ଭୁବନେଶ୍ବର: ଇ-ଚାଲାଣ ନ କାଟି କାର୍କୁ ଅଟକ ରଖିବା ଓ କାର୍ ଭିତରେ କୁନି ଝିଅ ବନ୍ଦୀ ହୋଇ ରହିବା ମାମଲାକୁ କମିସନରେଟ୍ ପୁଲିସ ଗୁରୁତ୍ବର ସହ ନେଇଛି। ବିଭିନ୍ନ ମହଲରେ ଘଟଣାକୁ ତୀବ୍ର ନିନ୍ଦା କରାଯିବା ପରେ ପୁଲିସ କମିସନର କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ପ୍ରଥମ ପଦକ୍ଷେପ ସ୍ବରୂପ ଟ୍ରାଫିକ୍ ଇନ୍ସ୍ପେକ୍ଟର ପ୍ରଣବ ଟୁଡୁଙ୍କୁ ବଦଳି କରାଯାଇଛି। ତାଙ୍କୁ ପୁଲିସ ହେଡ୍ କ୍ବାର୍ଟର୍ସକୁ ବଦଳି କରାଯାଇଛି। ସେହିଭଳି ଏହି ମାମଲାରେ ଅନ୍ୟ କାହାରି ସମ୍ପୃକ୍ତି ଥିବା ତଦନ୍ତରୁ ଜଣାପଡ଼ିଲେ, ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ମିଳିଛି। ଏହି ଘଟଣାରେ ଟ୍ରାଫିକ୍ ଥାନା ଆଇଆଇସି ଆକାଶ ରାଣାଙ୍କ ବିରୋଧରେ ଅଭିଯୋଗ ଉଠିଛି ଏବଂ ତାଙ୍କ ବିରୋଧରେ ମଧ୍ୟ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି।
ଆଜି ପୁଲିସ କମିସନର ସୁରେଶ ଦେବଦତ୍ତ ସିଂହ କହିଛନ୍ତି ଯେ ଏହି ମାମଲାକୁ ନେଇ ଆଭ୍ୟନ୍ତରୀଣ ତଦନ୍ତ ଚାଲିଛି। କେଉଁ ପରିସ୍ଥିତିରେ କୁନି ଝିଅଟି କାର୍ ଭିତରେ ବିଳମ୍ବିତ ସମୟ ପର୍ଯ୍ୟନ୍ତ ରହିଗଲା, ସେନେଇ ଉପସ୍ଥିତ ପୁଲିସ କର୍ମଚାରୀମାନେ ପ୍ରକୃତରେ ଜାଣିଥିଲେ କି ନାହିଁ, ସେନେଇ ଛାନ୍ଭିନ୍ ଚାଲିଛି। ସେହିଭଳି କାହିଁକି ଇ-ଚାଲାଣ କାଟି ତୁରନ୍ତ ଗାଡ଼ିକୁ ଛାଡ଼ିଦିଆଯାଇ ନଥିଲା, ସେନେଇ ତଦନ୍ତ କରାଯାଉଛି। ଆଇଆଇସି ପ୍ରଣବ ଟୁଡୁଙ୍କୁ ହେଡ୍କ୍ବାର୍ଟର୍ସକୁ ବଦଳି କରାଯାଇଛି ଏବଂ କନେଷ୍ଟବଳଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି। ଆଗକୁ ଏହି ମାମଲାରେ ଯେଉଁମାନଙ୍କ ତ୍ରୁଟି ଥିବା ଜଣାପଡ଼ିବ ସେମାନଙ୍କୁ କାର୍ଯ୍ୟାନୁଷ୍ଠାନ ଭୋଗିବାକୁ ପଡ଼ିବ ବୋଲି କମିସନର ଶ୍ରୀ ସିଂହ କହିଛନ୍ତି। ଘଟଣା ଦିନ ଅର୍ଥାତ୍ ୧୧ ତାରିଖ ଦିନ ଏଜି ଛକରେ ଏକ କାର୍ ୟୁ-ଟର୍ଣ୍ଣ ନେବାରୁ ଟ୍ରାଫିକ୍ ପୁଲିସ ତାକୁ ଅଟକାଇଥିଲା। କାର୍ରେ ସ୍କୁଲ୍ରୁ ଫେରୁଥିବା ଭୋକିଲା କୁନି ଝିଅଟି ଥିବାରୁ ଚାଳକ ଇ-ଚାଲାଣ କାଟିବାକୁ ଅନୁରୋଧ କରିଥିଲେ। ମାତ୍ର ଟ୍ରାଫିକ୍ ଇନ୍ସ୍ପେକ୍ଟର ଶ୍ରୀ ଟୁଡୁ ଇ-ଚାଲାଣ କାଟିବାକୁ ମନା କରି ଜରିମାନା ବାବଦକୁ ସିଧାସଳଖ ଟଙ୍କା ଦେବାକୁ ଦାବି କରିଥିଲେ। ଚାଳକଙ୍କ ପାଖରେ ଟଙ୍କା ନଥିବାରୁ ପୁଲିସ ଗାଡ଼ିକୁ ନେଇ ଟ୍ରାଫିକ୍ ଥାନା-୧ ଜିମାରେ ରଖିଥିଲା। କାର୍ରେ କୁନି ଝିଅଟିକୁ ଦେଖିବା ପରେ ବି ଥାନା ଆଇଆଇସି ଶ୍ରୀ ରାଣାଙ୍କ ଦୟା ହୋଇ ନଥିଲା। ପିଲାଟି ଭୋକ ଓ ପୁଲିସ ଭୟରେ କାନ୍ଦୁଥିବା ବେଳେ ଥାନାର କୌଣସି କର୍ମଚାରୀ ତାଙ୍କୁ ଆଶ୍ବାସନା ଦେଇନଥିଲେ। ବିଚରା ଚାଳକ ଅଭିଭାବକଙ୍କୁ ଫୋନ୍ କରି ଜଣାଇବା ପରେ କୁନି ଝିଅର ମା’ ପହଞ୍ଚିଥିଲେ। ସେତେବେଳକୁ ଅଧଘଣ୍ଟା ବିତି ସାରିଥିଲା ଏବଂ କୁନି ପିଲାଟି ଭୟରେ କାକୁସ୍ଥ ହୋଇ ସାରିଥିଲା। ଇ-ଚାଲାଣ ବ୍ୟବସ୍ଥା ଥିବା ସତ୍ତ୍ବେ ସେଦିନ ପୁଲିସ ସିଧାସଳଖ ଜରିମାନା ଆଦାୟ କରିବାକୁ ବାଧ୍ୟ କରିବା ଓ ଏଜି ଛକରେ ୟୁ-ଟର୍ଣ୍ଣ ମନା ବୋଲି ଫଳକ ନ ଥିବା ପରେ ବି ପୁଲିସ ଗାଡ଼ିକୁ ଅଟକାଇବା କେଉଁ ନ୍ୟାୟ ବୋଲି ପ୍ରଶ୍ନବାଚୀ ସୃଷ୍ଟି ହୋଇଥିଲା। ବଡ଼କଥା ହେଉଛି ସ୍କୁଲ୍ରୁ ଫେରୁଥିବା ଭୋକିଲା କୁନି ଝିଅକୁ କାର୍ରେ ବନ୍ଦୀ କରି ରଖିବା ଭଳି ଅମାନବୀୟ ଘଟଣାକୁ ନେଇ ଲୋକେ ପୁଲିସକୁ କଟୁ ଭାଷାରେ ସମାଲୋଚନା କରିଥିଲେ।
ଆକାଶ ରାଣାଙ୍କ ମୁଣ୍ଡରେ ଝୁଲୁଛି ଖଣ୍ଡା
ଥାନା ଘେରିଲା ଯୁବ ଓ ଛାତ୍ର କଂଗ୍ରେସ
ଏହି ମାମଲାକୁ ନେଇ ଆଜି ଯୁବ ଓ ଛାତ୍ର କଂଗ୍ରେସ ବିକ୍ଷୋଭ ପ୍ରଦର୍ଶନ କରିଛି। ଟ୍ରାଫିକ୍ ଥାନା ଆଇଆଇସି ଆକାଶ ରଣାଙ୍କୁ ବଦଳି କରିବା ଓ ସମ୍ପୃକ୍ତ ଥିବା ଅନ୍ୟ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ଯୁବ ଓ ଛାତ୍ର କଂଗ୍ରେସ ସଦସ୍ୟମାନେ ଥାନା ସମ୍ମୁଖରେ ଧାରଣା ଦେଇଥିଲେ। ଟ୍ରାଫିକ୍ ଏସିପି ବୁଝାସୁଝା କରିବା ପରେ ଏହି ଧାରଣା ପ୍ରତ୍ୟାହୃତ ହୋଇଥିଲା। ରଞ୍ଜିତ ପାତ୍ର, ୟାସିର ନଵାଜ, ଉଦିତ୍ ପ୍ରଧାନ, ସୁଦୀପ ସାମଲ, ମନୋଜ ବିଶ୍ୱାଳ, ସତ୍ୟଜିତ ପଟ୍ଟନାୟକଙ୍କ ନେତୃତ୍ବରେ ବହୁ ଯୁବ ଓ ଛାତ୍ର କଂଗ୍ରେସ କର୍ମୀମାନେ ଧାରଣାରେ ସାମିଲ ହୋଇଥିଲେ। ଏହି ଅବସରରେ ଟ୍ରାଫିକ୍ ଥାନା ଅଧିକାରୀ ଆକାଶ ରଣାଙ୍କ ବିରୋଧରେ କ୍ୟାପିଟାଲ୍ ଥାନାରେ ଲିଖିତ ଅଭିଯୋଗ କରାଯାଇଛି।