ଶ୍ରାବଣ ମାସର ତୃତୀୟ ସୋମବାର: ଜଳଲାଗି କଲେ ୧୫ହଜାର ଭକ୍ତ

ପୁରୁଣା ଭୁବନେଶ୍ବର: ପ୍ରତିକୂଳ ପାଗ ସତ୍ତ୍ବେ ହଜାର ହଜାର ଶିବଭକ୍ତ ଦେବଦେବ ମହାଦେବଙ୍କ ପୂଜାର୍ଚ୍ଚନା କରି ଆଶୀର୍ବାଦ ଭିକ୍ଷା କରିଥିଲେ। ଭକ୍ତଙ୍କ ସୁବିଧା ପାଇଁ ମନ୍ଦିର କାର୍ଯ୍ୟାଳୟ ପକ୍ଷରୁ ସମସ୍ତ ସୁବିଧା ସହ କମିସନରେଟ୍‌ ପୁଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା। ଅପରାହ୍ନ ୩ଟା ପର୍ଯ୍ୟନ୍ତ କାଉଡ଼ିଆଙ୍କ ଭିଡ଼ ଦେଖିବାକୁ ମିଳିଥିଲା। 

ଆଜି ଲିଙ୍ଗରାଜ ମନ୍ଦିର ସହ ବିଭିନ୍ନ ଶିବମନ୍ଦିରରେ ୧୫ହଜାର ଭକ୍ତ ଜଳଲାଗି କରିଛନ୍ତି। ଆଜି ଶ୍ରାବଣ ମାସର ତୃତୀୟ ସୋମବାର ପାଇଁ ଭୋର ୩ଟାରେ ମନ୍ଦିର ଦ୍ବାର ଖୋଲା ଯାଇଥିଲା। ଭୋର ୩ଟା ୩୦ରେ ମଙ୍ଗଳଆଳତି ଓ ଅବକାଶ ପୂଜା ସମ୍ପନ୍ନ ହେବା ପରେ ସାହାଣମେଲା ଦର୍ଶନ ଆରମ୍ଭ ହୋଇଥିଲା। ୩ଟା ୪୫ ବେଳକୁ ସିଂହଦ୍ବାର ସମ୍ମୁଖରେ ଅପେକ୍ଷାରତ କାଉଡ଼ିଆମାନଙ୍କୁ ପ୍ରଥମେ ଜଳଲାଗି ପାଇଁ ଧାଡ଼ିରେ ଛିଡ଼ା କରାଯାଇଥିଲା ପ୍ରଭୁ ଲିଙ୍ଗରାଜଙ୍କୁ ଦର୍ଶନ ପାଇଁ ସାଧାରଣ ଶ୍ରଦ୍ଧାଳୁ ମଧ୍ୟ ‌ବଡ଼ିଭୋର୍‌ରୁ ମନ୍ଦି‌ରରେ ପହଞ୍ଚିଥିଲେ। ସାହାଣମେଲା ଦର୍ଶନ ଥିବାରୁ ଭକ୍ତମାନେ ଗର୍ଭଗୃହକୁ ଯାଇ ପୂଜାର୍ଚ୍ଚନା କରିଥିଲେ। ଦର୍ଶନ ପରେ ଉତ୍ତରଦ୍ବାର ଦେଇ ଭକ୍ତମା‌ନେ ପ୍ରସ୍ଥାନ କରିଥିଲେ। ଦିନ ୧୨ଟା ପର୍ଯ୍ୟନ୍ତ ସାହାଣମେଲା ଦର୍ଶନ ହୋଇଥିଲା। 

ଗତକାଲି ସନ୍ଧ୍ୟାରୁ ମନ୍ଦିର ପରିସରରେ କାଉଡ଼ିଆମାନେ ଜଳଲାଗି କରିବା ପାଇଁ ପହଞ୍ଚିଥିଲେ। ପ୍ରଶାସନ ପକ୍ଷରୁ ଉଭୟ ମହିଳା ଓ ପୁରୁଷଙ୍କ ପାଇଁ ମନ୍ଦିର ସମ୍ମୁଖରେ ଅସ୍ଥାୟୀ ଆଶ୍ରୟସ୍ଥଳ ନିର୍ମାଣ କରାଯାଇଥିଲା। ଶୃଙ୍ଖଳିତ ଦର୍ଶନ ପାଇଁ ସିଂହଦ୍ୱାର ସମ୍ମୁଖ ଗଙ୍ଗାଯମୁନା ମନ୍ଦିର ଠାରୁ ବ୍ୟାରିକେଡ୍‌ କରାଯାଇଥିଲା। ତେଣୁ ପ୍ରଭୁ ଲିଙ୍ଗରାଜଙ୍କୁ ଜଳଲାଗି କରିବା ପାଇଁ ରାତିଅଧରୁ କାଉଡ଼ିଆମାନେ ଏହି ବ୍ୟାରିକେଡ୍‌ରେ ଛିଡ଼ା ହୋଇ ରହିଥିଲେ। କିଛି କାଉଡ଼ିଆ ଭୋର୍‌ରୁ ବିନ୍ଦୁସାଗରରୁ ଜଳ ଆଣି ଲିଙ୍ଗରାଜଙ୍କୁ ଜଳଲାଗି କରିଥିଲେ। ବହୁ ମହିଳା ଭକ୍ତ ଥିବାରୁ ସୁରକ୍ଷାକୁ ଦୃଷ୍ଟିରେ ରଖି ପୁଲିସ ମୁତୟନ କରାଯାଇଥିଲା। ମନ୍ଦିର କାର୍ଯ୍ୟାଳୟ, ଭାରତୀୟ ପ୍ରତ୍ନତାତ୍ତ୍ବିକ ସର୍ବେକ୍ଷଣ ସଂସ୍ଥା(ଏଏସ୍‌ଆଇ), ବିଏମ୍‌ସି, ପୂର୍ତ୍ତ ବିଭାଗ, କମିସନରେଟ୍‌ ପୁଲିସ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଥିଲା। ସୁରକ୍ଷା ପାଇଁ ଶ୍ରୀଲିଙ୍ଗରାଜ ଥାନା ପୁଲିସ ସହ ୫ ପ୍ଲାଟୁନ୍‌ ଫୋର୍ସ ମୁତୟନ କରାଯାଇଥିଲା। ଶ୍ରୀଲିଙ୍ଗରାଜ ମନ୍ଦିର ବ୍ୟତୀତ ଏକାମ୍ର କ୍ଷେତ୍ରର ତୀର୍ଥେଶ୍ବର, ନାଗେଶ୍ବର, ଯମେଶ୍ବର, କୁକୁଟେଶ୍ବର, ଖରାଖିଆ ବୈଦ୍ୟନାଥ, ଡାକରା ବିଭୀଷଣେଶ୍ବର, ତାଳେଶ୍ବର, ପୂର୍ବେଶ୍ବର, ମୈତ୍ରେଶ୍ବର, ସିଦ୍ଧେଶ୍ବର, ଭାସ୍କରେଶ୍ବର, ଚିନ୍ତାମଣିଶ୍ୱର, ଅଲାବୁକେଶ୍ବର, କେଦାରେଶ୍ବର, ଉତ୍ତରେଶ୍ବର, ବେଲେଶ୍ବର, ଭୀମେଶ୍ବର ମନ୍ଦିରରେ କାଉଡ଼ିଆମାନେ ଜଳଲାଗି କରିଛନ୍ତି।