ମୁଲ୍ଲା ନସିରୁଦ୍ଦିନ କିଛି ଖଜୁରି କୋଳି ଧରି ରାସ୍ତାରେ ଯାଉଥିଲେ। ଦଳେ ପିଲା ତାଙ୍କ ପଛରେ ପଡ଼ିଗଲେ ଏବଂ ଖଜୁରି କୋଳି ମାଗିଲେ।
Sambad is now on WhatsApp
Join and get latest news updates delivered to you via WhatsApp
ନସିରୁଦ୍ଦିନ ସେମାନଙ୍କୁ କହିଲେ- ଦେବାରେ ମନା ନାହିଁ। କିନ୍ତୁ କେମିତି ବାଣ୍ଟିବି ତାହା ହେଉଛି ପ୍ରଶ୍ନ।
ପିଲାମାନଙ୍କ ଭିତରୁ ବୁଦ୍ଧିଆ ପିଲା ପଚାରିଲା- ପ୍ରଶ୍ନ କେମିତି?
ନସିରୁଦ୍ଦିନ କହିଲେ- ମୁଁ ଭଗବାନଙ୍କ ଭଳି ବାଣ୍ଟିବି ନା ମଣିଷଙ୍କ ଭଳି ବାଣ୍ଟିବି?
ବୁଦ୍ଧିଆ ଓ ବୟସରେ ବଡ଼ ପିଲାଟି କହିଲା- ଭଗବାନଙ୍କ ଭଳି ବାଣ୍ଟ। ତାଙ୍କ ଭଳି ବିଚାର କାହାର ନାହିଁ।
ନସିରୁଦ୍ଦିନ କହିଲେ- ତୁମେ ବାବା ଠିକ କହିଛ! ଭଗବାନଙ୍କ ଭଳି ବିଚାର ଆଉ କାହାର ନାହିଁ।
ଏହା କହି ସେ ମୁଠା ମୁଠା ଖଜୁରି ଏଣେ ତେଣେ ଫୋପାଡ଼ି ଦେଇ କହିଲେ- ଏବେ ଯିଏ ଯାହା ପାରୁଛ ନିଅ।
ପିଲାମାନେ ଦୌଡ଼ାଦୌଡ଼ି କରି ଖଜୁରି ଗୋଟାଉଥିବା ବେଳେ ଏ ବିକଳ ଦୃଶ୍ୟ ଦେଖି ଜଣେ କହିଲା- ମୁଲ୍ଲା, ତୁମେ ସତରେ କେତେ ଅମଣିଷ!
ମୁଲ୍ଲା ହସି କହିଲେ- ବୁଦ୍ଦୁ, ଭଗବାନ ଏମିତି ବାଣ୍ଟନ୍ତି। ସେ ପକାଇ ଦିଅନ୍ତି, ଯାହାକୁ ଯାହା ମିଳିଲା, ତାହା ହେଉଛି ତାର ଭାଗ୍ୟ। ବର୍ଷା କଲା ବେଳେ ଭଗବାନ ଦେଖନ୍ତି ନାହିଁ ଯେ କେଉଁଠି ତାର ଦରକାର ଅଛି ଓ କେଉଁଠି ନାହିଁ! ସେ ସବୁଠି ପାଣି ବର୍ଷାନ୍ତି, ତେଣିକି ଯିଏ ଯାହାର ଯେମିତି ଭୋଗିବା କଥା ଭୋଗନ୍ତି। ମଣିଷ ଗଣି ଗଣି ହିସାବ କରି ସମାନ ଭାବେ ବାଣ୍ଟେ।