ନୂଆଦିଲ୍ଲୀ: ଦିଲ୍ଲୀରେ ଚାଲିଥିବା ଜେଡିୟୁ ରାଷ୍ଟ୍ରୀୟ କାର୍ଯ୍ୟକାରିଣୀରେ ଆଜି କିଛି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି | ରାଜୀବରଞ୍ଜନ ସିଂହ ଓରଫ୍‌ ଲଲନ୍‌ ସିଂହ ଇସ୍ତଫା ଦେବାରୁ ଆଜି ବିହାରର ମୁଖ୍ୟମନ୍ତ୍ରୀ ନୀତୀଶ କୁମାର ‘ଜନତା ଦଳ (ୟୁନାଇଟେଡ୍‌)’ର ନୂତନ ଅଧ୍ୟକ୍ଷ ହୋଇଛନ୍ତି। ତେବେ କାର୍ଯ୍ୟକାରିଣୀ ବୈଠକ ପରେ ବରିଷ୍ଠ ନେତା କେସି ତ୍ୟାଗୀ ଗଣମାଧ୍ୟମକୁ ସମ୍ବୋଧିତ କରିଛନ୍ତି। ସେ କହିଛନ୍ତି ଯେ ରାଷ୍ଟ୍ରୀୟ କାର୍ଯ୍ୟକାରିଣୀର ନିଷ୍ପତ୍ତିକୁ ଅନୁମୋଦନ କରାଯାଇଛି। ଲଲନ ସିଂଙ୍କ ଇସ୍ତଫା ଗ୍ରହଣ କରି ନୀତୀଶ କୁମାର ଅଧ୍ୟକ୍ଷ ହୋଇଥିବାବେଳେ ଜାତି ଭିତ୍ତିକ ଜନଗଣନାକୁ ନେଇ ସମଗ୍ର ଦେଶରେ ପ୍ରଚାର ପ୍ରସାର କରାଯିବ | ଏହା ମଧ୍ୟ ଇଣ୍ଡିଆ ମେଣ୍ଟର ଏଜେଣ୍ଡା ହେବ।

Advertisment

ଜାନୁଆରୀ ମାସରେ ନୀତୀଶ କୁମାର ଜନ ଜାଗରଣ ରାଲି କରିବେ | ଏହା ଝାଡଖଣ୍ଡରୁ ଆରମ୍ଭ ହେବ | ଏନଡିଏରେ ଯୋଗଦେବା ପ୍ରଶ୍ନରେ ସେ କହିଛନ୍ତି ଯେ ଜେଡିୟୁ ଏକାଠି ଅଛି, ଏନଡିଏରେ ଯୋଗଦେବା ବିଷୟରେ କଳ୍ପନା କରନ୍ତୁ ନାହିଁ। ଏନଡିଏରେ ଜେଡିୟୁ ସାମିଲ ହେବାର ପ୍ରଶ୍ନ ଉଠୁନାହିଁ ବୋଲି କେସି ସ୍ପଷ୍ଟ ଭାବରେ କହିଛନ୍ତି | ସେ କହିଛନ୍ତି ଯେ ରାଷ୍ଟ୍ରୀୟ କାର୍ଯ୍ୟକାରିଣୀରେ ମୁଖ୍ୟତଃ ୪ଟି ରାଜନୈତିକ ପ୍ରସ୍ତାବ ପାରିତ ହୋଇଛି | ଏଜେଣ୍ଡା ମଧ୍ୟରେ ଜାତି ଭିତ୍ତିକ ଗଣନା, ସଂସଦର ଶୀତ ଅଧିବେଶନରେ ସାଂସଦଙ୍କ ନିଲମ୍ବନକୁ ନିନ୍ଦା, ପ୍ରାର୍ଥୀ ଚୟନ ଓ ଦଳର ନେତା ନୀତୀଶ କୁମାରଙ୍କୁ ସର୍ବସମ୍ମତି କ୍ରମେ ଗ୍ରହଣ କରିବା ପ୍ରସ୍ତାବ ପାରିତ ହୋଇଛି |