ଭୁବନେଶ୍ବର: ପଞ୍ଚାୟତ ନିର୍ବାଚନ ପାଇଁ ଆରମ୍ଭ ହୋଇଛି ପ୍ରତିବାଦର ରାତନୀତି । କେତେବେଳେ କିଏ କାହା ଉପରକୁ ଅଣ୍ଡାମାଡ କରୁଛି ଆଉ ସେଥିରେ କଣ ରାଜନୈତିକ ଫାଇଦା ରହିଛି, ତାର ଅନୁଶୀଳନ ଖୁବ୍ କମ୍ ହେଉଛି । ବରଂ କର୍ମୀଙ୍କୁ ସଜାଗ କରିବାକୁ ଏହାକୁ ଏକ ଆୟୁଧ ଭାବେ ଧରି ନେଇଛନ୍ତି ରାଜନୈତିକ ଦଳ । କେତେବେଳେ ମୁଖ୍ୟମନ୍ତ୍ରୀ, କେତେବେଳେ ସାଂସଦ ତ ଆଉ କେତେବେଳେ କେନ୍ଦ୍ରମନ୍ତ୍ରୀ । ରାଜନୀତିର ଏହି ଧାରା ପଞ୍ଚାୟତ ପାଣିପାଗକୁ ସରଗରମ କରିଦେଇଛି ।
Sambad is now on WhatsApp
Join and get latest news updates delivered to you via WhatsApp
କରୋନା ଯୋଗୁଁ ଶିଥିଳ ପଡ଼ିଥିବା ରାଜନୈତିକ ପାଣିପାଗ, ମମିତା ହତ୍ୟା ମାମଲାକୁ ନେଇ ଉଷୁମ ହେବା ପରେ ଓଡ଼ିଶା ରାଜନୀତିରେ ପୁଣିଥରେ ଫେରିଛି ଅଣ୍ଡାମାଡ଼ । ଅକ୍ଟୋବର ୧୯ ତାରିଖରେ ଗୃହରାଷ୍ଟ୍ରମନ୍ତ୍ରୀ ବିଦ୍ୟଶଙ୍କର ମିଶ୍ରଙ୍କ ଭୁବନେଶ୍ୱର ବାସଭବନ ଉପରେ କଂଗ୍ରେସ କର୍ମୀଙ୍କ ଅଣ୍ଡାମାଡ଼ ପରେ ଏହା ଅନ୍ୟ ଦଳକୁ ବି ଡେଇଁଛି । କଂଗ୍ରେସ ପରେ ବିଜେପି, ଏପରିକି ବିଜେଡି ମଧ୍ୟ ଅଣ୍ଡାମାଡ଼ କରିଛି ।
ମମିତା ମାମଲାରେ ମନ୍ତ୍ରୀ ଓ ଶାସକ ଦଳର ନେତାଙ୍କୁ ବିରୋଧୀ ଟାର୍ଗେଟ କରୁଥିବା ବେଳେ ଇନ୍ଧନ ଗ୍ୟାସ ଦରବୃଦ୍ଧି ପ୍ରତିବାଦରେ କେନ୍ଦ୍ର ମନ୍ତ୍ରୀ ବିଶ୍ୱେଶ୍ୱର ଟୁଡୁଙ୍କ ଗାଡ଼ି ଉପରେ ବିଜେଡି କର୍ମୀ ଅଣ୍ଡାମାଡ଼ କରିଛନ୍ତି । ତେବେ ବୁଧବାର ଦିନ ପୁରୀରୁ ଫେରୁଥିବା ବେଳେ ମୁଖ୍ୟମନ୍ତ୍ରୀଙ୍କ କାରକେଡ୍ ଉପରେ ଅଣ୍ଡାମାଡ଼ କରି ରାଜନୀତିର ପାରା ବଢ଼ାଇଛନ୍ତି ବିଜେପି କର୍ମୀ । ମୁଖ୍ୟମନ୍ତ୍ରୀଙ୍କ ଗାଡ଼ିକୁ ଅଣ୍ଡାମାଡ଼ କରିଥିବା ଅଭିଯୋଗରେ ବିଜେପି ଯୁବମୋର୍ଚ୍ଚାର ୩ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ପୁରୀ ପୁଲିସ । ସେମାନଙ୍କ ବିରୋଧରେ ଲାଗିଛି ଆଇପିସି ଧାରା ୨୯୪, ୩୪୧, ୩୫୩, ୩୩୨, ୩୩୬, ୫୦୬, ୩୪ ।
ରାଜନୀତିର ଅସ୍ତ୍ର ପାଲଟିଛି ‘ଅଣ୍ଡାମାଡ଼’ । ଲୋକଙ୍କ ଦୃଷ୍ଟି ଆକର୍ଷଣ ପାଇଁ ଉଦ୍ୟମ କରୁଛନ୍ତି ରାଜନୈତିକ ଦଳ । ଗୁରୁବାର ଦିନ ଭୁବନେଶ୍ୱର ଉପକଣ୍ଠ ବାଲିପାଟଣା ନିକଟରେ ସାଂସଦ ଅପରାଜିତା ଷଡ଼ଙ୍ଗୀଙ୍କ ଗାଡ଼ି ଉପରେ ଅଣ୍ଡାମାଡ଼ କରିଛି ଛାତ୍ର କଂଗ୍ରେସ । ଦେଶରେ ଦରଦାମ ବୃଦ୍ଧି ପାଇଁ ବିଜେପିକୁ ଦାୟୀ କରି ସାଂସଦଙ୍କୁ ଟାର୍ଗେଟ କରିଛି ଦଳ । ଆଗକୁ ପଞ୍ଚାୟତ ଓ ପୌର ନିର୍ବାଚନଥିବାରୁ ବିକ୍ଷୋଭ, ପ୍ରତିବାଦ ଓ ଅଣ୍ଡାମାଡ଼ର ରାଜନୀତି କରି ଲୋକଙ୍କ ନିକଟବର୍ତ୍ତି ହେବାକୁ ଚାଲିଛି ରାଜନୈତିକ ଦଳ ମଧ୍ୟରେ ପ୍ରତିଯୋଗିତା ।