ତାପମାତ୍ରା ସହ ବଢୁଛି ମାଈ ଅଲିଭ୍‌ ରିଡ୍‌ଲେ ଜନ୍ମ

ଗଞ୍ଜାମ ଜିଲ୍ଲାର ଋଷିକୁଲ୍ୟା ମୁହାଣରେ ୧୫ ବର୍ଷ ଧରି ଅଲିଭ୍‌ ରିଡ୍‌ଲେ କଇଁଛଙ୍କ ଅଣ୍ଡାରୁ ଛୁଆ ଫୁଟିବାର ଢାଞ୍ଚାକୁ ଅଧ୍ୟୟନ କରି ବେଙ୍ଗାଲୁରୁର ଆଇଆଇଏସ୍‌ସି ଓ ଦକ୍ଷିଣା ଫାଉଣ୍ଡେସନ୍‌ର ମିଳିତ ଉଦ୍ୟମରେ ଏକ ରିପୋର୍ଟ ପ୍ରକାଶ ପାଇଛି। ଅଣ୍ଡା ଦେବାକୁ ଆସୁଥିବା କଇଁଛମାନଙ୍କ ବସାର ତାପମାତ୍ରା ଓ ନବଜାତ କଇଁଛଙ୍କ ଲିଙ୍ଗ ଉପରେ ଧ୍ୟାନ ରଖି ପ୍ରସ୍ତୁତ ‘ମନିଟରିଂ ସି ଟର୍ଟଲସ୍‌ ଇନ୍‌ ଇଣ୍ଡିଆ, ୨୦୦୮-୨୦୨୪’ ରିପୋର୍ଟ ଅନୁସାରେ, ଜନ୍ମ ନେଉଥିବା ଶାବକଙ୍କ ମଧ୍ୟରୁ ହାରାହାରି ୭୧% ହେଉଛନ୍ତି ମାଈ। ଜଳବାୟୁ ପରିବର୍ତ୍ତନ ଯୋଗୁଁ ତାପମାତ୍ରା ବୃଦ୍ଧି ପାଉଥିବାରୁ ଅଧିକାଂଶ ବର୍ଷ ମାଈ କଇଁଛଙ୍କ ଜନ୍ମ ହାର ଅଧିକ ରହୁଛି। ଫଳରେ ଅଣ୍ଡିରା କଇଁଛଙ୍କ ସଂଖ୍ୟା କମୁଛି ଏବଂ ପ୍ରଜନନର ହାର ହ୍ରାସ ପାଇ ଏ କଇଁଛ ଜାତିର ଭବିଷ୍ୟତ ବିପନ୍ନ ହେବାର ଆଶଙ୍କା ପ୍ରକାଶ ପାଇଛି।