ଫିଫା ବିଶ୍ବକପ୍-୨୦୨୨
ତୁମ ଲେଖା - ତସନିମ୍ ସୁଲତାନା
ସ୍କୁଲରେ ପ୍ରାର୍ଥନା ପରେ ମୀନା ମୁଖ୍ୟ ଖବରରେ ଫିଫା ବିଶ୍ବକପ୍ – ୨୦୨୨ ଆରମ୍ଭ ହୋଇଥିବା ଖବର କହିଲା। ପିଲାମାନେ ଏହି ବିଶ୍ବକପ୍ ବିଷୟରେ ଅଧିକ କିଛି ଜାଣିବାକୁ ଆଗ୍ରହ ପ୍ରକାଶ କଲେ। ପ୍ରଧାନ ଶିକ୍ଷକଙ୍କ ପରାମର୍ଶରେ କ୍ରୀଡ଼ା ଶିକ୍ଷକ କହିବା ଆରମ୍ଭ କଲେ। ‘‘ପିଲାମାନେ- ସମଗ୍ର ବିଶ୍ବରେ ବନ୍ଧୁତା ଓ ସମ୍ପର୍କ ବୃଦ୍ଧି କରି ଶାନ୍ତି ପ୍ରତିଷ୍ଠା କରାଯାଇ ପାରିବ। ଏଥିପାଇଁ କ୍ରୀଡ଼ାର ମଧ୍ୟ ଭୂମିକା ରହିଛି ।’’
Sambad is now on WhatsApp
Join and get latest news updates delivered to you via WhatsApp
୨୧ ମଇ ୧୯୦୪ ମସିହାରେ ସ୍ବିଜରଲ୍ୟାଣ୍ଡ୍, ବେଲଜିୟମ୍, ସ୍ପେନ୍, ଫ୍ରାନସ୍, ଡେନମାର୍କ ଓ ନେଦରଲ୍ୟାଣ୍ଡ୍ ଭଳି ଫୁଟବଲପ୍ରେମୀ ଦେଶମାନେ ଫୁଟବଲ ଖେଳରେ ଉନ୍ନତି ଆଣିବା ପାଇଁ ‘ଫିଫା’ ନାମରେ ଏକ ଆନ୍ତର୍ଜାତିକ କ୍ରୀଡ଼ା ସଂଗଠନ ପ୍ରତିଷ୍ଠା କରିଥିଲେ। ସ୍ବିଜରଲ୍ୟାଣ୍ଡର ଜୁରିକ୍ ଠାରେ ଏହାର ମୁଖ୍ୟ କାର୍ଯ୍ୟାଳୟ ରହିଛି ।
ଆଜିକୁ ୯୨ ବର୍ଷ ପୁର୍ବେ ୧୯୩୦ ମସିହାରେ ପ୍ରତି ଚାରି ବର୍ଷରେ ଥରେ ଏହି ବିଶ୍ବ ପ୍ରସିଦ୍ଧ ଟୁର୍ନ୍ନାମେଣ୍ଟ୍ ଆୟୋଜିତ ହେଇଥିଲା। ସାରଙ୍କଠାରୁ ଏକଥା ଶୁଣି ମୀନା ଆଶ୍ଚର୍ଯ୍ୟ ହୋଇ କହିଲା- ଆଜି ପର୍ଯ୍ୟନ୍ତ ଏହି ଖେଳ ଜାରି ରହିଛି ? ସାର କହିଲେ- କେବଳ ଦ୍ବିତୀୟ ବିଶ୍ବଯୁଦ୍ଧ ସମୟରେ ୧୯୪୨ ଓ ୧୯୪୬ ମସିହାକୁ ବାଦ୍ ଦେଲେ ଏହି ଖେଳ ଆଜି ପର୍ଯ୍ୟନ୍ତ ଚାଲିଛି ।
ହଁ, ପିଲେ ଶୁଣ- ଫିଫା ସଂଗଠନର ନିଷ୍ପତ୍ତି ଅନୁଯାୟୀ ବିଶ୍ବକପ୍-୨୦୨୨ ଏଥର ଆରବୀୟ ଦେଶ କାତାରରେ ଅନୁଷ୍ଠିତ ହେଉଛି। ଏହି ବ୍ୟୟବହୁଳ ବିଶ୍ବକପ୍ରେ କାତାର ୨୨୦ ବିଲିୟନ୍ ଡଲାର ଖର୍ଚ୍ଚ କରୁଛି। ଏଥିପାଇଁ କାତାର ୫୫ କିଲୋମିଟର ବ୍ୟବଧାନରେ ଆଠଟି ଷ୍ଟାଡିୟମ୍ ନିର୍ମାଣ କରି କ୍ରୀଡ଼ାବିତ୍ ଓ ଖେଳପ୍ରେମୀଙ୍କ ସୁବିଧା ପାଇଁ ସମସ୍ତ ଷ୍ଟାଡିୟମ୍କୁ ରେଳପଥରେ ସଂଯୁକ୍ତ କରିଛି ।
ଏହି ବିଶ୍ବକପ୍ର ଉଦ୍ଘାଟନ ୨୦ ବର୍ଷର ଯୁବକ ‘ଘନିମ୍ ଅଲମୁଫତାହ୍’ ନାମକ ଗୋଡ଼ ନଥିବା ଜଣେ ଦିବ୍ୟାଙ୍ଗ କ୍ରିଡ଼ାବିତ୍ କରିଛନ୍ତି। ଉଦଘାଟନୀ ଉତ୍ସବରେ ଆମେରିକୀୟ ଅଭିନେତା ‘ମୋରଗିନ୍ ଫ୍ରିମ୍ୟାନ୍’ ତାଙ୍କୁ ପ୍ରଶ୍ନ କରିଥିଲେ- ଜାତି, ଧର୍ମ, ଭାଷା, ପରମ୍ପରା ଓ ସାଂସ୍କୃତିକ ବିଭିନ୍ନତା ମଧ୍ୟରେ କିପରି ଏକତା ପ୍ରତିଷ୍ଠା ହୋଇ ପାରିବ? ଘନିମ୍ କହିଥିଲେ- ବିଭିନ୍ନତା ମଧ୍ୟରେ ଲୋକମାନେ ପରଷ୍ପରକୁ ଚିହ୍ନିବେ ଓ ଜାଣି ପାରିବେ ଯେ ସେମାନେ ସମସ୍ତେ ଅଲଗା ନୁହନ୍ତି। ସମସ୍ତ ମାନବ ପରମେଶ୍ବରଙ୍କ ସନ୍ତାନ ଅଟନ୍ତି। କେହି କାହାଠାରୁ ନୀଚ ନୁହନ୍ତି। ଚରିତ୍ରବାନ ବ୍ୟକ୍ତି ହିଁ ପରମେଶ୍ବରଙ୍କ ପାଖରେ ଶ୍ରେଷ୍ଠ। ଯୁବ କ୍ରୀଡ଼ାବିତ୍ଙ୍କ ଏପରି ଉତ୍ତରରେ ଫ୍ରିମ୍ୟାନ୍ ଖୁସି ହୋଇ ଯାଇଥିଲେ ।
ଶିକ୍ଷକଙ୍କ ଠାରୁ ଏତେ କଥା ଶୁଣି ମୀନା ସମେତ ସମସ୍ତ ପିଲା ବେଶ ଖୁସୀ ଜଣା ପଡ଼ୁଥିଲେ। ଶେଷରେ ମୀନା କହିଲା- ଏହି ଫିଫା ବିଶ୍ବକପ୍ କ୍ରିଡ଼ା ସମସ୍ତ ମାନବ ସମାଜରେ ସମାନତା ଓ ମାନବବାଦର ବାର୍ତ୍ତା ସିଞ୍ଚନ କରୁ। ବିଶ୍ବରେ ଶାନ୍ତି ପ୍ରତିଷ୍ଠା ହେଉ ।
ନବମ ଶ୍ରେଣୀ
କାକଟପୁର ବାଳିକା ନୋଡାଲ ଉଚ୍ଚ ବିଦ୍ୟାଳୟ, କାକଟପୁର