ଚଳଚଞ୍ଚଳ ତ୍ରିବେଣୀ ଘାଟ: ଜଳ ଉଠାଇଲେ ୫ହଜାର କାଉଡ଼ିଆ

ବାଲିପାଟଣା: ଆଜି ସକାଳୁ ପୁଣ୍ୟତୋୟା ପ୍ରାଚୀ ନଦୀର ପବିତ୍ର ତ୍ରିବେଣୀ ଘାଟ ବେଶ୍‌ ଚଳଚଞ୍ଚଳ ହୋଇଉଠିଥିଲା। ଆସନ୍ତାକାଲି ଶ୍ରାବଣ ଦ୍ବିତୀୟ ସୋମବାର ପାଇଁ ୫ହଜାରରୁ ଅଧିକ କାଉଡ଼ିଆ ଏଠାରୁ ଜଳ ଉଠାଇଥିବାରୁ ପ୍ରବଳ ଭିଡ଼ ହୋଇଥିଲା। ସକାଳୁ ଅପରାହ୍ଣ ପର୍ଯ୍ୟନ୍ତ ତ୍ରିବେଣୀ ଘାଟରୁ ଶୁଭୁଥିଲା ‘ବୋଲ୍ ବମ୍‌ ହର ହର ବମ୍’, ‘ଭୋଲା ବାବା ପାର୍‌ କରେଗା’ ଓ ‘ଜଟିଆ ବାବା ପାର୍‌ କରେଗା’ ଭଳି କାଉଡ଼ିଆଙ୍କ ଡାକରା। ସେହିଭଳି ଘାଟସାରା ବାଜୁଥିଲା ଶହଶହ ମାଇକ୍‌ ଓ ସାଉଣ୍ଡ ବକ୍ସ ଏବଂ ବିଭିନ୍ନ ଶିବ ଭଜନ ତଥା ଜଣାଣ ପରିବେଶକୁ ଅଧିକ କୋଳାହଳମୟ କରିଥିଲା। ସ୍ଥାନୀୟ ଅନ୍ତର୍ବେଦି ସାଂସ୍କୃତିକ ପରିଷଦ ସହଯୋଗରେ କାଉଡ଼ିଆମାନେ ବେଶ୍ ସୁରୁଖୁରୁରେ ଜଳ ଉଠାଇଥିଲେ। 

ପୁରାଣରେ ରହିଛି ପବିତ୍ର ପ୍ରାଚୀ ନଦୀର ଗାଥା। କୁହାଯାଏ ଗଙ୍ଗା ନଦୀଠାରୁ ଏହି ନଦୀ ବହୁ ପ୍ରାଚୀନ। ସେତିକି ପବିତ୍ର ବୋଲି ପ୍ରାଚୀ କୂଳରେ ରହିଛି ଦ୍ବାଦଶ ଶମ୍ଭୁ, ଦ୍ବାଦଶ ମାଧବ ଓ ଦ୍ବାଦଶ ଶକ୍ତିପୀଠ। ସେହିଭଳି ତ୍ରିବେଣୀ ଘାଟରେ ରହିଛନ୍ତି ଗୁପ୍ତଗଙ୍ଗା। ତେଣୁ ଗଙ୍ଗା ନଦୀ ଭଳି ଏହି ନଦୀ ପବିତ୍ର ବୋଲି ବିବେଚନା କରାଯାଏ। ଏଥିପାଇଁ ଏହି ଘାଟରେ ବର୍ଷସାରା ପିଣ୍ଡଦାନ, ଅସ୍ତି ବିସର୍ଜନ, ବିବାହ, ବ୍ରତ ଓ ମୁଣ୍ଡନ ଆଦି ବିଧି ବା ପରମ୍ପରା ପାଳିତ ହୋଇଆସୁଛି। ତେଣୁ ଶ୍ରାବଣ ସୋମବାରରେ ଏହି ଘାଟର ଜଳକୁ ମହାଦେବଙ୍କ ମସ୍ତକରେ ଢାଳିଲେ, କୋଟି ପୁଣ୍ୟ ମିଳେ ବୋଲି ବିଶ୍ବାସ ରହିଛି। ତେଣୁ ପ୍ରତିବର୍ଷ କାଉଡ଼ିଆମାନେ ଏଠାରୁ ଜଳ ନେଇ ବିଭିନ୍ନ ଶୈବ ପୀଠକୁ ଯାତ୍ରା କରନ୍ତି। ଉପକୂଳ ଓଡ଼ିଶାର ପୁରୀ, ଜଗତସିଂହପୁର, କଟକ, କେନ୍ଦ୍ରାପଡ଼ା ଓ ଖୋର୍ଦ୍ଧା ଆଜି ଜିଲ୍ଲାର ବିଭିନ୍ନ ଶିବ ମନ୍ଦିରକୁ କାଉଡ଼ିଆମାନେ ଏଠାରୁ ଜଳ ନିଅନ୍ତି।

ଆଜି ଯେଉଁମାନେ ଏଠାରୁ ଜଳ ଉଠାଇଥିଲେ, ସେମାନଙ୍କ ମଧ୍ୟରୁ ଅଧିକାଂଶ ପୁରୀ ଲୋକନାଥଙ୍କ ପୀଠ, ପୁରୁଣା ଭୁବନେଶ୍ୱର ବାବା ଲିଙ୍ଗରାଜ, ବାଲି କପିଳନାଥ, ଶ୍ରୀବୁଦ୍ଧନାଥ, ନୀଳକଣ୍ଠେଶ୍ୱର, ଶୋଭନେଶ୍ୱର, ଅନ୍ଧ କପିଳେଶ୍ୱର, ଚମ୍ପନାଥ, ମୁକ୍ତିଶ୍ୱର, ସୋମନାଥ, ବୁଦ୍ଧିକେଶ୍ୱର, ସିଦ୍ଧକେଶ୍ୱର, ବାଲୁଙ୍କେଶ୍ୱର, ବେଲେଶ୍ୱର, ଆଖଣ୍ଡଳେଶ୍ୱର, ବାଲି କପିଳେଶ୍ୱର ଓ ବକ୍ରେଶ୍ୱରଙ୍କ ପୀଠକୁ ଯାଇଥାଆନ୍ତି।     ଆଜି ସକାଳୁ କମ ପରିମାଣର କାଉଡ଼ିଆ ପହଞ୍ଚିଥିଲେ। କିନ୍ତୁ ପୂର୍ବାହ୍ଣ ୧୧ଟା ବେଳକୁ ଅସମ୍ଭାଳ ଭିଡ଼ ହୋଇଯାଇଥିଲା। କାଉଡ଼ିଆମାନେ ପ୍ରାଚୀ ଜଳରେ ସ୍ନାନ କରିବା ପରେ ବ୍ରାହ୍ଣଣଙ୍କ ନିକଟରେ ବ୍ରତୀ ହୋଇଥିଲେ ଏବଂ ଜଳାଭିଷେକ ବିଧି ପାଳନ କରିଥିଲେ। ଏହାପରେ ସେମାନେ ଜଳଭାର ବହନ କରିଥିବା ବାହୁଙ୍ଗୀ କାନ୍ଧେଇ ଅନ୍ତର୍ବେଦି ପୀଠର ଆରାଧ୍ୟ ଦେବତା ପ୍ରଭୁ ଅନ୍ତର୍ଯାମୀ ନାଥଙ୍କ ପୀଠ ବୁଲିଥିଲେ। ସେହିଭଳି ଜଳଭାର ବାହୁଙ୍ଗି କାନ୍ଧେଇ ଶ୍ରଦ୍ଧାଳୁମାନେ ବେଲେଶ୍ୱର ଓ ତ୍ରିବେଣୀଶ୍ୱରଙ୍କ ମନ୍ଦିର ପରିକ୍ରମା କରିଥିଲେ ଏବଂ ନିଜ ନିଜ ଗନ୍ତବ୍ୟସ୍ଥଳ ଅଭିମୁଖେ ବାହାରି ପଡ଼ିଥିଲେ।