୁ ତାକୁ ଖାଦ୍ୟଗ୍ରହଣ କକ୍ଷରେ ରଖି ଭିଟାମିନ୍‌ ଓ ରୋଗ ପ୍ରତିଷେଧକ ଔଷଧ ଦିଆଯାଉଥିଲା। ଖାଦ୍ୟରେ କେବଳ ଅଣ୍ଡା ଓ କୁକୁଡ଼ା ମାଂସ ଗୁଣ୍ଡ ଦିଆଯାଉଥିଲା। ଦୁଇ ଦିନ ହେଲା ସେ ଆହାର ଛାଡ଼ିଦେଇଥିଲା। ଆଜି ବ୍ୟବଚ୍ଛେଦ କରାଯିବା ପରେ ତା’ର ମୃତଦେହକୁ ପୋଡ଼ି ଦିଆଯାଇଛି। ଆକାଶ ଥିଲା ବର୍ଣ୍ଣସଙ୍କର(ହାଇବ୍ରିଡ୍‌) ଜାତୀୟ ସିଂହ। ୨୦୧୪ ମସିହାରେ ତାକୁ ବେଙ୍ଗାଲୁରୁସ୍ଥିତ ବନେରୁଘାଟା ଚିଡ଼ିଆଖାନାରୁ ନନ୍ଦନକାନନ ଅଣାଯାଇଥିଲା। ସେତେବେଳକୁ ଆକାଶର ବୟସ ପାଖାପାଖି ୫ ବର୍ଷ ଥିଲା ଏବଂ ସେ ପ୍ରାପ୍ତବୟସ୍କ ହୋଇସାରିଥିଲା। 

ସେତେବେଳେ ତା’ ସହିତ ଆଉ ତିନି ସିଂହ ନରସିଂହା, ରାଧା ଓ ରୁକ୍ମିଣୀ ମଧ୍ୟ ନନ୍ଦନକାନନର ଅତିଥି ହୋଇଥିଲେ। ଏହି ଚାରି ସିଂହଙ୍କ ପାଇଁ ନନ୍ଦନକାନନ ସିଂହ ସଫାରି ପୂରି ଉଠିଥିଲା। ସିଂହ ପ୍ରଜନନ ତଥା ବଂଶବୃଦ୍ଧି ପାଇଁ ନନ୍ଦନକାନନ ପରିବେଶ ବେଶ୍ ଅନୁକୂଳ ଥିବାରୁ ଏହି ଚାରି ସିଂହଙ୍କୁ ଏଠାକୁ ଅଣାଯାଇଥିଲା। ମାତ୍ର ଆକାଶ କ୍ଷେତ୍ରରେ ଦେଖାଯାଇଥିଲା ବିଡ଼ମ୍ବନା। ତା’ ଜୀବନ କାଳ ଭିତରେ ସେ ନନ୍ଦନକାନନକୁ ଗୋଟିଏ ବି ସନ୍ତାନ ଦେଇପାରିନାହିଁ। ପୂର୍ବରୁ ନନ୍ଦନକାନନରେ ଥିବା ସୁପ୍ରିୟା ଭଳି ସିଂହୀଙ୍କ ସହ ଆକାଶର ମିଳନ ହୋଇଛି। ମାତ୍ର ଆକାଶର ଔରସରୁ ସେମାନେ ଗର୍ଭବତୀ ହୋଇପାରିନଥିଲେ। ସମପ୍ରଜାତିର ହୋଇଥିଲେ ହେଁ ପରେ ତାକୁ ରାଧା ସହ ବି ମିଶିବାକୁ ସୁଯୋଗ ଦିଆଗଲା। ମାତ୍ର ରାଧା ବି ଗର୍ଭବତୀ ହୋଇପାରିଲା ନାହିଁ। ରାଧା ଓ ସୁପ୍ରିୟା ଭଳି ସିଂହୀମାନେ ଅନ୍ୟ ସିଂହଙ୍କ ଔରସରୁ ଗର୍ଭଧାରଣ କରିଥିଲେ ହେଁ ଆକାଶ ସେଥିରେ ସଫଳ ହୋଇନଥିଲା। ତେଣୁ ବିନା ସନ୍ତକରେ ଆଜି ସେ ସବୁଦିନ ପାଇଁ ଆଖି ବୁଜିଛି। ନନ୍ଦନକାନନରେ ତା’ର କିଛି ବି ସ୍ମୃତି ରହିପାରିଲା ନାହିଁ। ଆକାଶର ମୃତ୍ୟୁ ପରେ ଏବେ ୧୩ ସିଂହ ଓ ୯ ସିଂହୀଙ୍କୁ ମିଶାଇ ନନ୍ଦନକାନନରେ ୨୨ଟି ସିଂହ ଅଛନ୍ତି। ସେଥିରେ ହାଇବ୍ରିଡ୍‌ ସିଂହ ସଂଖ୍ୟା ୬ ବୋଲି କୁହାଯାଇଛି।