ଉତ୍କଳ ବିଶ୍ବବିଦ୍ୟାଳୟ: କେବେ ଖୋଲିବ ସେଣ୍ଟ୍ରାଲ କ୍ୟାଣ୍ଟିନ୍‌ ତାଲା?

ଭୁବନେଶ୍ବର: ଉତ୍କଳ ବିଶ୍ବବିଦ୍ୟାଳୟ ସେଣ୍ଟ୍ରାଲ କ୍ୟାଣ୍ଟିନ୍‌ ନବୀକରଣକୁ ଦୁଇ ବର୍ଷ ବିତିଗଲାଣି। ଶୀତତାପ ନିୟନ୍ତ୍ରିତ କୋଠରୀ ରହିଛି। ବିଦ୍ୟୁତ୍‌ ସଂଯୋଗ ହୋଇଛି। ନୂଆ ରୂପରେ ଶୋଭା ପାଉଥିବା ଏହି କ୍ୟାଣ୍ଟିନ୍‌ର ଦୋକାନ ଗୃହଗୁଡ଼ିକ ଆଜି ପର୍ଯ୍ୟନ୍ତ ଆବଣ୍ଟନ ହୋଇପାରି ନାହିଁ। କ୍ୟାଣ୍ଟିନ୍‌ କ୍ୟାମ୍ପସ ପରିସରରେ ୧୦ ଜଣ ବ୍ୟବସାୟୀ ଇତିମଧ୍ୟରେ ଥଇଥାନ ହୋଇଛନ୍ତି। ହେଲେ କର୍ତ୍ତୃପକ୍ଷ କ୍ୟାଣ୍ଟିନ୍‌ ବଣ୍ଟନ କରିବାରେ ବିଫଳ ହୋଇଛନ୍ତି। ପ୍ରଥମ ଥର ହାଇକୋର୍ଟରେ ମାମଲା ପହଞ୍ଚିଥିବା ବେଳେ ଦ୍ବିତୀୟ ଥର ‌ଟେଣ୍ଡର ପ୍ରକ୍ରିୟାରେ ମାତ୍ର ତିନି ଜଣ ଅଂଶଗ୍ରହଣ କରିଥିଲେ। ସେମାନଙ୍କ ମଧ୍ୟରୁ ଜଣଙ୍କର ‌ବାତିଲ୍‌ ହୋଇଥିବା ବେଳେ ବାକି ଆଉ ଦୁଇ ଜଣ ରହିଥିଲେ। ପ୍ରଥମ ସ୍ଥାନରେ ରହି ଯେଉଁ ସଂସ୍ଥା ଟେଣ୍ଡର ପାଇବାକୁ ଯୋଗ୍ୟତା ଅର୍ଜନ କରିଥିଲା ବିଶ୍ବବିଦ୍ୟାଳୟ କର୍ତ୍ତୃପକ୍ଷ ତାହାକୁ କ୍ୟାଣ୍ଟିନ୍‌ ଆବଣ୍ଟନ କରି ନ ଥିଲେ। ଜାନୁଆରି ୨୧ରେ ତୃତୀୟ ଥର ଟେଣ୍ଡର ହୋଇଥିଲେ ମଧ୍ୟ ସମାନ ଅବସ୍ଥା ଉପୁଜିଛି। ଏପର୍ଯ୍ୟନ୍ତ କ୍ୟାଣ୍ଟିନ୍‌ କାହାରିକୁ ବଣ୍ଟନ ଦିଆଯାଇ ନାହିଁ। ବରଂ ସେମିତି ତାଲା ଝୁଲୁଛି।

ଉତ୍କଳ ବିଶ୍ବବିଦ୍ୟାଳୟ
ଦୁଇ ବର୍ଷରେ ତିନି ଥର ଟେଣ୍ଡର
ଯୋଗ୍ୟ ସଂସ୍ଥାଙ୍କୁ ଦେଉନାହାନ୍ତି

ଟେଣ୍ଡର ଅନୁଯାୟୀ ନାମକରା ପଞ୍ଜିକୃତ କ୍ୟାଟେରିଂ ସର୍ଭିସ୍‌/ହୋଟେଲ ପ୍ରୋପାଇର୍ଟସ ଆବେଦନ ସହ ଚୁକ୍ତିଭିତ୍ତିକ ଭାବେ କ୍ୟାଣ୍ଟିନ୍‌ ଦାୟିତ୍ବ ନେବେ ବୋଲି କୁହାଯାଇଥିଲା। ଫେବ୍ରୁଆରି ୬ ସୁଦ୍ଧା ଆବେଦନ ହୋଇଥିଲା। ପୂର୍ବଥର ଯେଉଁ ସଂସ୍ଥା ଟେଣ୍ଡର ପାଇଥିଲା, ଏଥର ମଧ୍ୟ ସମାନ ସଂସ୍ଥା ଭାଗ ନେବା ସହ ପାଇବାକୁ ଯୋଗ୍ୟତା ଅର୍ଜନ କରିଥିବା ଜଣାପଡ଼ିଛି। ହେଲେ ବିଶ୍ବବିଦ୍ୟାଳୟ କର୍ତ୍ତୃପକ୍ଷ ସମ୍ପୃକ୍ତ ସଂସ୍ଥାକୁ କ୍ୟାଣ୍ଟିନ୍‌ ପରିଚାଳନା କରିବାକୁ ଦେଇ ନ ଥିଲେ। ବରଂ ବିଜ୍ଞପ୍ତିରେ ଦର୍ଶାଇଥିବା ନିୟମ ଅନୁଯାୟୀ ନିଜ ଇଚ୍ଛା ଅନୁଯାୟୀ ସମ୍ପୃକ୍ତ ସଂସ୍ଥାକୁ କ୍ୟାଣ୍ଟିନ୍‌ ପରିଚାଳନା କରିବାକୁ ନ ଦେବାକୁ ନିଷ୍ପତ୍ତି ନେଇଛନ୍ତି। ପରିଣାମ ସ୍ବରୂପ ପ୍ରତିଦିନ ଶତାଧିକ ଛାତ୍ରଛାତ୍ରୀ ଖାଇବାକୁ କ୍ୟାମ୍ପସ ବାହାରକୁ ଦୌଡ଼ୁଛନ୍ତି। କେବଳ ଯେ ଛାତ୍ରଛାତ୍ରୀ ଅସୁବିଧାର ସମ୍ମୁଖୀନ ହେଉଛନ୍ତି ତାହା ନୁହେଁ, ବରଂ ଦୁଇ ବର୍ଷ ମଧ୍ୟରେ ବିଶ୍ବବିଦ୍ୟାଳୟ କର୍ତ୍ତୃପକ୍ଷ ୧୦ ଲକ୍ଷରୁ ଅଧିକ ଟଙ୍କାର ରାଜସ୍ବ ହରାଇଲେଣି। ଟେଣ୍ଡର ମାଧ୍ୟମରେ ବିଶ୍ବବିଦ୍ୟାଳୟ କର୍ତ୍ତୃପକ୍ଷ କ୍ୟାଣ୍ଟିନ୍‌ ବଣ୍ଟନ କରିଥିଲେ ରାଜସ୍ବ ପାଇଥାନ୍ତେ, ଯାହାକି ହାତଛଡ଼ା ହେଉଛି। ‌ସେପଟେ ପୁନଃନିର୍ମାଣ କ୍ୟାଣ୍ଟିନ୍‌ ବ୍ୟବହାର ନ ହେବାରୁ ଅବସ୍ଥା ଦିନକୁ ଦିନ ଖରାପ ହେଉଛି। ଏହା ପରିସରରେ ଲାଗିଥିବା ସାମଗ୍ରୀଗୁଡ଼ିକ ନଷ୍ଟ ହେଉଥିବା‌ ଦେଖିବାକୁ ମିଳିଛି। ଟଙ୍କାଟିଏ ରୋଜଗାର ହେଉ ନ ଥିବା ବେଳେ ଲକ୍ଷ ଲକ୍ଷ ଟଙ୍କାରେ ନିର୍ମାଣ ହୋଇଥିବା କ୍ୟାଣ୍ଟିନ୍‌ ଅବସ୍ଥା ଶୋଚନୀୟ ହେଉଥିବାରୁ ଛାତ୍ରଛାତ୍ରୀ, ପୁରାତନ ଛାତ୍ର, ପ୍ରଫେସରଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି।

ଗୋଟିଏ ପଟେ ସେଣ୍ଟ୍ରାଲ କ୍ୟାଣ୍ଟିନ୍‌ ଆବଣ୍ଟନ ହୋଇପାରୁ ନ ଥିବା ବେଳେ ଅନ୍ୟପଟେ କ୍ୟାମ୍ପସରେ ନିର୍ମାଣ ହୋଇଥିବା ୧୦ଟି ଦୋକାନ ଘର ଆବଣ୍ଟନ ହୋଇଛି। କ୍ୟାମ୍ପସରେ ଥିବା ଉଠାଦୋକାନୀଙ୍କୁ ସେଠାରେ ଦୋକାନ ଖୋଲିବାକୁ ଅନୁମତି ଦିଆଯାଇଛି। ସେମାନେ ୨୦୨୩ ଅଗଷ୍ଟରୁ କ୍ୟାମ୍ପସରେ ବ୍ୟବସାୟ କରୁଥିଲେ ମଧ୍ୟ ଏପର୍ଯ୍ୟନ୍ତ ଚୁକ୍ତିନାମା ହୋଇନାହିଁ। ସେମାନଙ୍କଠାରୁ ଲ୍ୟାଣ୍ଡ୍‌ ରେଣ୍ଟ ଓ ବିଦ୍ୟୁତ୍‌ ବାବଦରେ ମାସିକ ୫ ହଜାର ଟଙ୍କା ଆଦାୟ କରିବାକୁ ସ୍ଥିର କରି କର୍ତ୍ତୃପକ୍ଷ ଚୁପ୍‌ ବସିଛନ୍ତି।  ଛୋଟ ‌ଦୋକାନ କରି ଗୁଜୁରାଣ ମେଣ୍ଟାଉଥିବା ଏହି ବ୍ୟବସାୟୀଙ୍କଠାରୁ ୫ହଜାର ଟଙ୍କା ଆଦାୟ କରିବାକୁ ନିଷ୍ପତ୍ତି ହୋଇଥିବାରୁ ତାହାକୁ ସେମାନେ ବିରୋଧ କରିଛନ୍ତି। ଦର କମାଇବାକୁ ସେମାନେ ବିଶ୍ବବିଦ୍ୟାଳୟ କର୍ତ୍ତୃପକ୍ଷଙ୍କୁ ଅନୁରୋଧ କରିଥିଲେ ମଧ୍ୟ ଆଜି ପର୍ଯ୍ୟନ୍ତ ଏଦିଗରେ କୌଣସି ପଦକ୍ଷେପ ଗ୍ରହଣ କରାଯାଇ ନାହିଁ।