ମହାଶିବରାତ୍ରୀରେ ଗର୍ଭଗୃହ ଦର୍ଶନ ମନା
ବିଏମ୍ସି ଜାରି କଲା ବିଜ୍ଞପ୍ତି
ଭୁବନେଶ୍ବର: ମହାଶିବରାତ୍ରୀରେ ଗର୍ଭଗୃହକୁ ଦର୍ଶନ ମନା। କୌଣସି ଭକ୍ତ ଗର୍ଭଗୃହକୁ ଯାଇ ଦର୍ଶନ କରିପାରିବେ ନାହିଁ କିମ୍ବା ସାହାଣମେଲା ଦର୍ଶନ ମଧ୍ୟ ହେବ ନାହିଁ। ସିଂହଦ୍ବାରରୁ କେବଳ ଆଡ଼କାଠ ପର୍ଯ୍ୟନ୍ତ ଯିବାକୁ ଭକ୍ତଙ୍କୁ ଅନୁମତି ମିଳିବ। ଏହି ଦିନ ଆଡ଼କାଠ ନିକଟରେ ଭକ୍ତଙ୍କ ପାଇଁ ପୂଜା ଦେବା କିମ୍ବା ଭୋଗ କରିବା ଭଳି ସୁଯୋଗ ମିଳିବ ନାହିଁ। ମେଳା, ମେଲୋଡି ଭଳି ଗହଳି ହେଉଥିବା କାର୍ଯ୍ୟକ୍ରମ ଆୟୋଜନକୁ ଅନୁମତି ମିଳିବ ନାହିଁ। ବିଏମ୍ସି ପକ୍ଷରୁ ଏକ ବିଜ୍ଞପ୍ତିରେ ଆଜି ଏନେଇ ସ୍ପଷ୍ଟ କରାଯାଇଛି। ଏଥିରେ ଆହୁରି ମଧ୍ୟ କୁହାଯାଇଛି, କୋଭିଡ୍ ନିର୍ଦ୍ଦେଶାବଳୀ ପାଳନ ପୂର୍ବକ ସେବାୟତମାନେ ନୀତି ସଂପନ୍ନ କରିବେ।
Sambad is now on WhatsApp
Join and get latest news updates delivered to you via WhatsApp
ମାସ୍କ ପିନ୍ଧିବା ସହ ସାମାଜିକ ଦୂରତା ରକ୍ଷା କରିବେ। ହାତକୁ ସାନିଟାଇଜ୍ କରିବେ। ମନ୍ଦିର ପରିସରରେ କର୍ତ୍ତୃପକ୍ଷ ସାନିଟାଇଜର୍ର ବ୍ୟବସ୍ଥା କରିବେ। ଭକ୍ତମାନେ ମଧ୍ୟ କୋଭିଡ୍ ନିର୍ଦ୍ଦେଶାବଳୀ ପାଳନ କରିବେ, ମାସ୍କ ପିନ୍ଧିବା ସହ ୬ ଫୁଟ୍ ସାମାଜିକ ଦୂରତା ରକ୍ଷା କରିବେ। କର୍ତ୍ତୃପକ୍ଷ ଏହାକୁ ସୁନିଶ୍ଚିତ କରାଇବେ। ସେହିପରି ଭକ୍ତଙ୍କୁ ଏକ ସମୟରେ ପ୍ରବେଶ ସୁଯୋଗ ଦିଆଯିବ। ୧୨ବର୍ଷ ବୟସରୁ କମ୍ ବୟସର ଶିଶୁ, ଗର୍ଭବତୀ ଓ କରୋନା ପ୍ରତି ସମ୍ବେଦନଶୀଳ ବୟସ୍କମାନେ ପ୍ରବେଶ ନ କରିବା ଉଚିତ୍। ମନ୍ଦିର ଭିତରେ ଓ ବାହାରେ ପାନପିକ ପକାଇବା ଉପରେ ବାରଣ କରାଯାଇଛି। ଏଥିରେ ବ୍ୟତିକ୍ରମ ହେଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ବିଏମ୍ସି ବିଜ୍ଞପ୍ତିରେ ସ୍ପଷ୍ଟ କରିଛି।