ବିଚାର ବିଭାଗୀୟ ହାଜତରେ ଉଦିତ

ଭୁବନେଶ୍ବର: ନିଶାଯୁକ୍ତ ମୃଦୁ ପାନୀୟ ଦେଇ ହୋଟେଲ୍‌ରେ ଜଣେ ଛାତ୍ରୀଙ୍କୁ ଦୁଷ୍କର୍ମ କରିଥିବା ଅଭିଯୋଗରେ ଛାତ୍ର କଂଗ୍ରେସ ସଭାପତି ଉଦିତ ନାରାୟଣ ପ୍ରଧାନଙ୍କୁ ଆଜି ‌ଜେଲ୍‌ ଯିବାକୁ ପଡ଼ିଛି। ସେହିପରି ତାଙ୍କର ଜଣେ ବନ୍ଧୁ ଖଣ୍ଡଗିରି ବିହାର ଅଞ୍ଚଳର ଆୟୁଷ୍ମାନ ସାହୁ ଓରଫ ଶ୍ରୀୟାଂଶ (୧୯)ଙ୍କୁ ଗିରଫ କରାଯାଇଛି। ଗତକାଲି ରାତିରୁ ମଞ୍ଚେଶ୍ବର ଥାନା ପୁଲିସ ଉଦିତଙ୍କୁ ଅଟକ ରଖିଥିଲା ଏବଂ ଆଜି ତାଙ୍କୁ  କୋର୍ଟ ଚାଲାଣ କରିଛି। କେସ୍‌ ନଂ-୪୧୯ରେ ବିଏନ୍‌ଏସ୍‌ ଦଫା ୬୪(୧) -ବଳପୂର୍ବକ ସମ୍ମତି ନେବା, ୧୨୩- ଦୁଷ୍କର୍ମ, ୨୯୬ - ନିଶା ଦ୍ରବ୍ୟ ପ୍ରୟୋଗ କରି ଦୁଷ୍କର୍ମ କରିବା, ୭୪ -ଅପରାଧ ଲୁଚାଇବା କିମ୍ବା ପ୍ରମାଣ ନଷ୍ଟ କରିବାକୁ ଉଦ୍ୟମ କରିବା, ୩୫୧(୨)- ମହିଳା ହିଂସା ଏବଂ ଅମାନବିକ ଅପରାଧ ଭଳି ୫ଟି ସଙ୍ଗିନ୍‌ ଦଫା ଲଗାଇ ପୁଲିସ ଉଦିତଙ୍କୁ କୋର୍ଟ ଚାଲାଣ କରିଥିଲା। ଜାମିନ ଖାରଜ ହେବାରୁ ତାଙ୍କୁ ଝାରପଡ଼ା ଜେଲ୍‌ ହାଜତକୁ ପଠାଇ ଦିଆଯାଇଛି। ଏବେ ପୀଡ଼ିତାଙ୍କ ପ୍ରତି ବିପଦ ଆଶଙ୍କା ଥିବାରୁ ତାଙ୍କୁ ସୁରକ୍ଷା ଯୋଗାଇ ଦିଆଯିବ ବୋଲି ଆଜି ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଏସିପି ବିଶ୍ବ ରଂଜନ ସେନାପତି ଗଣମାଧ୍ୟମକୁ କହିଛନ୍ତି। 
ଏସିପି ଶ୍ରୀ ସେନାପତିଙ୍କ ସୂଚନାନୁସାରେ ମାମଲାରେ ପୁଲିସ ୫ ଜଣଙ୍କ ବୟାନ ରେକର୍ଡ କରିଛି। ପ୍ରଥମେ ଥାନାରେ ବିଏନ୍‌ଏସ୍‌ଏସ୍‌ ଦଫା ୧୮୦ରେ ପୀଡ଼ିତାଙ୍କ ବୟାନ ରେକର୍ଡ କରାଯାଇଥିଲା। ଏହାର ଭିଡିଓ ଓ ଅଡିଓ ରେକର୍ଡ କରାଯାଇ‌ କୋର୍ଟରେ ଦାଖଲ କରାଯାଇଛି। ସେହିପରି ଆଜି ମଧ୍ୟ କୋର୍ଟରେ ବିଏନ୍‌ଏସ୍‌ଏସ୍‌ ୧୮୩ରେ ପୀଡ଼ିତାଙ୍କ ବୟାନ ରେକର୍ଡ କରାଯାଇଛି। କେବଳ ସେତିକି ନୁହେଁ, ଘଟଣା ଦିନ ଯେଉଁମାନେ ପୀଡ଼ିତାଙ୍କ ସହ ଥିଲେ, ସେମାନଙ୍କ ମଧ୍ୟରୁ ୨ଜଣ ଓ ହୋଟେଲ୍‌ର ୨ଜଣ କର୍ମଚାରୀଙ୍କ ବୟାନ ରେକର୍ଡ କରାଯାଇଛି ବୋଲି ଏସିପି କହିଛନ୍ତି। ସେହିଭଳି ଯେଉଁ ହୋଟେଲ୍‌ରେ ଛାତ୍ରୀ ଦୁଷ୍କର୍ମର ଶିକାର ହୋଇଥିବା ଅଭିଯୋଗରେ ଦର୍ଶାଇଛନ୍ତି, ପୁଲିସ ଟିମ୍‌ ସେହି ହୋଟେଲ୍‌କୁ ଯାଇ ଛାନ୍‌ଭିନ୍‌ କରିଛନ୍ତି। ସେହି ଦିନର ସିସିଟିଭି ଫୁଟେଜ୍‌ ଯାଞ୍ଚ କରିବା ସହ ରେଜିଷ୍ଟର ବୁକ୍‌ ଯାଞ୍ଚ କରାଯାଇଛି। 
ପୀଡ଼ିତାଙ୍କ ଅଭିଯୋଗ ଅନୁସାରେ ଚଳିତ ବର୍ଷ ମାର୍ଚ୍ଚ ୧୮ତାରିଖ ଅପରାହ୍ଣରେ ପୀଡ଼ିତା ତାଙ୍କର ଜଣେ ବାନ୍ଧବୀ ଓ ଜଣେ ସହପାଠୀଙ୍କ ସହ ମିଶି ମାଷ୍ଟରକ୍ୟାଣ୍ଟିନ୍‌ ଛକକୁ ବୁଲିବାକୁ ଯାଇଥିଲେ। ସେଠାରେ ସହପାଠୀ ଜଣଙ୍କ ଉଦିତଙ୍କୁ ସେମାନଙ୍କ ସହ ପରିଚିତ କରାଇଥିଲେ। ଏହାପରେ ସେମାନେ ମଞ୍ଚେଶ୍ବରସ୍ଥିତ ଏକ ହୋଟେଲ୍‌କୁ ଯାଇଥିଲେ। ହୋଟେଲ୍‌ରେ ସେମାନେ ମଦ ପିଇଥିଲେ। କିନ୍ତୁ ପୀଡ଼ିତା ମଦ ପିଇବାକୁ ମନା କରିବାରୁ ଉଦିତ ତାଙ୍କୁ ମୃଦୁ ପାନୀୟ ପିଇବାକୁ ଦେଇଥିଲେ। ମୃଦୁ ପାନୀୟରେ ନିଶା ମିଶିଥିବାରୁ ସେ ସଂଜ୍ଞାହୀନ ହୋଇପଡ଼ିଥିଲେ। ଏହି ମଉକାରେ ଉଦିତ ତାଙ୍କୁ ଦୁଷ୍କର୍ମ କରିଥିଲେ ବୋଲି ପୀଡ଼ିତା କହିଛନ୍ତି। ଉଦିତ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ ତାଙ୍କ ବିରୋଧରେ ଗଭୀର ଷଡ୍‌ଯନ୍ତ୍ର କରାଯାଇଛି ଏବଂ ଫସାଇ ଦିଆଯାଇଛି। ଏକ ନିର୍ଦ୍ଦିଷ୍ଟ ରାଜନୈତିକ ଦଳ ଓ ଛାତ୍ର ସଂଗଠନ ଏଭଳି ଷଡ୍‌ଯନ୍ତ୍ର କରିଛନ୍ତି। କିନ୍ତୁ ପ୍ରକୃତ ସତ କ’ଣ, କୋର୍ଟରେ ପର୍ଦ୍ଦାଫାସ୍‌ ହୋଇଯିବ।

ଛାତ୍ର କଂଗ୍ରେସ ସଭାପତି ପଦବିରୁ ନିଲମ୍ବିତ

ଦୁଷ୍କର୍ମ ଅଭିଯୋଗରେ ଗିରଫ ହୋଇଥିବା ଛାତ୍ର କଂଗ୍ରେସ ସଭାପତି ଉଦିତ ପ୍ରଧାନଙ୍କୁ ନେଇ ଅଡ଼ୁଆରେ ପଡ଼ିଥିବା କଂଗ୍ରେସ ଆଜି ତାଙ୍କୁ ପଦରୁ ନିଲମ୍ବିତ କରିଛି। ଏନ୍‌ଏସ୍‌ୟୁଆଇ ଜାତୀୟ ସଭାପତି ବରୁଣ ଚୌଧୁରୀ ଏକ ପ୍ରେସ୍ ବିବୃତି ଜାରି କରି ନିଲମ୍ବନ ସଂପର୍କରେ ସୂଚନା ଦେଇଛନ୍ତି। ଶ୍ରୀ ଚୌଧୁରୀ କହିଛନ୍ତି ଯେ ଲିଙ୍ଗଭିତ୍ତିକ ଅନ୍ୟାୟ ପ୍ରତି ଏନ୍‌ଏସ୍‌ୟୁଆଇ ଶୂନ୍ୟ ସହନଶୀଳତା ଅବଲମ୍ବନ କରିଆସୁଛି। ନିକଟରେ ଘଟିବା ଘଟଣା ପାଇଁ ଶ୍ରୀ ପ୍ରଧାନଙ୍କୁ ତୁରନ୍ତ ପଦରୁ ନିଲମ୍ବିତ କରାଯାଇଛି। ତେବେ ବାଲେଶ୍ବର ପୀଡ଼ିତାଙ୍କୁ ନ୍ୟାୟ ପ୍ରଦାନ କରିବା ଲାଗି ଲଢ଼େଇ ଜାରି ରହିବ। ଅପରପକ୍ଷରେ ଉଦିତ ପ୍ରଧାନଙ୍କ ଗିରଫ ପରିପ୍ରେକ୍ଷୀରେ ତଥ୍ୟ ଅନୁଧ୍ୟାନ କରିବା ପାଇଁ ପିସିସି ସଭାପତି ଭକ୍ତ ଚରଣ ଦାସ ଏକ ତଥ୍ୟ ଅନୁଧ୍ୟାନ କମିଟି ଗଠନ କରିଛନ୍ତି। ପିସିସି ଉପସଭାପତି ସସ୍ମିତା ବେହେରା ଏହି କମିଟିର ଅଧ୍ୟକ୍ଷା ରହିଛନ୍ତି। ଅନ୍ୟମାନଙ୍କ ମଧ୍ୟରେ ବିଧାୟିକା ସୋଫିଆ ଫିର‌ଦୋସ, ମୁଖପାତ୍ର ଜୟଶ୍ରୀ ପାତ୍ର, ଦେବସ୍ମିତା ଶର୍ମା, ସୋନାଲି ସାହୁ ଓ ମୁଖପାତ୍ର ମନିଶା ଦାସପଟ୍ଟନାୟକ ସଦସ୍ୟ ରହିଛି। କମିଟି ଖୁବଶୀଘ୍ର ଅଭିଯୋଗକାରିଣୀଙ୍କୁ ଭେଟି ତାଙ୍କ ସହ ଆଲୋଚନା କରିବେ। ଏହା ସଂପର୍କିତ ଏକ ରିପୋର୍ଟ ପ୍ରଦେଶ କଂଗ୍ରେସ କାର୍ଯ୍ୟାଳୟରେ ଦାଖଲ କରିବା ପାଇଁ ନିର୍ଦ୍ଦେଶ ଦିଆଯାଇଥିବା କଂଗ୍ରେସ କାର୍ଯ୍ୟାଳୟ ପ୍ରଶାସକ ସମୀର ରାଉତରାୟ ଏକ ପ୍ରେସ୍ ବିଜ୍ଞପ୍ତିରେ ଜଣାଇଛନ୍ତି। 
ଉଲ୍ଲେଖ ଯେ ଗତ ମାର୍ଚ୍ଚ ୧୮ ତାରିଖରେ ମୃଦୁ ପାନୀୟରେ ନିଶା ଦେଇ ହୋଟେଲରେ ଜଣେ ଛାତ୍ରୀଙ୍କୁ ଦୁଷ୍କର୍ମ କରିବା ଅଭିଯୋଗରେ ପୁଲିସ ଗତକାଲି ଉଦିତ ପ୍ରଧାନଙ୍କୁ ଗିରଫ କରିଥିଲା। ଆଜି ତାଙ୍କୁ କୋର୍ଟ ଚାଲାଣ କରାଯାଇଛି।