ଛିନ୍ତାଇ ମାମଲାରେ ୨ ଗିରଫ, ଚାପଡ଼, କଟୁରି ଓ ଟଙ୍କା ଜବତ
ବାଲିଅନ୍ତା : ସ୍ଥାନୀୟ ଅଞ୍ଚଳରେ କାମ କରୁଥିବା ଘରୋଇ ଫାଇନାନ୍ସ କର୍ମଚାରୀଙ୍କୁ ଟାର୍ଗେଟ୍ କରି ଲୁଟ୍ କରୁଥିବା ଏକ ୪ ଜଣିଆ ଗ୍ୟାଙ୍ଗ୍ର ଦୁଇ ଜଣଙ୍କୁ ଗତକାଲି ରାତିରେ ବାଲିଅନ୍ତା ଥାନା ପୁଲିସ ଗିରଫ କରିବାରେ ସଫଳ ହୋଇଛି। ସେମାନେ ହେଲେ ସ୍ଥାନୀୟ ଯଶୁଆପୁର ଗ୍ରାମର ପର୍ଶୁରାମ ଭୋଇ ଓ ଗଡ଼ଶ୍ରୀରାମପୁର ଗ୍ରାମର ସୁଶାନ୍ତ କୁମାର ସାମଲ। ସେମାନଙ୍କ ନିକଟରୁ ନଗଦ ୧୫ ହଜାର ଟଙ୍କା ସମେତ ଛିନ୍ତାଇ ବେଳେ ବ୍ୟବହାର କରୁଥିବା ଗୋଟିଏ ପଲ୍ସର ବାଇକ୍, ଗୋଟିଏ ଚାପଡ଼ ଓ ଗୋଟିଏ କଟୁରି ଜବତ କରିଛି। ଜାମିନ ଖାରଜ ହେବା ପରେ ସେମାନଙ୍କୁ ଝାରପଡ଼ା ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ ଗତ ୪ ଦିନ ତଳେ ଯଶୁଆପୁର ନିଛାଟିଆ ରାସ୍ତାରେ ଫାଇନାନ୍ସ ସଂସ୍ଥାର ଜଣେ ମହିଳା କର୍ମଚାରୀ ଲୁଟ୍ର ଶିକାର ହୋଇଥିଲେ। ଦୁର୍ବୃତ୍ତମାନେ ଚଳନ୍ତା ଅବସ୍ଥାରେ ସ୍କୁଟିକୁ ଗୋଇଠା ମାରି ଯୁବତୀଙ୍କୁ ତଳେ ପକାଇ ଦେଇଥିଲେ ଓ ତାଙ୍କ ଠାରୁ ୩୦ ହଜାର ଟଙ୍କା ଲୁଟି ନେଇ ଫେରାର୍ ହୋଇଯାଇଥିଲେ। ଅଭିଯୋଗ ପରେ ପୁଲିସ ସ୍ଥାନୀୟ ଅଞ୍ଚଳରୁ ସିସିଟିଭି ଫୁଟେଜ୍ ସଂଗ୍ରହ କରି ଛାନ୍ଭିନ୍ କରିଥିଲା। ଏକ ସିସିଟିଭି ଫୁଟେଜ୍ରୁ ପୁଲିସ ପର୍ଶୁରାମ ଓ ସୁଶାନ୍ତକୁ ଚିହ୍ନଟ କରିବା ପରେ ଗତକାଲି ରାତିରେ ଥାନା ଅଧିକାରୀ ପ୍ରଦୀପ କୁମାର ରାଉତ ସଦଳବଳେ ଏକ ଆଡ଼ାରେ ଚଢ଼ଉ କରି ସେମାନଙ୍କୁ ଉଠାଇଥିଲେ। ସେମାନଙ୍କଠାରୁ ଚୋରିରେ ବ୍ୟବହୃତ ବାଇକ୍ ସହ ନଗଦ ଟଙ୍କା ଓ ମାରଣାସ୍ତ୍ର ଜବତ ହୋଇଥିଲା। ଆଇଆଇସି ଶ୍ରୀ ରାଉତଙ୍କ ସୂଚନାନୁସାରେ ଏହି ରୢାକେଟ୍ରେ ୪ ଜଣ ସଂପୃକ୍ତ। ଅନ୍ୟ ଦୁଇ ଜଣଙ୍କୁ ଖୁବ୍ ଶୀଘ୍ର ଗିରଫ କରାଯିବ।