ପୁଣି ମହାରଥୀଙ୍କୁ ଟାର୍ଗେଟ କଲେ ଦାମ, କହିଲେ, ‘ମନ୍ତ୍ରୀ ପଦ ଯିବା ପଛରେ ମହାରଥୀଙ୍କ ହାତ ! ମହାରଥୀଙ୍କ ଅମଳରେ ହୋଇଛି ସବୁ ଦୁର୍ନୀତି’
ଭୁବନେଶ୍ୱର: ଆଜି ଓମଫେଡ ଦୁର୍ନୀତିକୁ ନେଇ ପୁଣି କୃଷି ମନ୍ତ୍ରୀ ପ୍ରଦୀପ ମହାରଥୀଙ୍କୁ ଟାର୍ଗେଟ କରିଛନ୍ତି ବିଜେଡିର ବରିଷ୍ଠ ନେତା ତଥା ବିଧାୟକ ଡା.ଦାମୋଦର ରାଉତ । ତାଙ୍କ ମନ୍ତ୍ରୀ ପଦ ଯିବା ପଛରେ କୃଷିମନ୍ତ୍ରୀ ପ୍ରଦୀପ ମହାରଥୀଙ୍କ ହାତ ଥିବା ସେ ଅଭିଯୋଗ କରିଛନ୍ତି । ଏପରିକି ମହାରଥୀଙ୍କ ଅମଳରେ ସବୁ ଦୁର୍ନୀତି ହୋଇଥିବା କହିଛନ୍ତି ଦାମୋଦର ରାଉତ । ଗତକାଲି ଚାରା ଦୁର୍ନୀତିକୁ ନେଇ ଉଭୟଙ୍କ ମଧ୍ୟରେ କଥା କଟାକଟି ହୋଇଥିଲା। ଆଜି ଓମଫେଡରେ ଦୁର୍ନୀତି ଅଭିଯୋଗ ହୋଇଛି ବୋଲି ଅଭିଯୋଗ ଆଣିଛନ୍ତି ପୂର୍ବତନ ମନ୍ତ୍ରୀ ଦାମ ରାଉତ ।
Sambad is now on WhatsApp
Join and get latest news updates delivered to you via WhatsApp
ଦାମ କହିଛନ୍ତି ଯେ, ଓମଫେଡ୍ ମିଲ୍କ ପାଉଚ୍ ପାଇଁ ଯେଉଁ ପଲିଥିନ୍ ବ୍ୟବହାର ହୁଏ ସେଥିରେ ୩୦ କୋଟି ଟଙ୍କାର ଦୁର୍ନୀତି ହୋଇଛି । ଯେଉଁଥି ପାଇଁ ଓମଫେଡ ଏମଡି ଭିଜିଲାନ୍ସ ତଦନ୍ତ ପାଇଁ ଚିଠି ଲେଖିଥିଲେ । ସେତେବେଳେ କାହିଁକି ଭିଜିଲାନ୍ସ ତଦନ୍ତ ପାଇଁ ଦିଆଗଲା ନାହିଁ ବରଂ ମୁଖ୍ୟମନ୍ତ୍ରୀଙ୍କ ଦପ୍ତର ବିଭାଗୀୟ ତଦନ୍ତ ନିର୍ଦ୍ଦେଶ ଜାରି କରାଗଲା । ତଦନ୍ତ ପରେ ଏମଡିଙ୍କୁ ବଦଳି କରାଗଲା ଏବଂ ଯାହାଙ୍କ ସମୟରେ ଦୁର୍ନୀତି ହୋଇଥିଲା ତାଙ୍କୁ ପୁର୍ନବାର ପଦବିରେ ବସାଗଲା । ଶେଷରେ ତାଙ୍କ ସପକ୍ଷରେ ତଦନ୍ତ ରିପୋର୍ଟ ଆସିଲା । ଏହା ପଛରେ କିଏ ଗଡ ଫାଦର ବୋଲି ପ୍ରଶ୍ନ କରିଛନ୍ତି ଦାମ?
ସେପଟେ ଦାମଙ୍କ ଅଭିଯୋଗରେ ମୁହଁ ଖୋଲିଛନ୍ତି ମନ୍ତ୍ରୀ ପ୍ରଦୀପ ମହାରଥୀ । ମହାରଥୀ କହିଛନ୍ତି ଯେ, ମୁଁ କ’ଣ ପାଇଁ ତାଙ୍କ ମନ୍ତ୍ରୀ ପଦ ଯିବା ପଛରେ ଭାଗିଦାର ହେବି? ତେଣୁ ଯଦି ଦାମ ବାବୁ ଏମିତି କିଛି କହିଥିବେ ତାହା ତାଙ୍କ ଉଦ୍ଭଟ ଚିନ୍ତା ଧାରା । ଓମଫେଡ ଏକ ସ୍ୱୟଂ ଚାଳିତ ସଂସ୍ଥା, ନିଜ ନିଷ୍ପତ୍ତି ନିଜେ ନିଅନ୍ତି ତେଣୁ , ଯଦି କିଛି ଦୁର୍ନୀତି ହୋଇଥିବା ବିଧାନସଭା ପରେ ପରେ ମୁଁ ନିଜେ ତାହାର ତର୍ଜମା କରିବି। କଳିଯୁଗରେ ଏମିତି କେହି ସତୀ ନାହିଁ ଯେ ଲାଞ୍ଚ ଯାଚିଲେ ନେବ ନାହିଁ ବୋଲି କହି ଦାମଙ୍କ କୋର୍ଟକୁ ବଲ ଫିଙ୍ଗିଚନ୍ତି ପ୍ରଦୀପ ମହାରଥୀ ।