ବଚ୍ଚନ ପରିବାରର ନାମ ନେଇ ମୋଦୀଙ୍କୁ ଟାର୍ଗେଟ କଲେ ରାହୁଲ୍‌

ନୂଆଦିଲ୍ଲୀ: ଗତ ମାସ ଅଯୋଧ୍ୟାରେ ରାମ ମନ୍ଦିର ପ୍ରତିଷ୍ଠା ସମାରୋହକୁ ନେଇ କଂଗ୍ରେସ ନେତା ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟାର୍ଗେଟ କରିଛନ୍ତି। ଅନ୍ୟାନ୍ୟ ପଛୁଆ ବର୍ଗ (ଓବିସି) ର ସଦସ୍ୟଙ୍କ ଅନୁପସ୍ଥିତି ଉପରେ ପ୍ରଶ୍ନ ଉଠାଇ ରାହୁଲ କହିଛନ୍ତି ‌ଯେ ରାମ ମନ୍ଦିର ଉଦ୍‌ଘାଟନୀ ଉତ୍ସବରେ କେବଳ ଅମିତାଭ ବଚ୍ଚନ, ଐଶ୍ବର୍ଯ୍ୟା ରାୟ ଓ ବଡ଼ ବଡ଼ ବ୍ୟବସାୟୀମାନଙ୍କ ମୁହଁ ଦିଶୁଥିଲା। ଜଣେ ବି ଅନୁସୂଚିତ ଜାତି କିମ୍ବା ଅନୁସୂଚିତ ଜନଜାତିର ଲୋକ ନଜର ଆସିନଥିଲେ।

ରାହୁଲ ଗଣମାଧ୍ୟମ ପ୍ରତିନିଧିଙ୍କୁ ପ୍ରଶ୍ନ କରିଛନ୍ତି କି ‘‘ଆପଣ ରାମ ମନ୍ଦିର ପ୍ରାଣ ପ୍ରତିଷ୍ଠା ସମାରୋହ ଦେଖିଛନ୍ତି କି? ଗୋଟିଏ ଓବିସି ଚେହେରା ଥିଲା କି? ସେଠାରେ କେବଳ ଐଶ୍ବର୍ଯ୍ୟା ରାୟ, ଅମିତାଭ ବଚ୍ଚନ ଏବଂ ନରେନ୍ଦ୍ର ମୋଦୀ ଥିଲେ।" ରବିବାର ଦିନ ୟୁପିର ପ୍ରୟାଗରାଜ୍‌ରେ ସେ ତାଙ୍କର ‘ଭାରତ ଯୋଡୋ ନ୍ୟାୟ ଯାତ୍ରା’ ସମୟରେ ଏକ ଜନସମାବେଶକୁ ସମ୍ବୋଧିତ କରି ଏପରି କହିଛନ୍ତି।

ଜାତିଗତ ଜନଗଣନା ଆବଶ୍ୟକତାକୁ ଗାନ୍ଧୀ ପୁଣି ଥରେ ଦୃଢ଼ ଭାବରେ ପ୍ରୋତ୍ସାହିତ କରି ଏହାକୁ ସାମାଜିକ ଅସମାନତାକୁ ପ୍ରକାଶ କରିବା ପାଇଁ ଏକ ଅତ୍ୟାବଶ୍ୟକ ଉପକରଣ ବୋଲି କହିଥିଲେ।

ପ୍ରଧାନମନ୍ତ୍ରୀ ମୋଦୀ ଏବଂ ଆରଏସଏସ ମୁଖ୍ୟ ମୋହନ ଭଗବତ ରାମ ମନ୍ଦିର ସମାରୋହରେ ଅଧ୍ୟକ୍ଷତା କରିଥିଲେ, ଏଥିରେ ହଜାର ହଜାର ସେଲିବ୍ରିଟି, ରାଜନେତା ଏବଂ ମାନ୍ୟଗଣ୍ୟ ବ୍ୟକ୍ତି ଯୋଗ ଦେଇଥିଲେ। ତେବେ କଂଗ୍ରେସ ସମେତ ବିରୋଧୀ ଦଳର ରାଜନେତାମାନେ ଏହାକୁ ଶେ‌ାଷଣର ନାମ ଦେଇ ଉଦ୍‌ଘାଟନୀ ସମାରୋହକୁ ଅଣଦେଖା କରିଥିଲେ।