ବାଲିଅନ୍ତା: ହଂସପାଳ-ଜୟଦେବ ମୁଖ୍ୟ ରାସ୍ତାରେ ଆଜି ଅପରାହ୍‌ଣ ସାଢ଼େ ୨ଟାରେ ଏକ କାଠ ବୋଝେଇ ଟ୍ରାକ୍ଟର୍‌କୁ ପଥର ବୋଝେଇ ଟ୍ରକ୍‌ ଧକ୍କା ଦେବାରୁ ଜଣେ ଶ୍ରମିକଙ୍କ ମୃତ୍ୟୁ ଘଟିଛି। ମୃତ ଶ୍ରମିକଙ୍କ ନାମ ବାବୁଲି ନାୟକ(୩୮)। ଘର ଗୋବିନ୍ଦପୁର ଥାନା ଅନ୍ତର୍ଗତ ତଣ୍ଡିକଣା ଗ୍ରାମରେ। ଖବର ପାଇ ସ୍ଥାନୀୟ ଲୋକ ଘଟଣାସ୍ଥଳରେ ପହଞ୍ଚି ବାବୁଲିଙ୍କୁ ଉଦ୍ଧାର କରିଥିଲେ। କିନ୍ତୁ ସେତେବେଳକୁ ବାବୁଲିଙ୍କ ମୃତ୍ୟୁ ହୋଇଯାଇଥିଲା। ବାଲିଅନ୍ତା ଥାନା ପୁଲିସ ଘଟଣାସ୍ଥଳରୁ ଶବ ଜବତ କରି ବ୍ୟବଚ୍ଛେଦ ଲାଗି କ୍ୟାପିଟାଲ ହସ୍ପିଟାଲକୁ ପଠାଇବା ସହ ଦୁର୍ଘଟଣାଗ୍ରସ୍ତ ଟ୍ରକ୍‌ ଓ ଟ୍ରାକ୍ଟର୍‌କୁ ଜବତ କରିଛି। ଏହି କାଠଗଣ୍ଡି ବୋଝେଇ ଟ୍ରାକ୍ଟର୍‌(ଓଡି-୦୫ୟୁ-୦୦୨୬) ଉପରୋକ୍ତ ରାସ୍ତାରେ ଯାଉଥିବା ବେଳେ ଗୋପ ବ୍ରାଞ୍ଚ କେନାଲସ୍ଥିତ ଜିତିକାରସୁଆଁଲୋ ନିକଟରେ ପଛପଟୁ ଦ୍ରୁତଗାମୀ ଏକ ପଥର ବୋଝେଇ ଟ୍ରକ୍‌(ଓଆର୍‌-ଏକ୍ସ-୬୬୦୧) ଧକ୍କା ଦେଇଥିଲା। ଟ୍ରାକ୍ଟର୍‌ର ଡାଲା ବାହାରକୁ ଲମ୍ବିଥିବା କାଠଗଣ୍ଡିକୁ ଧକ୍କା ଦେବା ପରେ ଟ୍ରକ୍‌ଟି କେନାଲ ବନ୍ଧ ତଳକୁ ଓଲଟି ପଡ଼ିଥିଲା। କାଠଗଣ୍ଡି ଉପରେ ବସିଥିବା ବାବୁଲି ଚାପି ହୋଇଯିବାରୁ ତାଙ୍କର ମୃତ୍ୟୁ ହୋଇଯାଇଥିଲା। ଏହାକୁ ନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା। ଉତ୍ତ୍ୟକ୍ତ ଲୋକମାନେ ଟ୍ରକ୍‌ ଚାଳକକୁ ମାଡ଼ ମାରି ପୁଲିସ ଜିମା ଦେଇଛନ୍ତି। ଆସନ୍ତାକାଲି ଅଟକ ଟ୍ରକ୍‌ ଚାଳକକୁ କୋର୍ଟଚାଲାଣ କରାଯିବ ବୋଲି ପୁଲିସ କହିଛି।