ଭୁବନେଶ୍ୱର: ପନିପରିବା ପାଇଁ ହେଉଁ କି ତେଜରାତି ସାମଗ୍ରୀ କିଣିବାକୁ ବଜାରକୁ ଯାଉଥିଲେ, ଭିଡରୁ ନିବୃତ୍ତ ରୁହନ୍ତୁ । ମହାମାରୀ କରୋନା ଭାଇରସ ଠାରୁ ବର୍ତ୍ତିବାକୁ ହେଲେ ଭିଡ଼ରୁ ଦୂରରେ ଉଚିତ ବୋଲି କହିଛନ୍ତି ଭୁବନେଶ୍ୱର ମହାନଗର ନିଗମର କମିସନର ପ୍ରେମଚନ୍ଦ୍ର ଚୌଧୁରୀ । ସେ କହିଛନ୍ତି, ଘରୁ ବାହାରକୁ ଯିବା ମାତ୍ରେ ମାସ୍କକୁ ଅଧିକ ଗୁରୁତ୍ୱ ଦେବା ସହିତ ସାମାଜିକ ଦୂରତା ନିୟମ ପାଳନ କରନ୍ତୁ । ଅଳ୍ପ କିଛି ଟଙ୍କା ବଂଚାଇବା ପାଇଁ ଚାରିଆଡେ ବୁଲି ବୁଲି ଜିନିଷ ପତ୍ର ନକିଣି ଗୋଟିଏ ସ୍ଥାନରୁ ପରିବା କିଣିଲେ ଭଲ । କାରଣ ଶସ୍ତାରେ ଜିନିଷ କିଣିବା ଲାଗି ଟଙ୍କା ବଂଚାଇବା ଅପେକ୍ଷା ଜୀବନ ଅଧିକ ମୂଲ୍ୟବାନ ।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ଚୌଧୁରୀ କହିଛନ୍ତି, ଯଦି ଗ୍ରାହକମାନେ କଡ଼ାକଡ଼ି ଭାବେ କୋଭିଡ ଗାଇଡଲାଇନ ପାଳନ କରିବେ ତା’ହେଲେ ଆମେ କରୋନା ମୁକାବିଲା କରିବାରେ ସଫଳ ହେବା । ଥରକରେ ଯଦି ଆମେ ୩ରୁ ୪ ଦିନ ପାଇଁ ପରିବା କିଣିବା ତା’ହେଲେ ମାର୍କେଟରେ ଭିଡ ହ୍ରାସ ପାଇବ । ସେହିଭଳି ଅନେକ ଜିନିଷ ଅନଲାଇନରେ ଅର୍ଡର ମଧ୍ୟ କରାଯାଇ ମାର୍କେଟରେ ଭିଡ କମ କରାଯାଇପାରିବ । କରୋନା କାଳରେ ଅନଲାଇନ ପେମେଣ୍ଟ, ସପିଂ କରି ଲୋକେ ଆମକୁ ସାହାଯ୍ୟ କରିପାରିବେ । ଶିଳ୍ପାନୁଷ୍ଠାନ ଦ୍ୱାରା ଆମକୁ ସହଯୋଗ ସମର୍ଥନ ମିଳିଛି । ଘରୋଇ ହସପିଟାଲ ଆମପାଇଁ ଅନ୍ୟ ଏକ ଚ୍ୟାଲେଞ୍ଜ ଥିଲା ଏବଂ ଏବେ ବି ଅଛି । କିନ୍ତୁ ଘରୋଇ ହସ୍ପିଟାଲରେ ଏବେ କରୋନା ଗାଇଡଲାଇନକୁ କଡ଼ାକଡ଼ି ଭାବେ ପାଳନ କରାଯାଉଥିବା ପରିଲକ୍ଷିତ ହେଉଛି ।
ବିଏମସି କମିସନର କହିଛନ୍ତି, କିଛି ଦିନ ଭିତରେ ଆମେ ଟେଷ୍ଟିଂ ବଢ଼ାଇଛୁ । ୟୁନିଟ-୧, ମାର୍କେଟ ବିଲ୍ଡିଂ, ମାଛ ମାର୍କେଟ ଓ ପନିପରିବା ମାର୍କେଟ ଆମ ପାଇଁ ଚ୍ୟାଲେଞ୍ଜ ହୋଇଛି । ଆଳୁଗଦିରେ ଜଣେ ବ୍ୟକ୍ତି କରୋନା ପଜିଟିଭ ଚିହ୍ନଟ ହୋଇଥିଲେ । ତାଙ୍କରି ଯୋଗୁଁ ପରବର୍ତ୍ତୀ ସମୟରେ ୪୧ ଜଣ ଲୋକ କରୋନାରେ ଆକ୍ରାନ୍ତ ହୋଇଥିଲେ । ସେହିଭଳି ମାଛ ବଜାରରେ ଆମେ କରୋନା ପରୀକ୍ଷା କରିଛୁ । ମାଛ ମାର୍କେଟରୁ ମଧ୍ୟ ୨୧ ଜଣ କରୋନା ପଜିଟିଭ ଚିହ୍ନଟ କରିଥିଲୁ । ମାଛ ମାର୍କେଟରେ ସାମାଜିକ ଦୂରତ୍ୱ ପାଳନ ହେଉ ନାହିଁ । ଫଳରେ କିଛି ଦିନ ପାଇଁ ୟୁନିଟ-୪ ମାଛ ମାର୍କେଟ ବନ୍ଦ କରିଥିଲୁ । ନିକଟରେ ମାଛ ମାର୍କେଟକୁ ଖୋଲାଯାଇଛି ।
କରୋନା ସଂକ୍ରମଣ ନେଇ ଆଜି ମାର୍କେଟ ଆସୋସିଏସନଙ୍କ ସହିତ ବୈଠକ କରିଛୁ ବୋଲି ଶ୍ରୀ ଚୌଧୁରୀ ଗଣମାଧ୍ୟମର ପତିନିଧିଙ୍କୁ ସୂଚନା ଦେଇଛନ୍ତି । ବଜାରରେ ବ୍ୟବସାୟୀ ଓ ଗ୍ରାହକ କୋଭିଡ-୧୯କୁ ଗୁରୁତ୍ୱ ଦେଲେ ସଂକ୍ରମଣ ରୋକାଯାଇପାରିବ । ବ୍ୟବସାୟୀ ସଂଘ କୋଭିଡ-୧୯ ଗାଇଡଲାଇନ ପାଳନ କରିବାକୁ ପ୍ରତିଶ୍ରୁତି ଦେଇଛନ୍ତି । ଲୋକେ ମାସ୍କ ପିନ୍ଧିବା, ସାମାଜିକ ଦୂରତାକୁ ଗୁରୁତ୍ୱ ଦିଅନ୍ତୁ । ଚାର୍ଟ, ଠେଲା, ଗୁପଚୁପ ଦୋକାନୀଙ୍କୁ ପାର୍ସଲ ବିକ୍ରି କରିବାକୁ ଅନୁମତି ଦିଆଯାଇଛି । କିନ୍ତୁ ଅନେକ ସ୍ଥାନରେ ଏହାର ଉଲ୍ଲଂଘନ ହେଉଛି ।
ବସ୍ତି ଅଂଚଳରେ କରୋନା ପଜିଟିଭ ଚିହ୍ନଟ ହେବା ପରେ ବସ୍ତି କମିଟି ଗଠନ କରାଯାଇଛି । ସଚେତକ ଟିମ ମାଧ୍ୟମରେ ଆମେ କରୋନା ସଂକ୍ରମଣ ନିୟନ୍ତ୍ରଣ କରିବା ପାଇଁ ଉଦ୍ୟମ କରୁଛୁ। ୬୦ ପ୍ରତିଶତ ବସ୍ତି ଅଂଚଳରେ ଆମେ ଗୋଟିଏ ବି କରୋନା ପଜିଟିଭ ଚିହ୍ନଟ ହୋଇନାହାନ୍ତି । ରମାଦେବୀ ବସ୍ତିରେ ୨୫୦ଟି ପରିବାରରେ ୧୨୦୦ ଲୋକ ରହୁଛନ୍ତି । ଏଠାରେ ୭ଟି କମିଟି ଗଠନ କରାଯାଇଛି । ଏହି ବସ୍ତିକୁ ଆସିଥିବା ଲୋକେ ପ୍ରଥମେ କଣ୍ଟେନମେଣ୍ଟରେ ରହିଥିଲେ । ଫଳରେ ଜଣେ ବି କରୋନା ପଜିଟିଭ ଚିହ୍ନଟ ହୋଇନାହାନ୍ତି ।
ବିଏମସି କମିସନର କହିଛନ୍ତି, ପ୍ରାୟ ୧୪୦୦୦ ଲୋକଙ୍କୁ ନେଇ ଆମେ ନିକଟରେ ଏକ ସର୍ଭେ କରିଥିଲୁ । ଏଥିରୁ ୧୨୩୬୭ ଜଣ ଲୋକ ସଚେତକ ଆପ ଡାଉନଲୋଡ କରିଛନ୍ତି । କୋଭିଡ-୧୯ ନେଇ କୌଣସି ପ୍ରକାରର ଗୁଜବ ଜଣାପଡ଼ିଲେ ୧୯୨୯ ହେଲପଲାଇନ ନମ୍ବର, ବିଏମସିର ସଚେତକ ଟିମ, ଇମେଲରେ ବିଏମସିକୁ ଜଣାଇପାରିବେ । ଆମେ ଏହାକୁ ଗ୍ରହଣ କରି କାର୍ଯ୍ୟାନୁଷ୍ଠାନ ନେବୁ ।