ମୂଳ ଲେଖାର ଭାବାର୍ଥ ଠିକ୍ ହେଲେ ଅନୁବାଦ ସାର୍ଥକ ହୁଏ: ଧର୍ମେନ୍ଦ୍ର

ଭୁବନେଶ୍ୱର: ସାହିତ୍ୟରୁ ସଂସ୍କାର ଆସେ ଏବଂ ପ୍ରଖ୍ୟାତ ସାହିତ୍ୟିକ ମହାପାତ୍ର ନୀଳମଣି ସାହୁ ଓ ଗୁରୁ ପ୍ରସାଦ ମହାପାତ୍ର ତାହାର ଜ୍ୱଳନ୍ତ ଉଦାହରଣ ବୋଲି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି। ଆଜି ନୂଆଦିଲ୍ଲୀ ଠାରେ ଗୁରୁପ୍ରସାଦ ମହାପାତ୍ର ଫାଉଣ୍ଡେସନ୍ ପକ୍ଷରୁ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ସ୍ୱର୍ଗତ ଗୁରୁପ୍ରସାଦ ମହାପାତ୍ରଙ୍କ ଦ୍ୱାରା ସଂକଳିତ ‘ମହାପାତ୍ର ନୀଳମଣି ସାହୁଙ୍କ ସ୍ମରଣୀୟ ଗଳ୍ପ’ର ଇଂରାଜୀ ଏବଂ ହିନ୍ଦୀ ଅନୁବାଦିତ ପୁସ୍ତକକୁ ଉନ୍ମୋଚନ କରି ଶ୍ରୀ ପ୍ରଧାନ କହିଛନ୍ତି ଯେ ଓଡ଼ିଆ ଜନଜୀବନରେ ସାହିତ୍ୟ ସୃଜନ ଅନନ୍ୟ। ଏହି ସାହିତ୍ୟରେ ମହାପାତ୍ର ନୀଳମଣି ସାହୁ ଓ ସ୍ୱର୍ଗତ ଗୁରୁ ପ୍ରସାଦ ମହାପାତ୍ରଙ୍କ ଅନେକ ଯୋଗଦାନ ରହିଛି। ମହାପାତ୍ର ନୀଳମଣି ସାହୁଙ୍କ ଲେଖା ଜୀବନ୍ତ ଥିବା ଭଳି ମନେହୁଏ। ସେ ସମାଜକୁ ଜାଣିବା, ସମାଜକୁ ବୁଝିବା ସହ ସମାଜକୁ ବର୍ଣ୍ଣନା କରିବାର ଶୈଳୀକୁ ଭଲ ଭାବରେ ବୁଝିଥିଲେ। ତାଙ୍କର ଲେଖାକୁ କଳ୍ପନା କରିବା ଅସମ୍ଭବ। ତାଙ୍କ ସାହିତ୍ୟରୁ ପ୍ରେରଣା ମିଳିଥାଏ।

ଏହାସହ ଶ୍ରୀ ପ୍ରଧାନ କହିଥିଲେ ଯେ ଯେତେବେଳେ ମୂଳ ଲେଖାର ଭାବାର୍ଥ ଅନୁବାଦରେ ଠିକ୍ ହୋଇଥାଏ ସେତେବେଳେ ଅନୁବାଦ ସାର୍ଥକ ହୁଏ। ଭାରତୀୟ ଭାଷା ସେବେ ଆଗକୁ ବଢିବ ଯେତେବେଳେ ଯେ କୌଣସି ଆଞ୍ଚଳିକ ଭାଷାରେ ପ୍ରସ୍ତୁତ ହୋଇଥିବା ପୁସ୍ତକର ଭାବାର୍ଥ ଠିକ୍ ହେବ ଏବଂ ତାହାକୁ ଦେଶ ପଢ଼ିବ। ଏକ ଭାରତ, ଶ୍ରେଷ୍ଠ ଭାରତ ବାସ୍ତବ ରୂପ ନେବ। ଏହା ହିଁ ଲେଖକଙ୍କ ପ୍ରତି ଉଚିତ୍ ଶ୍ରଦ୍ଧାଞ୍ଜଳି ହେବ। ଆଜି ଉନ୍ମୋଚିତ ହୋଇଥିବା ଅନୁବାଦିତ ପୁସ୍ତକ ପାଠକଙ୍କ ମଧ୍ୟରେ ଆଦୃତ ହେବା ସହ ଭାରତର ସାରସ୍ୱତ ଜଗତରେ ସହାୟକ ହେବ ବୋଲି ସେ କହିଛନ୍ତି। ଏହି ଅବସରରେ ଶ୍ରୀ ପ୍ରଧାନ ଏହି ପୁସ୍ତକକୁ ଇଂରାଜୀ ଭାଷାରେ ଅନୁବାଦ କରିଥିବା ସାହିତ୍ୟିକ ମୋନାଲିସା ଜେନା ଏବଂ ହିନ୍ଦୀ ଭାଷାରେ ଅନୁବା‌ଦ କରିଥିବା ସୁଜାତା ଶିବେନ ଏବଂ ସହଯୋଗୀ କେନ୍ଦ୍ର ସାହିତ୍ୟ ଏକାଡେମିକୁ ଧନ୍ୟବାଦ ଜଣାଇଥିଲେ।