ଭୁବନେଶ୍ବର: ପତ୍ନୀକୁ ମାନସିକ ଓ ଶାରୀରିକ ଆଘାତ ଦେବା ସହ ବନ୍ଧୁକ ଦେଖାଇ ହତ୍ୟା କରିବାକୁ ଧମକ ଦେବାକୁ କେନ୍ଦ୍ର କରି ନୂଆପଲ୍ଲୀ ପୁଲିସ ଆଜି ଅଭିଯୁକ୍ତ ସ୍ବାମୀକୁ ଗିରଫ କରିଛି। ଅଭିଯୁକ୍ତ ହେଉଛି, ନୂଆପଲ୍ଲୀ ବେହେରା ସାହିର ବାବନ ଓରଫ ବାସୁଦେବ ସାହୁ(୩୪)। ପୁଲିସ ବାବନଠାରୁ ଏକ ଦେଶୀ ବନ୍ଧୁକ ମଧ୍ୟ ଜବତ କରିଛି। ବାସୁଦେବଙ୍କ ପତ୍ନୀ ଶୁଭଶ୍ରୀଙ୍କ ଅଭିଯୋଗ ଅନୁଯାୟୀ, ତାଙ୍କ ସ୍ବାମୀ ବିବାହର ଦୁଇବର୍ଷ ପରେ ତାଙ୍କୁ ବିଭିନ୍ନ ସମୟରେ ମାଡ଼ ମାରିବା ସହିତ ନିର୍ଯାତନା ଦେଉଥିଲେ। ଏବେ କିଛିଦିନ ହେଲା ନିର୍ଯାତନା ଅସହ୍ୟ ହୋଇଥିଲା। ଏପରିକି ବନ୍ଧୁକ ଦେଖାଇ ହତ୍ୟା ଧମକ ଦେବାରୁ ସେ ବାଧ୍ୟ ହୋଇ ଏ ନେଇ ପୁଲିସରେ ଅଭିଯୋଗ କରିଥିଲେ।