ଘରେ ପଶି ଲୁଟି ନେଇଥିଲେ ମନି ପର୍ସ, ଜେଲଗଲେ ୩ ଲୁଟେରା
ଧଉଳି: ଭୁବନେଶ୍ବର ଉପକଣ୍ଠ ଧଉଳି ଥାନା ପୁଲିସ ଛିନତାଇ ଓ ଲୁଟ ମାମଲାରେ ଆଜି ୩ ଜଣ ଲୁଟେରାଙ୍କୁ ଗିରଫ କରି କୋର୍ଟ ଚାଲାଣ କରିଛି । କୋର୍ଟରେ ସେମାନଙ୍କ ଜାମିନ ଆବେଦନ ନାମଂଜୁର ହେବାରୁ ଝାରପଡ଼ା ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ୩ ଜଣଯାକ ଲୁଟେରାଙ୍କ ବିରୋଧରେ ଧଉଳି ଥାନାରେ ପୃଥକ ପୃଥକ ମାମଲା ରୁଜୁ ହୋଇଛି । ଗିରଫ ଲୁଟେରାମାନେ ହେଲେ ମନିପର୍ସ ଲୁଟ ମାମଲାର ଅଭିଯୁକ୍ତ ଏୟାର ଫିଲ୍ଡ ଥାନା ଅଧୀନ ସୁନ୍ଦରପଦା ଅଞ୍ଚଳର ଅମରେନ୍ଦ୍ର ତ୍ରିପାଠୀ (୨୬), ସୁନାଚେନ ଲୁଟ ମାମଲାର ଦୁଇ ଅଭିଯୁକ୍ତ ବଡ଼ଗଡ଼ ଥାନା ଅଧୀନ ମଇଁଷି ଖାଲ ଅଞ୍ଚଳରେ ରହୁଥିବା ଡି ରାଜା ଓ ଜିତେନ୍ଦ୍ର ପ୍ରଧାନ ଓରଫ ଜିତୁ (୨୨)।
Sambad is now on WhatsApp
Join and get latest news updates delivered to you via WhatsApp
ଗତକାଲି ଧଉଳି ଥାନା ଅଧୀନ ମାରୁତିନଗର ଅଞ୍ଚଳର ଟୁନା ସେଠୀ ନାମକ ଜଣେ ବ୍ୟକ୍ତିଙ୍କ ଘରେ ପଶି ଅମରେନ୍ଦ୍ର ତାଙ୍କର ପର୍ସ ଲୁଟି ନେଇଥିଲେ । ସେଥିରେ ୧୨ ହଜାର ଟଙ୍କା ଥିଲା । ଉପର ମହଲାରେ ଘର କାମ ଦେଖୁଥିବା ଅମରେନ୍ଦ୍ର ତଳ ମହଲାରୁ ବାହାରିବା ଦେଖି ଚୋର ଚୋର ବୋଲି ଚିତ୍କାର କରିଥିଲେ । ତାଙ୍କ ପାଟିଶୁଣି ସ୍ଥାନୀୟ ଲୋକ ଅମରେନ୍ଦ୍ରକୁ ଧରି ନେଇଥିଲେ ।
ସେହିପରି ଗତକାଲି ଠିକ ରାତି ୧୦ଟାରେ ଆଉ ଏକ ଛିନତାଇ ଘଟଣା ଘଟିଥିଲା ସ୍ଥାନୀୟ ଇନ୍ଦିରା କଲୋନି ଭିତରେ । ସଂଧ୍ୟାରାଣୀ ଗନ୍ତାୟତ ତାଙ୍କ ଝିଅ ସହ ମାର୍କେଟିଂ ସାରି ସ୍କୁଟିରେ ଯାଉଥିବା ବେଳେ ରାଜା ଓ ଜିତୁ ପିଛା କରି ସୁନାହାର ଲୁଟି ନେବାକୁ ଉଦ୍ୟମ କରିଥିଲେ । ହେଲେ ବାଇକ ପଛରେ ବସି ଚେନ ଝାମ୍ପୁଥିବା ସମୟରେ ମହିଳା ତାଙ୍କ ହାତକୁ ଜୋରରେ ଧରି ଦେବାରୁ ବାଇକରୁ ଦୁହେଁ ଛିଟିକିପଡ଼ି ସାମାନ୍ୟ ଖର୍ଣ୍ଡିଆଖାବରା ହୋଇପଡ଼ିଥିଲେ । ଅନୁରୂପ ଭାବେ ସ୍ଥାନୀୟ ଲୋକ ରାଜା ଓ ଜିତୁକୁ ବହେ ଛେଚି ପୁଲିସକୁ ହସ୍ତାନ୍ତର କରିଥିଲେ । ଖବର ପାଇ ଧଉଳି ଥାନା ପୁଲିସ ସେମାନଙ୍କୁ ଚିକିତ୍ସା ଲାଗି ବଳକାଟି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲା । ଏସଂପର୍କରେ ସଂଧ୍ୟାରାଣୀଙ୍କ ଝିଅ ସମାପିକା ରାଉତରାୟ ଲିଖିତ ଅଭିଯୋଗ କରିଥିଲେ ।