ଭୁବନେଶ୍ବର: ତିନି ବର୍ଷ ବ୍ୟବଧାନ ପରେ ପୁଣି ଚର୍ଚ୍ଚାକୁ ଫେରିଛି ‘ସାଇନ୍ସ ସିଟି’। ୨୦୨୨ ମସିହାରେ ପୂର୍ବ ସରକାର ରାଜଧାନୀ ଉପକଣ୍ଠରେ ‘ସାଇନ୍ସ ସିଟି’ ପ୍ରତିଷ୍ଠା ପାଇଁ ଘୋଷଣା କରିଥିଲେ। କିନ୍ତୁ ତାହା କେବଳ ଘୋଷଣାରେ ରହିଗଲା। ଏବେ ସରକାର ଭୁବନେଶ୍ବରରେ ସାଇନ୍ସ ସିଟି ପ୍ରତିଷ୍ଠା ହେବ ବୋଲି ଘୋଷଣା କରିଛନ୍ତି। କିନ୍ତୁ ନିର୍ଦ୍ଦିଷ୍ଟ କେଉଁଠି ହେବ ଓ କେବେ ସୁଦ୍ଧା ହେବ, ସେ ସମ୍ପର୍କରେ କିଛି କୁହାଯାଇ ନାହିଁ। ତେବେ ପୂର୍ବ ସରକାର ପରି ଏହା ଏକ ତୁଚ୍ଛା ଘୋଷଣା ନା କିଛି ବାସ୍ତବତା ରହିଛି, ତାହାକୁ ସବୁ ମହଲରେ ଅପେକ୍ଷା କରିଛନ୍ତି। 

Advertisment

ପୂର୍ବ ସରକାର ସମୟରୁ ଘୋଷଣାରେ ରହିଗଲା
ସେବେ ଦରକାର ଥିଲା ୩୦ ଏକର, ଏବେ ୧୦୦

୨୦୨୨ ମସିହାରେ ପୂର୍ବ ସରକାର ତତ୍‌କାଳୀନ ବିଜ୍ଞାନ ଓ କାରିଗରୀ ମନ୍ତ୍ରୀ ‘ସାଇନ୍ସ ସିଟି’ ନେଇ ବିଧାନସଭାରେ ଘୋଷଣା କରିଥିଲେ। ଏହି ପ୍ରସ୍ତାବିତ ପ୍ରକଳ୍ପକୁ ମୁଖ୍ୟମନ୍ତ୍ରୀ ମଞ୍ଜୁର କରିଛନ୍ତି ଏବଂ ଭୁବନେଶ୍ବର ନିକଟରେ ୩୦ ଏକର ଜାଗାରେ ଏହା ପ୍ରତିଷ୍ଠା ହେବ ବୋଲି କହିଥିଲେ। ଜାଗା ଚିହ୍ନଟ କରି ବିଜ୍ଞାନ ଓ କାରିଗରୀ ବିଭାଗକୁ ଦେବା ପାଇଁ ଇଡ୍‌କୋକୁ ଦାୟିତ୍ବ ଦିଆଯାଇଥିଲା। କୋଲକାତା ସାଇନ୍ସ ସିଟି ଢାଞ୍ଚାରେ ଏହା ନିର୍ମାଣ କରାଯିବାକୁ ଯୋଜନା ଥିଲା। କିନ୍ତୁ ତାହା ପରେ ପୂର୍ବ ସରକାର ଏ ଦିଗରେ ଆଗ୍ରହ ପ୍ରକାଶ କଲେ ନାହିଁ। ଦୁଇ ବର୍ଷ ଭିତରେ ସାଇନ୍ସ ସିଟି ପାଇଁ ଜାଗା ବି ଚିହ୍ନଟ ହୋଇପାରିଲା ନାହିଁ। ଏବେ ବିଜ୍ଞାନ ଓ କାରିଗରୀ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ପୁଣି ଥରେ ‘ସାଇନ୍ସ ସିଟି’ ସମ୍ପର୍କରେ ଘୋଷଣା କରିଛନ୍ତି। ଅହମଦାବାଦ ସାଇନ୍ସ ସିଟି ବୁଲିଲା ପରେ ମନ୍ତ୍ରୀ କହିଛନ୍ତି, ଓଡ଼ିଶାର ବିଜ୍ଞାନ ଓ ପ୍ରଯୁକ୍ତିବିଦ୍ୟାକୁ ‌ଆହୁରି ବିକଶିତ କରାଯିବ। ୧୦୦ ଏକର ଜାଗାରେ ସାଇନ୍ସ ସିଟି ନିର୍ମାଣ ହେବ। ମୁଖ୍ୟମନ୍ତ୍ରୀ ଜାଗାକୁ ମଞ୍ଜୁରି ଦେଇଛନ୍ତି। ଏହା ଦ୍ବାରା ବିଜ୍ଞାନ ଓ ପ୍ରଯୁକ୍ତି କ୍ଷେତ୍ରରେ ହେଉଥିବା ନୂତନ ଉଦ୍ଭାବନ ସମ୍ପର୍କରେ ରାଜ୍ୟବାସୀ ଓ ଛାତ୍ରଛାତ୍ରୀ ଜାଣିବା ସହ ଜ୍ଞାନ ଆହରଣ କରିପାରିବେ। 

ମନ୍ତ୍ରୀଙ୍କ ଏହି ଘୋଷଣା ଛାତ୍ରଛାତ୍ରୀ ଓ ଶିକ୍ଷାବିତ୍‌ଙ୍କ ମଧ୍ୟରେ ଆଶା ସଞ୍ଚାର କରିଛି। ବିକଶିତ ଓଡ଼ିଶା ପାଇଁ ନିଶ୍ଚିତ ଭାବେ ଅତ୍ୟାଧୁନିକ ସାଇନ୍ସ ସିଟିର ଆବଶ୍ୟକତା ରହିଛି। ତେବେ ସରକାର କେତେଦୂର ସକାରାତ୍ମକ ଆଭିମୁଖ୍ୟ ‌ନେଇ ଏ ଦିଗରେ ଅଗ୍ରସର ହେଉଛନ୍ତି, ତାହା ପରବର୍ତ୍ତୀ ସମୟରେ ଜଣାପଡ଼ିବ। ପୂର୍ବ ସରକାର ୩୦ ଏକର ଜାଗା ଦେବାକୁ ଅସମର୍ଥ ଥିଲା ବେଳେ ଏବେ ସରକାର ୧୦୦ ଏକର ଜାଗା କେବେ ଓ କେଉଁଠି ଦେବେ, ତାହା ଚର୍ଚ୍ଚାର ବିଷୟ ହୋଇଛି। ଅହମଦାବାଦ ସାଇନ୍ସ ସିଟିର ଓଡ଼ିଆ ଅଧିକାରୀମାନେ ସେବେ ମଧ୍ୟ ରାଜ୍ୟ ସରକାରଙ୍କୁ ବୈଷୟିକ ସହାୟତା ଦେବାକୁ ଆଗ୍ରହ ପ୍ରକାଶ କରିଥିଲେ। କିନ୍ତୁ ସରକାର ସେଥି ପ୍ରତି ଗୁରୁତ୍ବ ଦେଇ ନଥିଲେ। ଏବେ ଜାଗା ମିଳିଲା ପରେ ହିଁ ସାଇନ୍ସ ସିଟି ଆଗେଇବାର ସମ୍ଭାବନା ସୃଷ୍ଟି ହେବ ବୋଲି ବହୁ ବୁଦ୍ଧିଜୀବୀ ମତ ଦେଇଛନ୍ତି।