ଭୁବନେଶ୍ବର: ରାମମନ୍ଦିର ଖାଓଗଳିରେ ଦୋକାନ ଉଚ୍ଛେଦକୁ କେନ୍ଦ୍ର କରି ଆଜି ଉତ୍ତେଜନା ପ୍ରକାଶ ପାଇଛି। ଦୋକାନୀମାନେ ବିଏମ୍‌ସି ଅଧିକାରୀଙ୍କୁ ଘେରିବା ସହ ଆନ୍ଦୋଳନ କରିଛନ୍ତି। ବାଣୀବିହାର-ରାଜମହଲ ରାସ୍ତା ଅବରୋଧ କରି ନ୍ୟାୟ ମାଗିଛନ୍ତି। ଶେଷରେ ଜୋନାଲ୍ ଡେପୁଟି କମିସନର୍ ରାଜଲକ୍ଷ୍ମୀ ନାୟକ ଓ ଅନ୍ୟ ଅଧିକାରୀମାନେ ପହଞ୍ଚି ବୁଝାସୁଝା କରିବା ସହ ବୈଠକ ଡାକି ଆଲୋଚନା ପରେ ମାସିକ ୩ହଜାର ଟଙ୍କା ବିଏମ୍‌ସିକୁ ଦେବାକୁ ନିଷ୍ପତ୍ତି ପରେ କଳି ତୁଟିଛି। ଅପରପକ୍ଷେ ଆଜି ଖାଓଗଳି ଦୋକାନୀଙ୍କ ବିଜୁଳି ସଂଯୋଗ କାଟିଦେବାରୁ ସମସ୍ତ ଦୋକାନ ବନ୍ଦ ରହିଥିଲା। ଆସନ୍ତାକାଲିଠାରୁ ସମସ୍ତେ ଦୋକାନ ଖୋଲିବେ ବୋଲି ଖାଓଗଳି ଦୋକାନୀ ସଂଘ ସଭାପତି ରଶ୍ମିତା ଖଟେଇ କହିଛନ୍ତି।

Advertisment

ବିଏମ୍‌ସି ଅଧିକାରୀଙ୍କୁ ଘେରିଲେ ଦୋକାନୀ
ବାଣୀବିହାର-ରାଜମହଲ ରାସ୍ତା ଅବରୋଧ
କାଟିଦେଲେ ବିଜୁଳି, ବନ୍ଦ ରହିଲା ଦୋକାନ
ମାସକୁ ୩ହଜାର ଟଙ୍କାରେ ତୁଟିଲା କଳି

ଖାଓଗଳିରେ ୩୧ଜଣ ଦୋକାନ କରିଛନ୍ତି। ଦୋକାନରେ କେଉଁଠି ଫାଷ୍ଟଫୁଡ୍ ତ କେଉଁଠି ଅନ୍ୟାନ୍ୟ ସାମଗ୍ରୀ ବିକ୍ରି ହେଉଥିଲା। ପୂର୍ବରୁ ଅଳ୍ପ ଟଙ୍କା ଦେଇ ଦୋକାନୀମାନେ ଦୋକାନ ଖୋଲିଥିଲେ। ସଂଘ ସଭାପତି ଶ୍ରୀମତୀ ଖଟେଇ କହିଛନ୍ତି, ୨୦୨୨ ମସିହାରେ ଯେବେ ବିଏମ୍‌ସିର ନୂଆ ପରିଷଦ ଗଠନ ହେଲା, ସେବେ ସେମାନଙ୍କଠାରୁ ଜୋର ଜବରଦସ୍ତ ଦୋକାନ ପିଛା ୨୫ହଜାର ଟଙ୍କା ସିକ୍ୟୁରିଟି ଜମା ଓ ମାସିକ ୭ହଜାର ୨୦୦ ଟଙ୍କା ଭଡ଼ା ଆଦାୟ ହେଲା। କିନ୍ତୁ ଭେଣ୍ଡିଂ ଜୋନ୍ କି ଅନ୍ୟ ଭିତ୍ତିଭୂମି ପ୍ରସ୍ତୁତ କରାଗଲାନି। ଶେଷରେ ୨୦୨୩ ମସିହାରେ ଖାଓଗଳି ଦୋକାନୀମାନେ ମାସିକ ୭ହଜାର ୨୦୦ ଟଙ୍କା ଆଦାୟ ଅଧିକ ଓ ଏହାକୁ କମାଇବାକୁ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ହାଇକୋର୍ଟ ମାସିକ ଏତେ ଟଙ୍କା ଆଦାୟ ଉପରେ ଅନ୍ତରୀଣ ରହିତାଦେଶ ଜାରି କରିଥିଲେ। ପରେ ତଳ କୋର୍ଟଙ୍କୁ ଏହି ମାମଲାର ବିଚାର ପାଇଁ ନିର୍ଦ୍ଦେଶ ଦେଇଛନ୍ତି। ଯେହେତୁ କୋର୍ଟରେ ମାମଲା ବିଚାରାଧୀନ ଅଛି, ଦୋକାନୀମାନେ ମାସିକ ୭ହଜାର ୨୦୦ ଟଙ୍କା ଭଡ଼ା ଦେଇନଥିଲେ। କିନ୍ତୁ ହଠାତ୍ ଆଜି ଅପରାହ୍ଣ ପ୍ରାୟ ୨ଟା ୪୫ରେ ବିଏମ୍‌ସିର ଏନ୍‌ଫୋର୍ସମେଣ୍ଟ ଅଧିକାରୀମାନେ ଆସି ଜୋର ଜବରଦସ୍ତ ଦୋକାନ ଉଠାଇବାକୁ କହିଥିଲେ।

 ଦୋକାନ ଉଚ୍ଛେଦ ପୂର୍ବରୁ ନୋଟିସ୍ ହେବା କଥା। କିନ୍ତୁ ୧ ତାରିଖର ନୋଟିସ୍ ୬ ତାରିଖରେ ମୋବାଇଲ୍‌ରେ ଛାଡ଼ି କାମ ତୁଟାଇ ଦେଇଥିଲେ। ଯେହେତୁ କୋର୍ଟଙ୍କ ନିକଟରେ ମାମଲା ବିଚାରାଧୀନ ଅଛି, ଆମେ ଦୋକାନ ଉଚ୍ଛେଦ ପାଇଁ ମନା କରିଥିଲୁ। ଉଚ୍ଛେଦ ଚିଠି ମାଗିଥିଲୁ। କିନ୍ତୁ କିଛି କେହି ଦେଖାଇନଥିଲେ। ଶେଷରେ ଆମେମାନେ ରାସ୍ତା ଅବରୋଧ କରିଥିଲୁ। ପରେ ବିଏମ୍‌ସି ଅଧିକାରୀ ପହଞ୍ଚି ବୁଝାସୁଝା କରିବା ସହ ବିଏମ୍‌ସି ମୁଖ୍ୟ କାର୍ଯ୍ୟାଳୟରେ ସଂଧ୍ୟାରେ ବୈଠକ ଡାକିଥିଲେ। ବୈଠକରେ ଡେପୁଟି କମିସନର୍ ଅଜୟ ମହାନ୍ତି, ଜୋନାଲ୍ ଡେପୁଟି କମିସନର୍ ରାଜଲକ୍ଷ୍ମୀ ନାୟକ ପ୍ରମୁଖ ଉପସ୍ଥିତ ଥିଲେ। ଖାଓଗଳି ଦୋକାନୀ ସଂଘ ପକ୍ଷରୁ ସେ ଓ ଅନ୍ୟ ଦୋକାନୀମାନେ ଉପସ୍ଥିତ ଥିଲେ। ଆଲୋଚନା ପରେ ୩ହଜାର ଟଙ୍କା ମାସିକ ଭଡ଼ା ଦେବାକୁ ବିଏମ୍‌ସି କହିଥିଲା ଓ ଦୋକାନୀମାନେ ଏଥିରେ ରାଜି ହୋଇଥିଲେ। ଆସନ୍ତାକାଲିଠାରୁ ଆମେମାନେ ଦୋକାନ ଖୋଲିବୁ ବୋଲି ଶ୍ରୀମତୀ ଖଟେଇ କହିଛନ୍ତି।