ମହାତ୍ମା ଗାନ୍ଧୀଙ୍କ ୧୫୦ତମ ଜୟନ୍ତୀରେ ଆୟୋଜନ ହେବ କଂଗ୍ରେସର ପଦଯାତ୍ରା
ଭୁବନେଶ୍ୱର : ପ୍ରଦେଶ କଂଗ୍ରେସ କାର୍ଯ୍ୟାଳୟ ଠାରେ ପିସିସି ସଭାପତି ନିରଞ୍ଜନ ପଟ୍ଟନାୟଙ୍କ ସଭାପତିତ୍ୱରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି। ଚଳିତ ନିର୍ବାଚନରେ ଦଳୀୟ ସମସ୍ତ ବିଧାନସଭା ଓ ଲୋଭସଭାରେ ପ୍ରତିଦ୍ୱନ୍ଦ୍ୱିତା କରୁଥିବା ପ୍ରାର୍ଥୀମାନଙ୍କୁ ଉକ୍ତ ବୈଠକରେ ପ୍ରତିନିଧି ଭାବେ ଡକାଯାଇଥିଲା। ଆଲୋଚନା ଆରମ୍ଭକରି ପ୍ରଦେଶ କଂଗ୍ରେସ ସଭାପତି ପଟ୍ଟନାୟକ କହିଥିଲେ ଯେ, ଜାତିର ଜନକ ମହାତ୍ମା ଗାନ୍ଧୀଙ୍କ ୧୫୦ତମ ଜୟନ୍ତୀ ଅବସରରେ ଚଳିତ ବର୍ଷ ଅକ୍ଟୋବର ୨ ତାରିଖରେ ପ୍ରଦେଶ କଂଗ୍ରେସ ମୁଖ୍ୟାଳୟରେ ଏକ ଭବ୍ୟ କାର୍ଯ୍ୟକ୍ରମ ଅନୁଷ୍ଠିତ ହେବ। କାର୍ଯ୍ୟକ୍ରମ ଅନୁଯାୟୀ ସର୍ବନିମ୍ନ ୧ ଘଣ୍ଟା ପଦଯାତ୍ରାର ଆୟୋଜନ ହେବ। ମହାତ୍ମା ଗାନ୍ଧୀଙ୍କ ସ୍ମୃତି ସହ ଜଡ଼ିତ ସ୍ଥାନମାନଙ୍କରେ ବିଭିନ୍ନ ପର୍ଯ୍ୟାୟରେ ପଦଯାତ୍ରା କରିବାପାଇଁ ସ୍ଥିର ହୋଇଛି।
Sambad is now on WhatsApp
Join and get latest news updates delivered to you via WhatsApp
ଅକ୍ଟୋବର ୩ରୁ ୯ ତାରିଖ (ଉତ୍କଳମଣି ଗୋପବନ୍ଧୁ ଦାସଙ୍କ ଜୟନ୍ତୀ) ପର୍ଯ୍ୟନ୍ତ ପ୍ରତ୍ୟେକ ଜିଲ୍ଲା ଓ ବ୍ଲକ ସ୍ତରରେ ବକୃତାମାଳା, ସେମିନାର ଓ ଫଟୋ ପ୍ରଦର୍ଶନୀ କରାଯିବ। ଜନସାଧାରଣଙ୍କର ଅବଗତି ନିମନ୍ତେ ମହାତ୍ମାଙ୍କ ଉପରେ ସମ୍ବଳିତ ଚିନ୍ତନର ପ୍ରତିଫଳନ ସଦୃଶ ସ୍ୱାଧୀନତା ସଂଗ୍ରାମ, ଜାତୀୟତାବାଦ, ଧର୍ମନିରପେକ୍ଷତା ତଥା ଅହିଂସା ସଂପର୍କରେ ପୁଙ୍ଖାନୁପୁଙ୍ଖ ଆଲୋଚନା ହେବ। ସାଂପ୍ରତିକ ସମାଜରେ ପ୍ରତ୍ୟହ ଘଟୁଥିବା ଅର୍ଥନୈତିକ ସ୍ଥିତି ଓ ରାଜନୈତିକ ବାତାବରଣ ଉପରେ ଆଲୋଚନା ହେବ।
ସଭ୍ୟ ସଂଗ୍ରହ ସଂପର୍କରେ ରାଷ୍ଟ୍ରୀୟ ସଭାପତି ଗାନ୍ଧୀ ଅତ୍ୟନ୍ତ ଗୁରୁତ୍ୱ ଆରୋପ କରିଛନ୍ତି। ସଭ୍ୟସଂଗ୍ରହ ଉଭୟ ଡିଜିଟାଲ ଓ ପାରମ୍ପରିକ ପୁସ୍ତିକା ମାଧ୍ୟମରେ ଆଗାମୀ ୨ ଅକ୍ଟୋବର ଗାନ୍ଧୀ ଓ ଶାସ୍ତ୍ରୀ ଜୟନ୍ତୀରୁ ଆରମ୍ଭ କରାଯିବ। ଦେଶରେ ଏନଡିଏ ସରକାରଙ୍କ ଦ୍ୱାରା ଅର୍ଥନୀତିର ଦୁର୍ବଳ ପରିଚାଳନା ତୃଟି ଯୋଗୁଁ ମୋଦୀ ସରକାର ଉପରୁ ଜନସାଧାରଣଙ୍କର ବିଶ୍ୱସନୀୟତା ଦୃତ ଗତିରେ ହ୍ରାସ ପାଉଛି।
ଏଣୁ ଏ ସଂପର୍କରେ ଜନ ସଚେତନତା ସୃଷ୍ଟିପାଇଁ ଅକ୍ଟୋବର ୧୫ରୁ ୨୫ ତାରିଖ ପର୍ଯ୍ୟନ୍ତ ସମସ୍ତ ଜିଲ୍ଲା ସଦର ମହକୁମା ଓ ବ୍ଲକ ସ୍ତରରେ ଆନ୍ଦୋଳନାତ୍ମକ କାର୍ଯ୍ୟ ଗ୍ରହଣ କରାଯିବାକୁ ସ୍ଥିର କରାଯାଇଛି।