ଧଉଳି: ଗାଡ଼ି ସାଇଡ୍‌ମରାକୁ ବାହାନା କରି ୭/୮ଜଣ ଦୁର୍ବୃତ୍ତ ଜଣେ ଟ୍ରକ୍‌ ଚାଳକଙ୍କୁ ଅଟକାଇ ମାଡ଼ମାରିବା ସହ ଲୁଟ୍‌ କରିଛନ୍ତି। ଆକ୍ରମଣ ଓ ଲୁଟ୍‌ର ଶିକାର ହୋଇଥିବା ଟ୍ରକ୍‌ ଚାଳକ ହେଲେ ପତିତପାବନ ବାରିକ(୨୯)। ଇନ୍ଦିରା ହାଉସିଂ କଲୋନି ଛକ ନିକଟରେ ଆଜି ସକାଳେ ଘଟିଥିବା ଏହି ଘଟଣାକୁ ନେଇ ଧଉଳି ଥାନାରେ ଅଭିଯୋଗ କରାଯାଇଛି। ଅଭିଯୋଗ ଆଧାରରେ ୮ଜଣଙ୍କ ନାଁରେ ମାମଲା ରୁଜୁ ହୋଇଥିଲେ ହେଁ ପୁଲିସ କାହାକୁ ଗିରଫ କରିପାରିନାହିଁ। 
ରଜ ଛୁଟିରେ ଘରକୁ ଯିବା ପାଇଁ ପତିତପାବନ ଆଜି ଟ୍ରକ୍‌ଟିକୁ ମାଲିକଙ୍କ ଘର ନିକଟରେ ରଖିବାକୁ ଯାଉଥିଲେ। ସେ ଇନ୍ଦିରା ହାଉସିଂ କଲୋନି ଛକରେ ପହଞ୍ଚିଥିବା ବେଳେ ୨ଜଣ ଯୁବକ ଟ୍ରକ୍‌ ଆଗକୁ ଆସି ଅଟକାଇଥିଲେ। ପତିତପାବନ ଟ୍ରକ୍‌ ଅଟକାଇବା ପରେ ଯୁବକଦ୍ବୟ ତାଙ୍କୁ ତଳକୁ ଓହ୍ଲାଇବାକୁ କହିଥିଲେ। କଣ ପାଇଁ ତଳକୁ ଓହ୍ଲାଇବେ ବୋଲି ପତିତପାବନ ପଚାରିବାରୁ ସେମାନେ ଗାଡ଼ି କାହିଁକି ସାଇଡ୍‌ ମାରିଲୁ ବୋଲି କହି ଗାଳିକରିଥିଲେ। ଏତିକିବେଳେ ଆଉ ୬ଜଣ ଯୁବକ ସେଠାରେ ପହଞ୍ଚିଥିଲେ ଏବଂ ପତିତପାବନଙ୍କୁ ଗାଡ଼ିରୁ ତଳକୁ ଟାଣିଆଣି ପିଟିବା ଆରମ୍ଭ କରିଦେଇଥିଲେ। ରଡ୍‌ ଓ କାଠଫାଳିଆରେ ନିର୍ଦ୍ଦୟ ଭାବେ ପିଟିପିଟି ତାଙ୍କୁ ଲହୁଲୁହାଣ କରିଦେଇଥିଲେ। ପତିତପାବନ ତଳେ ଗଡ଼ୁଥିବା ବେଳେ ୨ଜଣ ତାଙ୍କ ପକେଟ୍‌ରୁ ପର୍ସ, ଫୋନ୍‌ ଓ ହାତରୁ ମୁଦି ବାହାର କରି ନେଇଥିଲେ। ପର୍ସରେ ୨୦ ହଜାର ଟଙ୍କା ଥିଲା। ପର୍ସ ଛଡ଼ାଉଥିବା ବେଳେ ସେ ପ୍ରତିରୋଧ କରିବାରୁ ଜଣେ ରଡ୍‌ରେ ତାଙ୍କ ମୁଣ୍ଡକୁ ପିଟିଦେଇଥିଲା। ମୁଣ୍ଡ ଫାଟିଯିବାରୁ ପତିତପାବନ ପର୍ସ ଛାଡ଼ିଦେଇଥିଲେ। ଏହାପରେ ଦୁର୍ବୃତ୍ତମାନେ ସେଠାରୁ ପଳାଇଥିଲେ। ଖବର ପାଇ ଟ୍ରକ୍‌ ମାଲିକ ଘଟଣାସ୍ଥଳରେ ପହଞ୍ଚି ପତିତପାବନଙ୍କୁ ଡାକ୍ତରଖାନା ନେଇଥିଲେ।