ଭୁବନେଶ୍ବର : ଲୁଟପାଟ୍‌ କରି ଆତଙ୍କ ଖେଳାଉଥିବା ଏକ ଲୁଟେରା ଗ୍ୟାଙ୍ଗକୁ ଲକ୍ଷ୍ମୀସାଗର ଥାନା ପୁଲିସ ଠାବ କରିଛି। ଗ୍ୟାଙ୍ଗର ଦୁଇଜଣଙ୍କୁ ଗିରଫ କରିବା ସହ ୫ଟି ବାଇକ୍‌ ଜବତ କରିଛି। ସେମାନେ ହେଲେ, ଲକ୍ଷ୍ମୀସାଗର କୁଲିସାହି ଅଞ୍ଚଳର ମହେଶ୍ବର ସାହୁ ଓରଫ ବୁଲୁ(୨୫) ଓ କଦଳୀଗୋଦାମ ବସ୍ତିର ଏମ୍‌ ମଙ୍ଗୁଳୁରାଓ(୨୬)। ପୁଲିସ ସୂଚନା ମୁତାବକ, ଗତ ୮ତାରିଖ ରାତିରେ ବୁଲୁ ଓ ମଙ୍ଗୁଳୁ ଲକ୍ଷ୍ମୀସାଗର ଅଞ୍ଚଳର ପିଣ୍ଟୁ ଦାସଙ୍କ ଗେଟ୍‌ ଭାଙ୍ଗି ତାଙ୍କ ବାଇକ୍‌ ନେଇ ଯାଇଥିଲେ। ପରଦିନ ସକାଳୁ ଗେଟ୍‌ ଭଙ୍ଗାଯାଇଥିବା ଓ ବାଇକ୍‌ ଚୋରି ହୋଇଥିବା ଜାଣିବା ପରେ ପିଣ୍ଟୁ ଲକ୍ଷ୍ମୀସାଗର ଥାନାରେ ଅଭିଯୋଗ କରିଥିଲେ। ଏନେଇ ଲକ୍ଷ୍ମୀସାଗର ଥାନା ପୁଲିସ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିଲା। ଆଜି ପୁଲିସ ଉଭୟଙ୍କୁ ଗିରଫ କରିବା ସହ ବିଭିନ୍ନ ଦିଗ ଉପରେ ଜେରା କରିଥିଲା। ତେବେ ସେମାନେ ଅନ୍ୟସ୍ଥାନରୁ ବାଇକ୍‌ ଚୋରି କରିଥିବା ଜେରା ବେଳେ ମାନିଥିଲେ। ପରେ ପୁଲିସ ସେମାନଙ୍କଠାରୁ ୫ଟି ଚୋରା ବାଇକ୍‌କୁ ଜବତ କରିଥିଲା। ବାଇକ୍‌ ଜବତ ପରେ ପୁଲିସ ସେମାନଙ୍କୁ କୋର୍ଟଚାଲାଣ କରିଛି।