ଭୁବନେଶ୍ବର: ରାଜଧାନୀ ଭୁବନେଶ୍ବରର ସବୁଠୁ ବଡ଼ ହାଟ ହେଉଛି ୟୁନିଟ୍-୧ ହାଟ(ଏକ ନମ୍ବର ହାଟ)। ପନିପରିବାଠାରୁ ଆରମ୍ଭ କରି ପୋଷାକପତ୍ର, ଘରକରଣା, ଇଲେକ୍ଟ୍ରୋନିକ୍ସ ସାମଗ୍ରର ଭଣ୍ଡାର ଏଠାରେ ରହିଛି। ପ୍ରତିଦିନ ରାତି ପାହିଲେ, କ୍ବିଣ୍ଟାଲ୍ କ୍ବିଣ୍ଟାଲ୍ ପନିପରିବା ଭର୍ତ୍ତି ଗାଡ଼ିର ଭିଡ଼ ଲାଗୁଛି। ଖୋର୍ଦ୍ଧା ଜିଲ୍ଲା ସହ ପୁରୀ, କଟକ ଓ ଆଖପାଖ ଜିଲ୍ଲାର ଚାଷୀଙ୍କଠାରୁ ସଜ ପନିପରିବା ସହ ବେଙ୍ଗାଲୁର ଓ ଅନ୍ୟ ରାଜ୍ୟରୁ ପରିବା ଆସି ଏଠାରେ ପହଞ୍ଚୁଛି। ପ୍ରତିଦିନ ୧ ନମ୍ବର ହାଟରେ ଗହଳଚହଳ ଲାଗି ରହେ। ସକାଳେ ଓ ସଂଧ୍ୟାରେ ସର୍ବାଧିକ ଭିଡ଼ ଲାଗେ। କିନ୍ତୁ ହାଟକୁ ଗଲେ ଟ୍ରାଫିକ୍ରେ ରୁନ୍ଧି ହୋଇ ଯାଉଛନ୍ତି ଲୋକେ। ପାର୍କିଂ ଅବ୍ୟବସ୍ଥାରୁ ଦୈନିକ ଏଠାରେ ଲୋକେ କଲବଲ ହେଉଛନ୍ତି। ସ୍ଥିତି ଏପରି ଯେ ଲୋକେ ରାଜପଥ ଉପରେ ଗାଡ଼ି ପାର୍କିଂ କରିବାକୁ ବାଧ୍ୟ ହେଉଛନ୍ତି।
ଅପରପକ୍ଷେ ବିଏମ୍ସି ଯେଉଁ ସବୁ ପାର୍କିଂ ସ୍ଥାନ ଚିହ୍ନଟ କରିଛି, ସେଠାରେ ଦୋକାନୀମାନେ ବେପାର ଆରମ୍ଭ କରିଦେଲେଣି। ଏଥିପାଇଁ ଦୋକାନୀମାନେ ଦଲାଲ ଓ ବିଏମ୍ସିର ଅଧିକାରୀଙ୍କୁ ମୋଟା ଅଙ୍କର ଚାନ୍ଦା ଗଣୁଥିବା ଅଭିଯୋଗ ହୋଇଛି। ପାର୍କିଂର ଟେଣ୍ଡର ନେଇଥିବା ଲୋକେ ଏଠାରେ ବେପାର କରିବାର ସୁଯୋଗ ଦେଇ ପାର୍କିଂ ସମସ୍ୟାକୁ ଅଧିକ ଜଟିଳ କରୁଛନ୍ତି। ସ୍ଥିତି ଦେଖି ରାସ୍ତାକଡ଼ରେ କିଛି ଜାଗାରେ ଗାଡ଼ି ପାର୍କିଂ ବ୍ୟବସ୍ଥା କରାଯାଇଥିଲା। ତଥାପି ଅମାନିଆ ଦୋକାନୀମାନେ ଏହାକୁ ବି ନିଜ ଦଖଲକୁ ନେଇଗଲେଣି। ବଡ଼କଥା ହେଉଛି, ହାଟକୁ ଲାଗି ଥିବା ମହିଳା ଥାନାକୁ ବି ଦୋକାନୀମାନେ ଛାଡ଼ିନାହାନ୍ତି। ଥାନା ସମ୍ମୁଖ ଓ ପାର୍ଶ୍ବକୁ ଦଖଲକୁ ନେଇଗଲେଣି। ଥାନା ଚାରିପାଖରେ ବି ମାଳମାଳ ବେଆଇନ୍ ପାର୍କିଂ। ଟ୍ରାଫିକ୍ ଓ ପାର୍କିଂ ସମସ୍ୟା ଦୂର ପାଇଁ ବିଏମ୍ସି ପକ୍ଷରୁ ୟୁନିଟ୍-୨ ହାଟ ପାର୍ଶ୍ବରେ ବହୁତଳ ପାର୍କିଂ ବ୍ୟବସ୍ଥା କରାଯାଇଛି। କିନ୍ତୁ ଏହି ପାର୍କିଂ ସର୍ବଦା ଖାଲି ପଡ଼ୁଛି। ଏ ଉପରେ ନଜର ରଖିବାକୁ ବିଏମ୍ସିର ସ୍ବତନ୍ତ୍ର ଅଧିକାରୀ ଓ ଏନ୍ଫୋର୍ସମେଣ୍ଟ ଟିମ୍ ରହିଛନ୍ତି। କିନ୍ତୁ ଏମାନେ ବେପାରୀ ଓ ପାର୍କିଂ ଟେଣ୍ଡର ନେଇଥିବା ଲୋକଙ୍କ ସହ ହାତ ମିଳାଇ, ଏଭଳି ବେଆଇନ୍ କାମକୁ ପ୍ରଶ୍ରୟ ଦେଉଥିବା ଅଭିଯୋଗ ହୋଇଛି।
ସପ୍ତାହକୁ ୬ ଦିନ ସକାଳୁ ରାତି ୧୦ଟା ପର୍ଯ୍ୟନ୍ତ ଖୋଲା ରହୁଛି ଏକନମ୍ବର ହାଟ। ଉଭୟ ପାଇକାରୀ ଓ ଖୁଚୁରା ବେପାରୀ ଏଠାରେ ବେପାର କରି ଆସୁଛନ୍ତି। ଯେହେତୁ ସହରର ଏହା ସବୁଠୁ ବଡ଼ ମାର୍କେଟ୍, ଏଠାରେ ଦୈନିକ ହଜାର ହଜାର ସଂଖ୍ୟାରେ ଗ୍ରାହକଙ୍କ ଭିଡ଼ ଲାଗୁଛି। ରାଜମହଲରୁ ଏଜି ଛକ ଭିତରେ ହାଟକୁ ପ୍ରବେଶ ଓ ପ୍ରସ୍ଥାନ ପାଇଁ ୫ରୁ ଅଧିକ ବାଟ ରହିଛି। ଯେଉଁ ଗ୍ରାହକମାନେ ଆସୁଛନ୍ତି, ସେମାନଙ୍କ ଗାଡ଼ି ପାର୍କିଂ ପାଇଁ ମାର୍କେଟ୍ର ବିଭିନ୍ନ ପ୍ରବେଶ ପଥରେ ବିଏମ୍ସି ଏକାଧିକ ପାର୍କିଂ ବ୍ୟବସ୍ଥା କରିଛି ଓ ବିଏମ୍ସି ଏହାର ଟେଣ୍ଡର ବି ଦେଇଛି। କିନ୍ତୁ ଯେଉଁ ଜାଗାରେ ଗାଡ଼ି ରଖାଯିବା କଥା, ତାକୁ ବେପାରୀମାନେ ମାଡ଼ି ବସିଲେଣି। ଫଳମୂଳ ଆଦି ବିକ୍ରି କରୁଛନ୍ତି। ଯଦ୍ବାରା ପାର୍କିଂ ପାଇଁ ଜାଗା ଅଭାବ ଦେଖାଦେଇଛି। ଏଣୁ ଲୋକେ ବାଧ୍ୟ ହୋଇ ରାଜପଥ ଉପରେ ନୋ ପାର୍କିଂ ଜାଗାରେ ପାର୍କିଂ କରୁଛନ୍ତି। ସେପଟେ ରାଜପଥର ନୋ ପାର୍କିଂ ଜାଗାକୁ ବି ବେପାରୀମାନେ ମାଡ଼ି ବସିଲେଣି। ଏଣୁ ରାଜମହଲରୁ ଏଜି ଛକ ଯିବା କାଠିକର ହୋଇପଡ଼ୁଛି। ସାଧାରଣ ଲୋକେ ବି ଟ୍ରାଫିକ୍ରେ ଫସି କଲବଲ ହେଉଛନ୍ତି। ବିଏମ୍ସି ଦକ୍ଷିଣ-ପୂର୍ବ ଜୋନାଲ୍ ଡେପୁଟି କମିସନର୍ ରାଜଲକ୍ଷ୍ମୀ ନାୟକ କହିଛନ୍ତି, ଦୋକାନୀଙ୍କ ଅନୁରୋଧ ରକ୍ଷା କରି ମହିଳା ଥାନାଠାରୁ ଏଜି ଛକ ପର୍ଯ୍ୟନ୍ତ ଆମେ କେବଳ ଏକ ଧାଡ଼ିଆ ପାର୍କିଂ ପାଇଁ ଅନୁମତି ଦେଇଛୁ। କଳ୍ପନା ଛକରୁ ଏଜି ଛକ ପର୍ଯ୍ୟନ୍ତ ଏନ୍ଫୋର୍ସମେଣ୍ଟ ପାଇଁ ୨ଟି ଟିମ୍ ନିୟୋଜିତ ଅଛନ୍ତି। କିନ୍ତୁ ଦୋକାନୀ ଶୁଣୁନାହାନ୍ତି। ଆଜି ହଟାଇଲେ, କାଲି ପୁଣି ମାଡ଼ି ବସୁଛନ୍ତି ବୋଲି ଶ୍ରୀମତୀ ନାୟକ କହିଛନ୍ତି।
ଏକ ନମ୍ବର ହାଟ ସ୍ଥିତି ଅଣାୟତ୍ତ: ରୁନ୍ଧିଦେଲେଣି
ରାଜଧାନୀ ଭୁବନେଶ୍ବରର ସବୁଠୁ ବଡ଼ ହାଟ ହେଉଛି ୟୁନିଟ୍-୧ ହାଟ(ଏକ ନମ୍ବର ହାଟ)। ପନିପରିବାଠାରୁ ଆରମ୍ଭ କରି ପୋଷାକପତ୍ର, ଘରକରଣା, ଇଲେକ୍ଟ୍ରୋନିକ୍ସ ସାମଗ୍ରର ଭଣ୍ଡାର ଏଠାରେ ରହିଛି। ପ୍ରତିଦିନ ରାତି ପାହିଲେ, କ୍ବିଣ୍ଟାଲ୍ କ୍ବିଣ୍ଟାଲ୍ ପନିପରିବା ଭର୍ତ୍ତି...
/sambad/media/media_files/2025/07/17/qazxswedc-2025-07-17-06-00-19.jpg)