ତେଲ୍‌ ଅବିବ: ଇରାନର ପଶ୍ଚିମ ଭାଗରୁ ରାଜଧାନୀ ତେହେରାନ ପର୍ଯ୍ୟନ୍ତ ଏହାର ଆକାଶକୁ ନିୟନ୍ତ୍ରଣ ଇସ୍ରାଏଲ କରୁଛି ‌ବୋଲି ଇସ୍ରାଏଲ ଦାବି କରିଛି। ସେପଟେ ଇସ୍ରାଏଲର ଆକ୍ରମଣ ପରେ ଆମେରିକା ନିର୍ମିତ ଏମ୍‌କ୍ୟୁ-୯ ରିପର ସମେତ ୮ଟି ଇସ୍ରାଏଲ ଡ୍ରୋନ୍‌କୁ ଖସାଇ ଦେଇଛି ବୋଲି ଇରାନ ଦାବି କରିଛି। 
ଇସ୍ରାଏଲ ସେନା କହିଛି ଯେ, ସେମାନେ ଇରାନର ବାୟୁ ପ୍ରତିରକ୍ଷା ଓ କ୍ଷେପଣାସ୍ତ୍ର ପ୍ରଣାଳୀକୁ ଏପରି ଖରାପ କରିଦେଇଛନ୍ତି ଯେ ଏହାର ବିମାନଗୁଡ଼ିକ ବର୍ତ୍ତମାନ କୌଣସି ବଡ଼ ବିପଦର ସମ୍ମୁଖୀନ ନ ହୋଇ ତେହେରାନ ଉପରେ ଉଡ଼ିପାରିବେ। ଇସ୍ରାଏଲ ଡିଫେନ୍ସ ଫୋର୍ସ (ଆଇଡିଏଫ୍) ରବିବାର ରାତିରେ ଇରାନରେ କ’ଣ କରିଛି ତାହା ସୋସିଆଲ ମିଡିଆରେ ଏକ ପୋଷ୍ଟରେ ଉଲ୍ଲେଖ କରିଛି। ଭୂପୃଷ୍ଠରୁ ଭୂପୃଷ୍ଠକୁ କ୍ଷେପଣାସ୍ତ୍ର ମାଡ଼ ସହ ଇରାନ ସରକାରଙ୍କ ଏକତୃତୀୟାଂଶ କ୍ଷେପଣାସ୍ତ୍ର ଲଞ୍ଚରକୁ ନଷ୍ଟ କରିଛି ବୋଲି ଆଇଡିଏଫ୍ କହିଛି। କେନ୍ଦ୍ରୀୟ ଇରାନର ଇସ୍ଫାହାନରେ ଥିବା ୧୦୦ଟି ସାମରିକ ଟାର୍ଗେଟ୍ ଉପରେ ବିମାନ ଆକ୍ରମଣ କରିଥିବା ବେଳେ ଇସ୍ରାଏଲକୁ ଟାର୍ଗେଟ କରିବା ପାଇଁ ପ୍ରସ୍ତୁତ ମିସାଇଲ ଷ୍ଟୋରେଜ୍ ସାଇଟ୍ ଓ ଲଞ୍ଚରକୁ ଧ୍ୱଂସ କରିଛି। ଗତକାଲି ରାତିରେ ୨୦ରୁ ଅଧିକ କ୍ଷେପଣାସ୍ତ୍ରକୁ ଇସ୍ରାଏଲ ଆଡ଼କୁ ଉତ୍‌କ୍ଷେପଣ କରାଯିବାର କିଛି ମିନିଟ୍ ପୂର୍ବରୁ ଧ୍ୱଂସ କରାଯାଇଥିଲା। କେନ୍ଦ୍ରୀୟ ଇରାନର ଇସ୍ଫାହାନରେ ପାଖାପାଖି ୧୦୦ଟି ସାମରିକ ଟାର୍ଗେଟ ଉପରେ ଆକ୍ରମଣ କରାଯାଇଥିଲା।  
ତେଣେ ଇରାନ ଦାବି କରିଛି ଯେ ଏହାର ଏୟାର୍ ଡିଫେନ୍ସ ପଶ୍ଚିମ ଇଲାମ ପ୍ରଦେଶର ଡେହଲୋରାନ କାଉଣ୍ଟି ଉପରେ ଆମେରିକା ନିର୍ମିତ ଏମ୍‌କ୍ୟୁ-୯ ରିପର ସମେତ ୮ଟି ଇସ୍ରାଏଲ ଡ୍ରୋନ୍‌କୁ ଖସାଇ ଦେଇଛି। ଗୁଇନ୍ଦା ସୂତ୍ରରୁ ମିଳିଥିବା ସୂଚନା ଅନୁଯାୟୀ, ତେଲ୍‌ ଅବିବ ଓ ହାଇଫା ଭଳି ବେସାମରିକ ଜିଲ୍ଲାରେ ଇରାନର କ୍ଷେପଣାସ୍ତ୍ର ଆକ୍ରମଣରେ ଇସ୍ରାଏଲର ୨୪ ଜଣ ପ୍ରାଣ ହରାଇଥିବା ବେଳେ ଇସ୍ରାଏଲ ଆକ୍ରମଣରେ ଇରାନର ୨୨୪ ଜଣ ପ୍ରାଣ ହରାଇଛନ୍ତି।  
ଗୁଇନ୍ଦା ସୂତ୍ରରୁ ପ୍ରକାଶ ଯେ ଇସ୍ରାଏଲର ବାୟୁ ଆଧିପତ୍ୟ ଇରାନର ସାମରିକ ଅପାରଗତାକୁ ପଦାରେ ପକାଇଛି। ବେସାମରିକ ସ୍ଥାନାନ୍ତର ଇରାନ ସରକାରଙ୍କ ଉପରେ ଆସ୍ଥା ହରାଇବାକୁ ପ୍ରତିଫଳିତ କରୁଛି। ପରମାଣୁ କ୍ଷମତା ହ୍ରାସ ପାଇବା ଏବଂ ନେତୃତ୍ୱ ଅପାରଗ ସାବ୍ୟସ୍ତ ହେବା ଫଳରେ ଇରାନ କେବଳ ବାହ୍ୟ ନୁହେଁ ବରଂ ନିଜ ଲୋକଙ୍କଠାରୁ ଅସ୍ତିତ୍ୱ ବିପଦର ସମ୍ମୁଖୀନ ହେଉଛି। ମିଳିଥିବା ସୂଚନା ଅନୁଯାୟୀ, ୮୦ରୁ ଅଧିକ ସହରରେ ଅବସରପ୍ରାପ୍ତ, କର୍ମଚାରୀ ଓ ଭିନ୍ନକ୍ଷମ ନାଗରିକମାନେ ମୁଦ୍ରାସ୍ଫୀତି ବିରୋଧରେ ଏକାଠି ହୋଇଥିଲେ। ୨୦୨୨ରେ ମହସା ଅମିନୀଙ୍କ ମୃତ୍ୟୁ ପରେ ପୁଣି ଥରେ ମହିଳାମାନେ ହିଜାବ ଜାଳି ଇରାନ ସରକାରଙ୍କ ମୁର୍ଦ୍ଦାବାଦ ଧ୍ବନି ଦେବା ସହ ବିକ୍ଷୋଭ ଆରମ୍ଭ କରିଛନ୍ତି। ଇରାନର ଲୋକମାନେ ଇସ୍ରାଏଲର ଆକ୍ରମଣକୁ ନେଇ ଖୁସି ମନାଉଥିବା ଖବର ମଧ୍ୟ ସାମ୍ନାକୁ ଆସିଛି, ଯାହା ସରକାରଙ୍କ ଉପରେ ଆସ୍ଥା ହରାଇବାକୁ ଦର୍ଶାଉଛି।