ପ୍ରସିଦ୍ଧ ଗଣିତଜ୍ଞ ଆନନ୍ଦ କୁମାରଙ୍କୁ ସମ୍ବର୍ଦ୍ଧନା

ଭୁବନେଶ୍ବର: ଓଡ଼ିଆ ନବବର୍ଷ ଏବଂ ମହାବିଷୁବ ସଂକ୍ରାନ୍ତି ଅବସରରେ ଆନ୍ତର୍ଜାତିକ ଖ୍ୟାତିସଂପନ୍ନ ଗଣତିଜ୍ଞ ଏବଂ ନିକଟରେ ପଦ୍ମଶ୍ରୀ ପୁରସ୍କାର ପ୍ରାପ୍ତ ଆନନ୍ଦ କୁମାରଙ୍କୁ ସମ୍ବର୍ଦ୍ଧନା ପ୍ରଦାନ କରାଯାଇଛି। ଗଙ୍ଗପଡ଼ାସ୍ଥିତ ‘ଆଦ୍ୟାନ୍ତ ଉଚ୍ଚ ମାଧ୍ୟମିକ ବିଦ୍ୟାଳୟ’ରେ ଶିକ୍ଷକ ମଣ୍ଡଳୀ ଓ ପରିଚାଳନା ସମିତି, ଛାତ୍ରଛାତ୍ରୀମାନଙ୍କ ଦ୍ବାରା ଏହି ସମ୍ବର୍ଦ୍ଧନା ପର୍ବ କରାଯାଇଥିଲା।

ବିଦ୍ୟାଳୟର ଅଧ୍ୟକ୍ଷା ରିଙ୍କୁ ଷଡ଼ଙ୍ଗୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଉତ୍ସବରେ ‘ଆଦ୍ୟାନ୍ତ ଗ୍ରୁପ୍ ଅଫ୍ ଇନ୍‌ଷ୍ଟିଚ୍ୟୁସନ୍‌’ର ପ୍ରତିଷ୍ଠାତା ତଥା ଚେୟାରମ୍ୟାନ୍ ଅଜୟ ବାହାଦୂର୍ ସିଂ ଯୋଗ ଦେଇଥିଲେ। ଶ୍ରୀ କୁମାର ତାଙ୍କର ସଂର୍ଘଷ, ସାଧନା ଏବଂ ସଫଳତା ନିମନ୍ତେ ଭବିଷ୍ୟତରେ ଦିନେ ମର୍ଯ୍ୟାଦାଜନକ ଭାରତରତ୍ନ ଏବଂ ନୋବେଲ୍ ପୁରସ୍କାର ପାଇବେ ବୋଲି ସେ ଆଶାବ୍ୟକ୍ତ କରିଥିଲେ। ଏହି ଅବସରରେ ଶ୍ରୀ କୁମାର ଉପସ୍ଥିତ ଛାତ୍ରଛାତ୍ରୀମାନଙ୍କୁ ଦୃଢ଼ ପ୍ରତିଜ୍ଞା, ଅଟଳ ବିଶ୍ୱାସ ଏବଂ ପରିଶ୍ରମ ମାଧ୍ୟମରେ ସଫଳତାର ଶୀର୍ଷରେ ପହଞ୍ଚିବା ସହଜ ବୋଲି ପ୍ରେରଣାଦାୟୀ ବାର୍ତ୍ତା ଦେଇଥିଲେ। ଅଧ୍ୟକ୍ଷା ଶ୍ରୀମତୀ ଷଡ଼ଙ୍ଗୀ ଧନ୍ୟବାଦ ଦେଇଥିଲେ।