ଡଷ୍ଟ୍‌ବିନ୍‌ ନାହିଁ, ରାସ୍ତାରେ ପଡ଼ୁଛି ଅଳିଆ

ଭୁବନେଶ୍ୱର: ଗଳିରେ ପଶିଲା ମାତ୍ରେ ପଚାଗନ୍ଧ ସ୍ୱାଗତ କରୁଛି। ସ୍ଥାନେ ସ୍ଥାନେ ପ୍ଲାଷ୍ଟିକ୍‌ ଉପକରଣ, ଜରି, ଖଲି, ଠୁଙ୍ଗା ଗଦା ହୋଇରହିଛି। ପଚା ପନିପରିବା ଓ ଫଳ ଜମା ହୋଇରହିଛି। ରାଜଧାନୀକୁ ଡଷ୍ଟବିନ୍‌ମୁକ୍ତ ସହର କରିବା ପାଇଁ ବିଏମ୍‌ସି ପକ୍ଷରୁ ମାଳମାଳ ପଦକ୍ଷେପ ନିଆଯାଉଥିବା ବେଳେ ସଚେତନତା ଓ କାର୍ଯ୍ୟନୁଷ୍ଠାନ ଅଭାବରୁ ସହରର ବିଭିନ୍ନ ସ୍ଥାନରେ ଅଳିଆ ଗଦା ହୋଇ ଲୋକଙ୍କୁ ଅତିଷ୍ଠ କଲାଣି। ମୁଖ୍ୟ ରାସ୍ତାରୁ ଗାଡ଼ି ଆସି ଅଳିଆ ଉଠାଇ ନେଇଯାଉଥିବା ବେଳେ ଗଳି ରାସ୍ତାଗୁଡ଼ିକରେ ଆବର୍ଜନା ମାସେ ମାସେ ଧରି ପଡ଼ିରହୁଛି। ଘରୁ ଆବର୍ଜନା ନେଉଥିବା ଗାଡ଼ି ଓ ରାସ୍ତା ସଫା କରୁଥିବା ଗାଡ଼ି ମଧ୍ୟରେ ସମନ୍ୱୟ ଅଭାବ ଓ ଆବର୍ଜନା ପକାଉଥିବା ଅନୁଷ୍ଠାନ ତଥା ଲୋକଙ୍କ ଉପରେ କାର୍ଯ୍ୟନୁଷ୍ଠାନ ଅଭାବରୁ ଆବର୍ଜନା ଗଦା ହୋଇରହୁଛି। ସଫେଇ ଗାଡ଼ି ସମୟ ଅନୁସାରେ ସକାଳ ଆସୁଥିବାରୁ କିଛି ଲୋକ ଅବହେଳା କରି ଠିକ୍‌ ସମୟରେ ଆବର୍ଜନା ନ ଦେଇ ରାସ୍ତାରେ ଗଦା କରିଦେଉଛନ୍ତି। ରାଜଧାନୀର ଖାରବେଳନଗର, ବାପୁଜୀନଗର, ଲିଙ୍ଗିପୁର, ଏକ ନମ୍ୱର ଅଞ୍ଚଳ, ସହିଦନଗର, ସତ୍ୟନଗର ସମେତ ବିଭିନ୍ନ ମାର୍କେଟ ଯେପରିକି ଏକ ନମ୍ୱର ମାର୍କେଟ, ଚାରି ନମ୍ୱର ମାର୍କେଟ ଆଦି ସ୍ଥାନରେ ଆବର୍ଜନା ଗଦା ହୋଇରହୁଛି।

ଖାରବେଳନଗର ଅଞ୍ଚଳରେ ଆବର୍ଜନା ଗଦା ହୋଇରହି ଥିବାରୁ ଆହାର କେନ୍ଦ୍ରକୁ ଗଲା ବେଳେ ଲୋକଙ୍କୁ ନାକରେ ହାତ ଧରି ଯିବାକୁ ପଡ଼ୁଛି। ସାଧାରଣ ଲୋକଙ୍କଠାରୁ ଆରମ୍ଭ କରି ବ୍ୟବସାୟିକ ପ୍ରତିଷ୍ଠାନ ଆଦି ସ୍ଥାନେ ସ୍ଥାନେ ଆବର୍ଜନା ଗଦା କରି ଦେଉଛନ୍ତି। ହେଲେ କୌଣସି କାର୍ଯ୍ୟନୁଷ୍ଠାନ ନିଆଯାଉନାହିଁ। ତେବେ ଏନେଇ କର୍ପୋରେଟର୍‌ କବିତା ସ୍ୱାଇଁଙ୍କ କହିବା ଅନୁଯାୟୀ ସେ ଏନେଇ ଅଭିଯୋଗ କରିଛନ୍ତି। ଲୋକଙ୍କୁ ସଚେତନ ମଧ୍ୟ କରୁଛନ୍ତି ହେଲେ କିଛି ଅମାନିଆ ରାସ୍ତା କଡ଼ରେ ଆବର୍ଜନା ପକାଉଛନ୍ତି। ସେହିପରି ଏକ ନମ୍ୱର ହାଟ ସମେତ ଅଞ୍ଚଳର ବିଭିନ୍ନ ସ୍ଥାନରେ ଆବର୍ଜନା ଗଦା ହୋଇରହୁଛି। ଏନେଇ କର୍ପୋରେଟର୍‌ ଆସିଆ ବେଗମ୍‌ଙ୍କ କହିବା ଅନୁଯାୟୀ ପ୍ରତିଦିନ ସଫା ହେଉଛି। ଅଭିଯୋଗ ଆସିବା ମାତ୍ରେ ତୁରନ୍ତ କାର୍ଯ୍ୟନୁଷ୍ଠାନ ନେବା 
ସହିତ ଜନସଚେତନା କରାଯାଉଛି।