ଜମୁଛି ତୋଷାଳି ମେଳା: ଥିମ୍ ପାଭିଲିୟନ ‘ଶିଳ୍ପ ସୃଜନୀ’ରେ ଶାଢ଼ିର ସମ୍ଭାର

ଭୁବନେଶ୍ୱର: ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗ ପକ୍ଷରୁ ଜନତା ମଇଦାନରେ ଚାଲିଥିବା ତୋଷାଳି ଜାତୀୟ ହସ୍ତଶିଳ୍ପ ମେଳାରେ ଆକର୍ଷଣ ସାଜିଛି ପଡ଼ିଆର ମଧ୍ୟ ଭାଗରେ ସ୍ୱତନ୍ତ୍ର ଥିମ୍ ପାଭିଲିୟନ ‘ଶିଳ୍ପ ସୃଜନୀ’। ଏଥିରେ ଜିଆଇ ମାନ୍ୟତା ପାଇଥିବା ଓଡ଼ିଶାର ବିଭିନ୍ନ ଆକର୍ଷଣୀୟ ହସ୍ତତନ୍ତ ଓ ହସ୍ତଶିଳ୍ପ ସାମଗ୍ରୀ ସହ ଅନ୍ୟାନ୍ୟ କଳାକୃତି ପ୍ରଦର୍ଶିତ ହୋଇଛି। ରାଜ୍ୟର ପ୍ରସିଦ୍ଧ ହସ୍ତତନ୍ତ ଯଥା ସମ୍ବଲପୁରୀ ବାନ୍ଧ ଶାଢ଼ି, ହବସପୁରୀ ଶାଢ଼ି, ଗୋପାଳପୁରର ପ୍ରସିଦ୍ଧ ରେଶମ ପୋଷାକ, ପଦ୍ମ ମୟୂର, ନୀଳଚକ୍ର, ଝୋଟି ବନ୍ଧ, ରୋଜାଲିନ, ଶକ୍ତ ସେବତୀ ପରି ବହୁ ଶାଢ଼ୀ ପ୍ରମୁଖ ଆକର୍ଷଣ ପାଲଟିଛି। ବହୁ ଗ୍ରାହକ ବିଶେଷ କରି ମହିଳାମାନେ ଏହି ଡିଜାଇନଗୁଡ଼ିକ ପ୍ରତି ଆକର୍ଷିତ ହୋଇ ମେଳାରେ ସେହି ଶାଢ଼ି ଖୋଜି କିଣୁଛନ୍ତି।  

ଚାହିଦାରେ କନ୍ୟାକୁମାରୀର ଶଙ୍ଖ ସାମଗ୍ରୀ

ମେଳାରେ ଦର୍ଶକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି କନ୍ୟାକୁମାରୀର ଶଙ୍ଖରେ ପ୍ରସ୍ତୁତ କି-ଚେନ,  ବ୍ରେସଲେଟ୍‌, ଚୁଡ଼ି, ମାଳ, ଆଇନା, ହ୍ୟାଙ୍ଗର, ସିନ୍ଦୂର ଫରୁଆ, ବିଭିନ୍ନ ପଶୁପକ୍ଷୀଙ୍କ ପ୍ରତିମୂର୍ତ୍ତି, ଘରସଜ୍ଜା ସାମଗ୍ରୀ। ଏଥିରେ କନ୍ୟାକୁମାରୀର ପାରମ୍ପରିକ ଡିଜାଇନ୍‌ ଅଙ୍କନ କରାଯାଇଛି। ଏହାବ୍ୟତୀତ ଷ୍ଟଲରେ ବିଭିନ୍ନ ପ୍ରକାରର ଶଙ୍ଖ ଯେପରିକି ଗଣେଶ, କଉଡ଼ି, ଗୋମୁଖୀ, ପଞ୍ଚମୁଖୀ, ଶଙ୍ଖିନୀ, ମୋତି ଆଦି ଉପଲବ୍‌ଧ ହେଉଛି। ଷ୍ଟଲ୍‌ର କାରିଗର ଆର ଏସ ବିନୁଙ୍କ କହିବା ଅନୁଯାୟୀ ଓଡ଼ିଶାର ଗ୍ରାହକ ତାଙ୍କ ଦ୍ରବ୍ୟକୁ ବହୁତ ପସନ୍ଦ କରୁଛନ୍ତି। ପୂର୍ବରୁ ମଧ୍ୟ ତୋଷାଳି ମେଳାରେ ଭଲ ବେପାର ହୋଇଥିଲା। ଚଳିତ ବର୍ଷ ମଧ୍ୟ ବେପାର ଭଲ ହେବ ବୋଲି ଆଶା ରହିଛି। ତାଙ୍କ ନିକଟରେ ୩୦ଟଙ୍କାରୁ ଆରମ୍ଭ ହୋଇ ୬ହଜାର ପର୍ଯ୍ୟନ୍ତ ଟଙ୍କାର ସାମଗ୍ରୀ ରହିଛି।

ଆକର୍ଷଣ ସାଜିଛି ବର୍ଜ୍ୟବସ୍ତୁରୁ ପ୍ରସ୍ତୁତ କଳାକୃତି 
ମେଳାରେ କାଠ, କାଚ, ପ୍ଲାଷ୍ଟିକ ବୋତଲ, ଶୁଖିଲା ନଡ଼ିଆ, କପଡ଼ା, ଗୁଆ ଆଦିରେ ଘର ସଜ୍ଜା ସାମଗ୍ରୀ ପ୍ରସ୍ତୁତ କରିଛନ୍ତି ପୁରୀର କାରିଗର ବିଭୂତି ଭୂଷଣ ନାୟକ। ସେ ଏହି ସାମଗ୍ରୀକୁ ବ୍ୟବହାର କରି ମୁଖା, ବିଭିନ୍ନ ଜୀବଜନ୍ତୁ, ପେନ୍‌ ଷ୍ଟାଣ୍ଡ, ପ୍ରଭୁ ଜଗନ୍ନାଥ, ଗଣେଶଙ୍କ ରୂପ ଆଦି ପ୍ରସ୍ତୁତ କରିଛନ୍ତି। 
ସିଡାକ୍‌ ଷ୍ଟଲରେ ଛୋଟ ପିଲାଙ୍କ ଭିଡ଼
ମେଳାରେ ଏକ ସ୍ୱତନ୍ତ୍ର ଷ୍ଟଲରେ ସିଡାକ୍‌ର ଛାତ୍ରଛାତ୍ରୀଙ୍କ ଦ୍ୱାରା ମାଟିର ବିଭିନ୍ନ କଳାକୃତି ମାଠିଆ, ଦୀପ, ପଶୁପକ୍ଷୀ, କାର୍ଟୁନ ଆଦି ପ୍ରସ୍ତୁତିର ଲାଇଭ୍‌ ଡେମୋ ଦେଖିବାକୁ ଛୋଟ ପିଲାଙ୍କ ଭିଡ଼ ଜମୁଛି। ଏପରିକି ଅଭିଭାବକମାନେ ମଧ୍ୟ ପିଲାଙ୍କୁ ଏହା ଦେଖି ଶିଖିବାକୁ ଉତ୍ସାହିତ କରୁଥିବାର ଦେଖିବାକୁ ମିଳୁଛି।