‘ମୁଁ ଏଭଳି କୌଣସି ଚର୍ଚ୍ଚା ଏ ଯାଏଁ ଶୁଣିନାହିଁ ’ : ଜାଣନ୍ତୁ ଓଡ଼ିଶାରେ କେଉଁ ପ୍ରଶ୍ନରେ ଏପରି ଉତ୍ତର ଦେଇଥିଲେ ରାହୁଲ
ଭୁବନେଶ୍ବର: ସକ୍ରିୟ ରାଜନୀତିରେ ପ୍ରିୟଙ୍କା ଗାନ୍ଧି ପ୍ରବେଶ କରିବା ପରେ ତାଙ୍କୁ କଂଗ୍ରେସ ଦଳର ମହାସଚିବ ଭାବେ ନିଯୁକ୍ତ କରାଯାଇଛି । ଏହାଛଡା ଉତ୍ତର ପ୍ରଦେଶର ଦାୟିତ୍ୱ ମଧ୍ୟ ପ୍ରିୟଙ୍କାଙ୍କ ହାତରେ ଦେଇଛନ୍ତି ଭାଇ ରାହୁଲ । ତେବେ ପ୍ରିୟଙ୍କା ସିଧାସଳଖ ରାଜନୀତିରେ ଯୋଗ ଦେବା ପରେ ରାହୁଲଙ୍କ ଦାଦା ପୁଅ ଭାଇ ବରୁଣ ଗାନ୍ଧି ମଧ୍ୟ ବିଜେପି ଛାଡି କଂଗ୍ରେସର ହାତ ଧରିବେ ବୋଲି ଚର୍ଚ୍ଚା ହେଉଛି । ତେବେ ଏଭଳି ଚର୍ଚ୍ଚାର ଉତ୍ତର ଦେଇଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ ।
Sambad is now on WhatsApp
Join and get latest news updates delivered to you via WhatsApp
ଓଡିଶା ଗସ୍ତରେ ଆସିଥିବା ରାହୁଲ ଭୁବନେଶ୍ୱରରେ ବୁଦ୍ଧିଜୀବୀ ମାନଙ୍କ ସହ ଆଲୋଚନା ବେଳେ ବରୁଣ ଗାନ୍ଧୀ କଣ କଂଗ୍ରେସରେ ସାମିଲ ହେଉଛନ୍ତି କି ପ୍ରଶ୍ନ ପଚରାଯାଇଥିଲା । ଯାହାର ଉତ୍ତର ସମସ୍ତଙ୍କ ସାମ୍ନାରେ ରଖିଥିଲେ ରାହୁଲ । ସିଧାସଳଖ ଭାବେ କହିଥିଲେ, ‘ମୁଁ ଏଭଳି କୌଣସି ଚର୍ଚ୍ଚା ଏ ଯାଏଁ ଶୁଣିନାହିଁ ।’
ଯେତେେବେଳ ରାହୁଲ ଗାନ୍ଧି କଂଗ୍ରେସ ଅଧ୍ୟକ୍ଷ ଭାବେ ଦାୟିତ୍ୱ ଗ୍ରହଣ କଲେ ସେବେଠାରୁ ବରୁଣ ଗାନ୍ଧି କଂଗ୍ରେସରେ ସାମିଲ ହେବେ ବୋଲି ଚର୍ଚ୍ଚା ହୋଇ ଆସୁଥିଲା । ତେବେ ପ୍ରିୟଙ୍କା ଗାନ୍ଧିଙ୍କ ସକ୍ରିୟ ରାଜନୀତିରେ ପ୍ରବେଶ ପରେ ଏହି ଚର୍ଚ୍ଚା ଆହୁରି ଜୋର ଧରିଛି । ଏସବୁ ଭିତରେ ଗତ କିଛି ଦିନ ପୂର୍ବେ ବରୁଣ ଗାନ୍ଧି ଏଭଳି କିଛି ବୟାନ ଦେଇଛନ୍ତି ଯେଉଁଥିରେ କେନ୍ଦ୍ର ସରକାରଙ୍କୁ ସମାଲୋଚନା କରିଛନ୍ତି । ଖାସକରି ରୋହିଙ୍ଗ୍ୟା ମୁସଲମାନ ପ୍ରସଙ୍ଗରେ କେନ୍ଦ୍ର ସରକାରଙ୍କୁ ବିରୋଧ ମଧ୍ୟ କରିଛନ୍ତି ।
୧୯୮୦ ମସିହାରେ ଏକ ବିମାନ ଦୁର୍ଘଟଣାରେ ସଞ୍ଜୟ ଗାନ୍ଧିଙ୍କର ମୃତ୍ୟୁ ହୋଇଥିଲା । ଆଉ ଏହା ପରଠାରୁ ସଞ୍ଜୟଙ୍କ ପତ୍ନୀ ମେନକା ଗାନ୍ଧି କଂଗ୍ରେସ ଠାରୁ ଦୂରେଇ ଯାଇଥିଲେ । ୧୯୮୮ରେ ଜନତା ଦଳରେ ମେନକା ଯୋଗ ଦେଇଥିବା ବେଳେ ୨୦୦୪ରେ ପୁଅ ବରୁଣଙ୍କ ସହ ବିଜେପିରେ ସାମିଲ ହୋଇଥିଲେ । ପରେ ୨୦୦୯ରେ ପିଲଭିଟ୍ ଆସନରୁ ବରୁଣ ନିର୍ବାଚନ ଲଢିବା ସହ ସାଂସଦ ଭାବେ ନିର୍ବାଚିତ ହୋଇଥିଲେ। ପରେ ୨୦୧୪ରେ ଉତ୍ତର ପ୍ରଦେଶର ସୁଲତାନପୁରରୁ ଲୋକସଭା ଆସନରେ ନିର୍ବାଚିତ ହୋଇଥିଲେ ବରୁଣ । ଜଣେ ଲୋକପ୍ରିୟ ଓ ଅଗ୍ନିବର୍ଷୀ ଭାଷଣ ଦେଉଥିବା ନେତା ଭାବେ ବରୁଣ ଜଣାଶୁଣା ।