ଖଣ୍ଡଗିରି: ୟୁନିଟ-୧ ହାଟରେ ଥିବା ହୋଲ୍‌ସେଲ୍ ପରିବା ମାର୍କେଟ୍‌ ସମସ୍ୟା ଦୂର ହୋଇପାରୁ ନାହିଁ। ବାହାର ରାଜ୍ୟରୁ ଆସୁଥିବା ପରିବା ଟ୍ରକ୍‌ଗୁଡ଼ିକ ସହର ଭିତରକୁ ପ୍ରବେଶ ନେଇ କଟକଣା ଯୋଗୁ ବ୍ୟବସାୟୀମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି। ତେଣୁ ଏହାର ସ୍ଥାୟୀ ସମାଧାନ ଉଦ୍ଦେଶ୍ୟରେ ପରିବା ହୋଲସେଲ୍ ମାର୍କେଟ୍‌କୁ ରାଜଧାନୀ ଉପକଣ୍ଠ ଭଗବାନପୁରକୁ ସ୍ଥାନାନ୍ତର କରିବାକୁ ଯୋଜନା ହୋଇଥିଲା। ମାତ୍ର ତାହା ଆଜି ପର୍ଯ୍ୟନ୍ତ କାର୍ଯ୍ୟକାରୀ ହୋଇପାରି ନାହିଁ। କେବେ ଜମି ଅଡ଼ୁଆ ତ ଆଉ କେବେ ଜବରଦଖଲ ସମସ୍ୟା ବାଟ ଓଗାଳିଛି। ମାର୍କେଟ ପାଇଁ ସାଧାରଣ ପ୍ରଶାସନ ବିଭାଗ ପକ୍ଷରୁ ସାଢ଼େ ୯ ଏକର ଜମି ଅବଣ୍ଟନ ହୋଇଥିଲା। ସେଥିମଧ୍ୟରୁ ଗୋଟିଏ ଏକର ଜମିରେ ବିଏମ୍‌ସି ପକ୍ଷରୁ ମାଇକ୍ରୋ କମ୍ପୋଷ୍ଟ ସେଣ୍ଟର୍‌(ଏମ୍‌ସିସି) ନିର୍ମାଣ ହୋଇଛି। ବାକି ଯେତିକି ଜମି ରହିଛି ତାହାର ସଦ୍‌ବିନିଯୋଗ କରିବା ଦିଗରେ କେହି ଆନ୍ତରିକତା ଦେଖାଉ ନାହାନ୍ତି। ବିଏମ୍‌ସି, ବିଡିଏ ଓ ବ୍ୟବସାୟୀମାନଙ୍କ ମଧ୍ୟରେ ସମନ୍ବୟ ଅଭାବରୁ ପ୍ରସ୍ତାବିତ ପରିବା ବଜାର ଏବେ ଅନିଶ୍ଚିତତା ଭିତରକୁ ଠେଲି ହୋଇଯାଉଛି।

Advertisment

ୟୁନିଟ-୧ ହାଟରେ ଖୁଚୁରା ସହ ହୋଲସେଲ୍ ପରିବା ବ୍ୟବସାୟ ଚାଲୁଥିବାରୁ ବ୍ୟବସାୟୀମାନେ ଅସୁବିଧାର ସମ୍ମୁଖୀନ ହୋଇଥିଲେ। ତେଣୁ ହୋଲ୍‌ସେଲ୍‌ ପରିବା ମାର୍କେଟ୍‌ ସ୍ଥାନାନ୍ତର କରିବାକୁ ୨୦୧୦ରୁ ଦାବି ହେଉଥିଲେ ମଧ୍ୟ ସମସ୍ୟାର ସମାଧାନ ହୋଇ ନ ଥିଲା। ସ୍ଥିତି ଅଣାୟତ୍ତ ହେବାରୁ ୨୦୧୯ରେ ୟୁନିଟ-୧ ହାଟରେ ଥିବା ହୋଲ୍‌ସେଲ୍‌ ପରିବା ମାର୍କେଟ୍‌ ଭଗବାନପୁରକୁ ଉଠାଇ ନେବାକୁ ବିଏମ୍‌ସି କସରତ ଆରମ୍ଭ କରିଥିଲା। ସାଧାରଣ ପ୍ରଶାସନ ବିଭାଗ ପକ୍ଷରୁ ଏଥିପାଇଁ ବିଏମ୍‌ସିକୁ ଭଗବାନପୁରରେ ଦୁଇଟି ପର୍ଯ୍ୟାୟରେ ସାଢ଼େ ୯ ଏକର ଜାଗା ଯୋଗାଇ ଦେଇଥିଲା। ୨୦୨୨ରେ ୭.୨୧ ଏକର ଜମିରେ ଶତାଧିକ ଗଛ କଟି ବିଏମ୍‌ସି ପାଚେରି ନିର୍ମାଣ କରିଥିଲେ ମଧ୍ୟ ଏପର୍ଯ୍ୟନ୍ତ ସେହି ସ୍ଥାନ କାମରେ ଲାଗିପାରି ନାହିଁ।

ୟୁନିଟ୍-୧ ବ୍ୟବସାୟୀ ସଂଘ ସଭାପତି କବିରାଜ ସ୍ୱାଇଁ କହିଛନ୍ତି ହୋଲ୍‌ସେଲ ହାଟ ପାଇଁ ସାଧାରଣ ପ୍ରଶାସନ ବିଭାଗ ଦେଇଥିବା ୯ ଏକର ଜାଗାରୁ ଗୋଟିଏ ଏକର ଜମିରେ ଏବେ ଅଳିଆ ପ୍ଲାଣ୍ଟ ହୋଇଛି। ବାକି ଜମିରେ ବ୍ୟବସାୟ କରିବାକୁ ଯଦି ଆମକୁ କେବଳ ଲିଖିତ ଅନୁମତି ଦିଆଯିବ, ତାହେଲେ ଆମେ ସେଠାରେ ଘର କରି ବେପାର କରିବୁ। ବିଏମସି ଏଠାରେ ମାର୍କେଟ କମ୍ପ୍ଲେକ୍ସ କରିବାକୁ ଯେଉଁ ଯୋଜନା କରିଥିଲା ସେଥିରେ ତଳ ମହଲା ପରିବା ଗୋଦାମ ଓ ଉପରେ ମାର୍କେଟ କମ୍ପ୍ଲେକ୍ସ ରହିଥାନ୍ତା। କିନ୍ତୁ ଏମିତି କଲେ ପରିବା ଗୋଦାମ ସମ୍ଭବପର ହେବ ନାହିଁ ବୋଲି ଆମେ କହିଥିଲୁ। ସେମାନେ ଆଇଗିଣିଆଠାରେ ଅନୁଧ୍ୟାନ କରିବା ପରେ ଜାଣିପାରିଲେ ଯେ ପରିବା ଗୋଦାମ ବ୍ୟତୀତ ସେଠାରେ ଆଉ କିଛି ହୋଇପାରିବ ନାହିଁ। ତେଣୁ ଏବେ ସମ୍ପୂର୍ଣ୍ଣ ଜମିରେ କେବଳ ପରିବା ହୋଲ୍‌ସେଲ୍ ମାର୍କେଟ୍‌ ହିଁ ହୋଇପାରିବ। ଏବେ ସହର ମଧ୍ୟକୁ ବଡ଼ ଗାଡ଼ି ପ୍ରବେଶ ଉପରେ ବିଭିନ୍ନ ସମୟରେ ପୁଲିସ କଟକଣା ଲଗାଉଥିବାରୁ ବ୍ୟବସାୟୀମାନେ ହଇରାଣ ହେଉଛନ୍ତି। ଦୈନିକ ଶହେରୁ ଅଧିକ ଗାଡ଼ି ଭୁବନେଶ୍ୱର ଆସୁଛି। ସେଥିରୁ ପ୍ରାୟ ୫୦ ଗାଡ଼ି ସହର ଭିତରକୁ ପ୍ରବେଶ କରୁଛି ଏବଂ ଅନ୍ୟଗୁଡ଼ିକ ଆଇଗିଣିଆଠାରେ ଜାତୀୟ ରାଜପଥରେ ଅଟକି ରହୁଛି। ଏହାଦ୍ବାରା ଆମେ ବାରମ୍ବାର ଅସୁବିଧାରେ ପଡ଼ୁଛୁ ବୋଲି ସେ ଅଭିଯୋଗ କରିଛନ୍ତି।

ଏସମ୍ପର୍କରେ ବିଏମ୍‌ସି ଡେପୁଟି କମିସନର ରୁବି ବେହେରା କହିଛନ୍ତି ଯେ ହାଟ ସ୍ଥାନାନ୍ତର ନେଇ ସମସ୍ତ ଅଧିକାରୀଙ୍କ ସହିତ ନିକଟରେ ଏକ ବୈଠକ ଅନୁଷ୍ଠିତ ହୋଇଥିଲା। ୧ ନମ୍ବର ହାଟରୁ ବ୍ୟବସାୟୀଙ୍କୁ ଭଗବାନପୁର ସ୍ଥାନାନ୍ତର ପରେ ହିଁ ହାଟର ଉନ୍ନତି ମୂଳକ କାମ କରାଯିବ। ତେଣୁ ଏଥିପାଇଁ ସମସ୍ତ ରୂପରେଖ ପ୍ରସ୍ତୁତ ହେଉଛି। ପୂର୍ବରୁ ହୋଇଥିବା ଯୋଜନାରେ ବ୍ୟବସାୟୀମାନେ ଅରାଜି ହୋଇଥିବାରୁ ଏନେଇ ନୂତନ କମିସନରଙ୍କ ସହିତ ଆଉଥରେ ଆଲୋଚନା କରାଯିବ। ଏହାପରେ ଖୁବ୍‌ଶୀଘ୍ର ଆରମ୍ଭ ହେବ ବୋଲି ସେ କହିଛନ୍ତି।