୧୮ରୁ ବିଜେଡିର ଯୁବ-ଛାତ୍ର ସମ୍ପର୍କ ଅଭିଯାନ
ଭୁବନେଶ୍ୱର : ରାଜ୍ୟର ଯୁବକ ଓ ଛାତ୍ରମାନଙ୍କୁ ଦଳ ସହ ଯୋଡ଼ିବା ପାଇଁ ବିଜେଡି ପକ୍ଷରୁ ସ୍ୱତନ୍ତ୍ର ଅଭିଯାନ ଆରମ୍ଭ ହେବ। ‘ଯୁବ-ଛାତ୍ର ସମ୍ପର୍କ ଅଭିଯାନ’ ନାମରେ ହେବାକୁ ଥିବା ଏହି କାର୍ଯ୍ୟକ୍ରମ ୧୮ ତାରିଖରୁ ଆରମ୍ଭ ହୋଇ ୧୪୭ଟି ନିର୍ବାଚନମଣ୍ଡଳୀରେ ଚାଲିବ। ଏହା ମାଧ୍ୟମରେ ଯୁବ-ଛାତ୍ରଙ୍କ ପାଇଁ ରାଜ୍ୟ ସରକାର କରିଥିବା ଯୋଜନା ସମ୍ପର୍କରେ ସଚେତନତା ସୃଷ୍ଟି କରାଯିବ।
Sambad is now on WhatsApp
Join and get latest news updates delivered to you via WhatsApp
ଏହି ଅଭିଯାନ ସମ୍ପର୍କରେ ସୂଚନା ଦେଇ ବିଜେଡି ଯୁବ ଶାଖା ସଭାପତି ଅମରେଶ ପତ୍ରୀ ଓ ଛାତ୍ର ଶାଖା ସଭାପତି ରାଣାପ୍ରତାପ ପାତ୍ର କହିଥିଲେ, ବିଜେଡି ତା’ର ସାଂଗଠନିକ କାର୍ଯ୍ୟଧାରାରେ ଯୁବକ ଓ ଛାତ୍ରଙ୍କୁ ବିଶେଷ ପ୍ରାଧାନ୍ୟ ଦେଉଛି। ଏହାକୁ ଆହୁରି ବ୍ୟାପକ କରାଯିବାକୁ ଯୋଜନା ହୋଇଛି। ‘ଯୁବ-ଛାତ୍ର ସମ୍ପର୍କ ଅଭିଯାନ’ ପ୍ରଥମ ପର୍ଯ୍ୟାୟରେ ତିନିଟି ଜିଲ୍ଲା ନବରଙ୍ଗପୁର, କୋରାପୁଟ ଓ ବରଗଡ଼ ଜିଲ୍ଲାର ନିର୍ବାଚନମଣ୍ଡଳୀରେ କରାଯିବ। ସ୍ଥାନୀୟ ନେତାଙ୍କ ସମେତ ସେହି ଅଞ୍ଚଳର କୃତୀ ଯୁବ ପ୍ରତିଭାମାନଙ୍କୁ ସାମିଲ୍ କରାଯିବ। ଏ ନେଇ ସୋସିଆଲ୍ ମିଡିଆର ବହୁଳ ଉପଯୋଗ କରାଯିବ। ରାଜ୍ୟ ସରକାରଙ୍କ ସଫଳତା, ବିଶେଷ କରି ଯୁବ-ଛାତ୍ରଙ୍କ ସର୍ବାଙ୍ଗୀନ ବିକାଶ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୂରଦୃଷ୍ଟିସମ୍ପନ୍ନ କାର୍ଯ୍ୟକ୍ରମ ଓ ନିଷ୍ପତ୍ତି ସମ୍ପର୍କରେ ଏହି ଅଭିଯାନ ମାଧ୍ୟମରେ ଅବଗତ କରାଯିବ।