ଅର୍ଥ ସୂତ୍ର: କମୋଡିଟି ବଜାରରେ ନିବେଶ

ସେୟାର୍‌ ବଜାରରେ ନିବେଶ କରି ଯେଭଳି ଆର୍ଥିକ ଅଭିବୃଦ୍ଧି ହାସଲ କରାଯାଏ, ଠିକ୍‌ ସେଭଳି ଦ୍ରବ୍ୟ ବଜାର ବା କମୋଡିଟି ମାର୍କେଟ୍‌ରେ ମଧ୍ୟ ବିନିଯୋଗ କରାଯାଉଛି। ଷ୍ଟକ୍‌ ଓ ବଣ୍ଡ୍‌ କ୍ରୟବିକ୍ରୟ ଭଳି କଞ୍ଚାମାଲ୍‌, କୃଷିଜାତ ଦ୍ରବ୍ୟ, ଶକ୍ତି ଉତ୍ସ, ମୂଲ୍ୟବାନ ଧାତୁ ଆଦି ବିଭିନ୍ନ ପ୍ରକାରର ଦ୍ରବ୍ୟର କ୍ରୟ ଓ ବିକ୍ରୟ ଏହି କାରବାରରେ ଅନ୍ତର୍ଭୁକ୍ତ। 

‌େତବେ କାରବାର ଆରମ୍ଭ କରିବା ପାଇଁ ଆପଣଙ୍କୁ ପ୍ରଥମେ ଏକ ଡିମାଟ୍‌ ଆକାଉଣ୍ଟ୍‌, ଏକ ଟ୍ରେଡିଂ ଆକାଉଣ୍ଟ୍‌ ଓ ଏକ ବ୍ୟାଙ୍କ୍‌ ଆକାଉଣ୍ଟ୍‌ ଖୋଲିବାକୁ ପଡ଼ିବ। ଡିମାଟ୍‌ ଅାକାଉଣ୍ଟ୍‌ ଆପଣଙ୍କ ସମସ୍ତ ଟ୍ରେଡ୍‌ ଓ ହୋଲ୍‌ଡିଂ ପାଇଁ ଏକ ସୁରକ୍ଷିତ ବ୍ୟବସ୍ଥା‌, କିନ୍ତୁ ଏକ୍ସଚେଞ୍ଜ ଅର୍ଡର୍‌ ପାଇଁ ଆପଣଙ୍କୁ ଏକ ମଧ୍ୟସ୍ଥି ଆବଶ୍ୟକ ପଡ଼ିଥାଏ, ଯାହା ମାଧ୍ୟମରେ କିଣାବିକା ସଂପାଦନ ହୋଇଥାଏ। ଭାରତରେ ୬ଟି ମୁଖ୍ୟ କମୋଡିଟି ଟ୍ରେଡିଂ ଏକ୍ସଚେଞ୍ଜ ରହିଛି। ସେଗୁଡ଼ିକ ହେଲା: ନାସ୍‌ନାଲ୍‌ ମଲ୍‌ଟି କମୋଡିଟି ଏକ୍ସଚେଞ୍ଜ ଇଣ୍ଡିଆ (NMCE), ନାସ୍‌ନାଲ୍‌ କମୋଡିଟି ଆଣ୍ଡ୍‌ ଡେରିଭେଟିଭ୍‌ ଏକ୍ସଚେଞ୍ଜ (NCDEX), ମଲ୍‌ଟି କମୋଡିଟି ଏକ୍ସଚେଞ୍ଜ ଅଫ୍‌ ଇଣ୍ଡିଆ (MCX), ଇଣ୍ଡିଆନ୍‌ କମୋଡିଟି ଏକ୍ସଚେଞ୍ଜ (ICEX), ନାସ୍‌ନାଲ୍‌ ଷ୍ଟକ୍‌ ଏକ୍ସଚେଞ୍ଜ (NSE) ଓ ବମ୍ବେ ଷ୍ଟକ୍‌ ଏକ୍ସଚେଞ୍ଜ (BSE)। ଏହାସହ ଭାରତରେ ସ୍ପଟ୍‌ ମାର୍କେଟ୍‌ ଓ ଡେରିଭେଟିଭ୍‌ସ ମାର୍କେଟ୍‌ ପରି ଦୁଇ ପ୍ରକାର କମୋଡିଟି ମାର୍କେଟ୍‌ ମଧ୍ୟ ରହିଛି। 

 କେଉଁ ଦ୍ରବ୍ୟରେ ବିନିଯୋଗ କରିବେ
୧୦୦ରୁ ଅଧିକ ଦ୍ରବ୍ୟରେ କାରବାର ପାଇଁ ବିଶ୍ବବ୍ୟାପୀ ପ୍ରାୟ ୫୦ଟି ପ୍ରମୁଖ ବଜାର ରହିଛି। ବ୍ୟବସାୟୀମାନେ ୪ଟି ପ୍ରମୁଖ ବର୍ଗର ଦ୍ରବ୍ୟରେ କ୍ରୟବିକ୍ରୟ କରିପାରିବେ।
୧-  ଧାତୁ: ନିର୍ମାଣ ଓ ଉତ୍ପାଦନରେ ବ୍ୟବହୃତ ଲୁହା, ତମ୍ବା, ଆଲୁମିନିୟମ୍‌, ନିକେଲ୍‌ ସହିତ ସୁନା, ରୁପା ଓ ପ୍ଲାଟିନମ୍‌ ଭଳି ମୂଲ୍ୟବାନ ଧାତୁରେ ମଧ୍ୟ ଆପଣ ନିବେଶ କରିପାରିବେ।
୨-  ଶକ୍ତି ସାମଗ୍ରୀ: ଘର ଓ ଶିଳ୍ପରେ ବ୍ୟବହୃତ ଶକ୍ତି ସାମଗ୍ରୀର ବହୁଳ କାରବାର କରାଯାଉଛି। ଏଗୁଡ଼ିକ ମଧ୍ୟରେ ବିଜୁଳି, ପ୍ରାକୃତିକ ଗ୍ୟାସ୍‌ ଓ ତେଲ ରହିଛି। ଏହାସହିତ ୟୁରାନିୟମ୍‌, ଇଥାନଲ୍‌ ଓ କୋଇଲା ମଧ୍ୟ କ୍ରୟବିକ୍ରୟ କରିହେବ।
୩- କୃଷିଜାତ ଦ୍ରବ୍ୟ: ବିଭିନ୍ନ ପ୍ରକାରର କୃଷି ଓ ପ୍ରାଣୀଜାତ ଦ୍ରବ୍ୟ ଯଥା: ଚିନି, କୋକୋ, କପା, ମସଲା, ଶସ୍ୟ, ତେଲ ମଞ୍ଜି, ଡାଲି, ଅଣ୍ଡା ଓ ଅନ୍ୟାନ୍ୟ ସାମଗ୍ରୀକୁ ନେଇ କାରବାର କରିହେବ। 
୪- ପରିବେଶ ସାମଗ୍ରୀ: ଏହି ବର୍ଗରେ ଅକ୍ଷୟ ଶକ୍ତି, ଅଙ୍ଗାରକାମ୍ଳ ନିର୍ଗମନ ଓ ହ୍ବାଇଟ୍‌ ସାର୍ଟିଫିକେଟ୍‌ର କାରବାର ଅନ୍ତର୍ଭୁକ୍ତ।
   ସର୍ବଭାରତୀୟ ସ୍ତରରେ ସୁନା, ରୁପା, ଅଶୋଧିତ ତୈଳ, ବ୍ରେଣ୍ଟ୍‌ ଅଏଲ୍‌, ପ୍ରାକୃତିକ ଗ୍ୟାସ୍‌, ସୋୟାବିନ୍‌, କପା, ଗହମ, ମକା ଓ କଫି ଆଦି କମୋଡିଟି ଟ୍ରେଡିଂ ଚାହିଦାରେ ରହିଛି। ଏଥିସହ ଭାରତରେ ଗୋଲମରିଚ, କାଷ୍ଟର୍‌ ସିଡ୍‌, ଅଶୋଧିତ ପାମ୍‌ ଅଏଲ୍‌, ଡାଲ୍‌ଚିନି, କପା ପରି କୃଷିଜାତ ଦ୍ରବ୍ୟ ଏବଂ ପିତ୍ତଳ, ଆଲୁମିନିୟମ୍‌, ସୀସା, ତମ୍ବ‌ା, ଜିଙ୍କ୍‌ ଓ ନିକେଲ୍‌ ପରି ମୂଳ ଧାତୁର କାରବାର ବହୁଳ ଭାବେ କରାଯାଇଥାଏ। କମୋଡିଟି ବଜାରରେ ନିବେଶ ପ୍ରାୟତଃ ଲାଭଦାୟକ ସାବ୍ୟସ୍ତ ହେବା ସହିତ ଏଥିରେ ବଡ଼ଧରଣର ଆର୍ଥିକ କ୍ଷତିର ସାମ୍ନା କରିବାକୁ ପଡ଼ି ନଥାଏ। ପ୍ରାଥମିକ ଭାବେ ଏ ବ୍ୟାପାରରେ ଅଭିଜ୍ଞ ବ୍ୟକ୍ତିଙ୍କ ପରାମର୍ଶରେ ଆପଣ କାରବାର ଆରମ୍ଭ କରିପାରିବେ। ଅଧିକାଂଶ ଷ୍ଟକ୍‌ ମାର୍କେଟ୍‌ ନିବେଶ ଆପ୍‌ରେ କମୋଡିଟି ଟ୍ରେଡିଂର ସୁବିଧା ଉପଲବ୍ଧ।